ព្រះសង្ឃមួយអង្គសុគត ពេលនិមន្តបិណ្ឌបាត្រដួល
- Thursday, November 5, 2009, 10:02
- ពត៌មានភាសាខ្មែរ
- 47 views
- បញ្ចេញមតិផ្ទាល់ខ្លួន
ដោយ : សុផុន
ថ្ងៃទី 4 វិច្ឆិការ 2009
CEN
បន្ទាយមានជ័យ: សាមណេរសង្ឃព្រះពុទ្ធសាសនាមួយអង្គ បានសុគតភ្លាមៗក្នុងពេលនិមន្តដើរបិណ្ឌបាត្រកាលពីម៉ោង ៧ ព្រឹក ថ្ងៃទី៤ ខែវិច្ឆិកា ឆ្នាំ២០០៩ កន្លងមក នៅក្បែរផ្ទះអ្នកស្រុកមួយកន្លែងខាងជើងវត្តត្រាច ភូមិក្បាលស្ពាន សង្កាត់-ក្រុង ប៉ោយប៉ែត ឬចំណុចទំនប់ក៥ ។ ប៉ុន្តែរឿងនេះប្រទាំងប្រទើសគ្នាពីមូលហេតុពិតប្រាកដដែលនាំឱ្យសង្ឃ សុគត ដោយ វត្តអះអាងថា បណ្តាលពីខ្សែភ្លើងដែលម្ចាស់ផ្ទះរាយការពារចោរចូលបានឆក់ ។ ប៉ុន្តែប៉ូលិស និងប៉េអឹមថា ពុំទាន់ ច្បាស់លាស់ពីមូលហេតុណាមួយទេ ។
ញោមស្រីឈ្មោះ សឿង ហៀង អាយុ ៥៧ឆ្នាំ នៃសង្ឃរងគ្រោះ ចៅអធិការវត្តត្រាចព្រះនាម ចិន សំអុន និង អាចារ្យវត្តនេះស្រង់ប្រភពសាមណេរព្រះនាម ម៉ក់ សិទ្ធិ ដែលនិមន្តបិណ្ឌបាត្រជាមួយ និងសាក្សីខ្លះមកប្រាប់នៅថ្ងៃទី ៤ ខែវិច្ឆិកា ឆ្នាំ២០០៩ថា សាមណេរព្រះនាម រ៉ា ពីឌាំង ព្រះជន្ម ១៦ វស្សា បាននិមន្តបិណ្ឌបាត្រជាមួយព្រះសង្ឃព្រះនាម ម៉ក់ សិទ្ធិ ។ នៅមុនកើតហេតុ ព្រះអង្គបាននិមន្តខុសពីគន្លងធ្លាប់និមន្តដូចសព្វមួយដង ហើយឆ្លងកាត់ដីរបស់ម្ចាស់ផ្ទះ ឈ្មោះ សួន ចន្ធូរ ភេទស្រី អាយុ ៦០ឆ្នាំ រស់នៅភូមិក្បាលស្ពាន សង្កាត់-ក្រុង ប៉ោយប៉ែត ។ ពេលនោះព្រះអង្គបានដួលចុះ ។ ព្រះសង្ឃព្រះនាម ម៉ក់ សិទ្ធិ បានជួយទាញក៏មានអារម្មណ៍ថា កម្លាំងឆក់ទាញម្យ៉ាងបានប៉ះ ។ សង្ឃនេះបានប្រឹងទាញស្បង់ព្រះសង្ឃរងគ្រោះ ប៉ុន្តែ ព្រះអង្គនោះបានបែកពពុះមាត់ និងមានស្នាមខ្មៅខ្លោចនៅកជើងខាងឆ្វេង ហើយក៏សុគតទៅ ។
