ប្រាសាទបន្ទាយឆ្មារខ្ទេចខ្ទាំជាច្រើន
ដោយ : សុរនាគ
ថ្ងៃទី 11 តុលា 2009
CEN
N/A: ឈ្មោះប្រាសាទបន្ទាយឆ្មារនៃទឹកដីខេត្តបន្ទាយមានជ័យមានរឿងនិទាននិយាយតៗគ្នារបស់យាយតានិងប្រជាពលរដ្ឋរស់នៅជិតប្រាសាទដែលស្តាប់ទៅគួរឲ្យជក់ចិត្ត ។
រឿងព្រេងរៀបរាប់ថា កាលពីព្រេងនាយមានក្សត្រមួយអង្គត្រូវបានស្តេចផែនដីនិរទេសឱ្យចេញពីព្រះបរមរាជវាំង ។ ស្តេចដែលត្រូវនិរទេសខ្លួននេះ បានមកសង់ខ្ទមមួយនៅក្នុងព្រៃ ដោយប្រកបការងារជាអ្នកធ្វើចម្ការ ។
នៅថៃ្ងមួយនោះទេពធិតាមួយអង្គបានទទួលភារៈមកថែរទាំព្រះអង្គមិនឲ្យដឹងខ្លួនក៏តាំងនិមិត្តខ្លួនជាសត្វឆ្មាមួយមករស់នៅជាមួយ។ជារៀងរាល់ថ្ងៃខណៈដែលស្តេចចេញទៅធ្វើចម្ការផុតពីខ្ទម សត្វឆ្មាដែលជាទេពអប្សរ ក៏បាននិមិត្តជាភាពដើមក្លាយជាស្រីស្អាតចេញមករៀបចំម្ហូបអាហារបាយទឹកគ្រប់បែបយ៉ាង ទុកឲ្យស្តេចនោះ។នៅគ្រាដំបូងស្តេចកម្លោះមិនចាប់ភ្លឹកទេដោយនឹកគិតថាមានអ្នកដំណើរណាមួយឆ្លងកាត់ទីនេះហើយអាណិតខ្លួនក៏ជួយដណ្តាំស្លទៅព្រោះគេក៏បានខ្ចីផ្ទះខ្លួនសំរាកដែរ តែហេតុការណ៍បែបនេះចេះតែកើតមានច្រើនលើកច្រើនសារយូរខែពេក ធ្វើឱ្យស្តេចនិរទេសនោះ កើតមានការងឿងឆ្ងល់យ៉ាងខ្លាំង ។
ថៃ្ងមួយស្តេចកម្សត់អង្គនេះ នៅចាំឃ្លាំមើលនៅខាងក្រៅខ្ទមរបស់ខ្លួន ទើបបានឃើញស្រីក្រមុំយ៉ាងស្អាតម្នាក់និមិត្តចេញពីសត្វឆ្មាមួយដែលរស់នៅក្នុងខ្ទមជាមួយខ្លួននាពេលកន្លងមក ។ ស្រីក្រមុំរូបស្អាតនោះ បានចេញមករៀបចំម្ហូប អាហារដូចខ្លួនបានធ្វើជារៀងរាល់ថៃ្ង ។
ក្នុងខណៈពេលសត្វឆ្មានិមិត្តខ្លួនជាស្រីរូបស្អាតហើយភ្លាម ស្តេចនិរទេសក៏បានស្ទុះទៅចាប់ស្រោមឆ្មានោះដែរ ។ នាងស្រីរូបស្អាតឃើញហេតុការណ៍ដូច្នេះបាននិយាយ អង្វរសុំស្រោមឆ្មាមកវិញ តែស្តេចមិនព្រមទាល់តែសោះ ។
ចំឡាក់ដ៏ល្បីរបស់ប្រាសាទបន្ទាយឆ្មារ
បន្ទាប់ពីនិយាយអង្វរករអស់សមត្ថភាពហើយ ស្រីក្រមុំស្រោមឆ្មា ក៏បាននិយាយប្រវត្តិពិតនៃការក្លែងភេទក្នុង បំណងចូលមកបម្រើម្ហូបអាហារប្រចាំថៃ្ងដល់ព្រះអង្គ ដើម្បីកុំ ឱ្យស្តេចដែលត្រូវនិរទេសនោះមានការលំបាកក្នុងដំណើរជីវិតខ្លាំងពេក ។
លុះដល់ពេលដឹងរឿងសព្វគ្រប់អស់ហើយ ទ្រង់ក៏ចង់រួមរស់ជាមួយនាងស្រោមឆ្មា ។ ពេលនោះនាងបានប្រាប់ដល់ស្តេចថា បើចង់រួមរស់ជាមួយនាង សូមយកស្រោមឆ្មាទៅដុតចុះ វានឹងកើតចេញជាប្រាសាទមួយភ្លាម ។ ស្តេចក៏បានធ្វើតាមការណែនាំ គឺយកស្រោមឆ្មាទៅដុត រួចក៏ផុសចេញជាប្រាសាទមួយឡើង ។ តាមន័យក្នុងរឿងនិទានដូចនេះ ហើយទើបស្តេចប្រសិទ្ធនាមថា “ប្រាសាទបន្ទាយឆ្មារ”តរហូតមកដល់សព្វថៃនេះឯង ។
នេះជារឿងព្រេង ប៉ុន្តែឈ្មោះបន្ទាយឆ្មាមានន័យជា “បន្ទាយតូច” ឬ“វាំងតូច” ដែលផ្ទុយគ្នាពីបន្ទាយធំ ឬនគរធំ ។ មតិលើកឡើងក្រោយនេះគឺសមហេតុផលជាង ព្រោះតាមប្រវត្តិសាស្ត្រ យើងឃើញមានបន្ទាយធំជារាជធានី ដែលហៅថា“មហានគរ” ឬប្រែថាក្រុងធំ ។
ដូចនេះបើមានការបង្កើតក្រុងតូចល្មមសម្រាប់ស្តេចអនុរាជ ឬស្តេចត្រាញ់គង់នៅ អ្នក ស្រុកតែងកំណត់សម្គាល់ថា ក្រុងតូច ឬបន្ទាយតូច ហើយក៏អាចហៅពាក្យម្យ៉ាង ទៀតបានដែរគឺ “បន្ទាយឆ្មារ” ដូចដែលមានឈ្មោះប្រាសាទបន្ទាយឆ្មារតរហូតមកដល់បច្ចុប្បន្ននេះទៅ៕
សរសេរបញ្ចេញមតិរបស់អ្នក
សូមមេត្តាកុំប្រើពាក្ស អសុរស់ មតិរបស់អ្នកសំខាន់ណាស់ សំរាប់អ្នកអានផ្សេងៗទៀត អ្នកអានគ្រប់ៗគ្នាមិនត្រឹមតែធ្វើការសិក្សាដោយ អានតែអត្ថបទនេះទេ គេគ្រប់គ្នា តែងតែអាន និង សិក្សាមតិរបស់អ្នកផងដែរ។ មតិរបស់អ្នក នឹង ចុះផ្សាយលើទំព័រនេះក្នងរយះពេល ឆាប់ៗបំផុត។
There are no comments on this entry.