ក្រោយកើតហេតុនេះ វត្តបាននាំសពសង្ឃក្មេងទៅកាន់វត្តវិញ ។ ឯប៉ូលិសក្រុងប៉ោយប៉ែត ប៉េអឹមក្រុងនេះ បានចុះស្រាវជ្រាវ ។ តែប៉ូលិសបានចូលជ្រៅជាង ហើយបានឈានដល់និមន្តសង្ឃនិមន្តជាមួយ និងកូនប្រុសនៃម្ចាស់ ផ្ទះដែលសង្ស័យរាយខ្សែភ្លើងការពារចោរពេលយប់នោះ ទៅបំភ្លឺនៅអធិការដ្ឋានប៉ូលិសក្រុង ។
លោក ស៊ុន សាវុធ អធិការរងប៉ូលិសក្រុងប៉ោយប៉ែត ឱ្យដឹងនៅថ្ងៃទី៤ ខែវិច្ឆិកាថា កូនប្រុសនៃស្ត្រីម្ចាស់ផ្ទះ សង្ស័យរាយខ្សែភ្លើងនោះ បដិសេធថា ខ្លួនពុំបានរាយខ្សែភ្លើងការពារទ្រព្យសម្បត្តិ និងផ្ទះនៅ ពេលយប់ និងភ្លេចសានោះទេ ។
ប៉ុន្តែសង្ឃនិមន្តជាមួយប្រាប់វត្តថា បានឃើញបុរសនោះមូរខ្សែភ្លើង យកទៅក្រោយពេលព្រះសង្ឃមួយអង្គឆក់សុគត ។
ទោះយ៉ាងណា លោក ស៊ុន សាវុធ អធិការរងប៉ូលិសក្រុងប៉ោយប៉ែត សំអាងលើសម្រង់ដីកាសង្ឃ ម៉ក់ សិទ្ធិ ដដែលដែរដែលថា សង្ឃរងគ្រោះពុំមែនសុគតដោយខ្សែភ្លើងឆក់ទេ ។ ព្រះអង្គរងគ្រោះនៅពេលសុគតបានប្រាប់ថា ព្រះអង្គវិលមុខ រួចក៏ដួលចុះ និង បែកពពុះមាត់ ហើយសុគតទៅ ។ ឯស្នាម នៅកជើងឆ្វេងជាស្នាមរបួសពេលដួលទៅប៉ះនឹងបន្ទះស័ង្កសី ។
ឯលោក ម៉ែន ភារម្យ មេបញ្ជាការរងកងរាជអាវុធហត្ថខេត្តប្រចាំទិស ក្រុងប៉ោយប៉ែត ឱ្យដឹងដែរថា សមត្ថកិច្ច ខ្លួនពុំទាន់ស្រាវជ្រាវករណីនេះឱ្យពិស្តារទេ ។
ពីវត្តត្រាច បានមានប្រតិកម្មខ្លាំងពេលឮថា សមត្ថកិច្ចពុំសន្និដ្ឋានថា ករណីព្រះសង្ឃរងគ្រោះនេះ សុគតមកពីខ្យល់គរ ឬស្កន់ជាន់ទៅវិញ ។ វត្តមិនទាមទារប្តឹងផ្តល់រឿងនេះទេ តែសុំសមត្ថកិច្ចស្រាវជ្រាវរកការពិតដើម្បីបានយុត្តិធម៌ និងព្រលឹងស្ងប់សម្រាប់សង្ឃរងគ្រោះ ។
ក៏មានការចោទប្រកាន់បន្ថែមដែរថា ទីតាំងសង្ស័យរាយខ្សែភ្លើង បង្កប់ការពារចោរចូលនោះ គេឃើញកណ្តុរ កង្កែបឆក់ងាប់ ។
ប៉ូលិសនៅពេលបន្ទាប់មក និយាយថា ខ្លួននឹងស្រាវជ្រាវរឿងនេះ ឱ្យច្បាស់លាស់ជាងនេះ ពុំមែនប្រើលទ្ធផលដំបូងនេះក្នុងសេចក្តីសន្និដ្ឋានសម្រេចរបស់ខ្លួន ទេ ៕
About the Author
somphy has written 3369 stories on this site.
សរសេរបញ្ចេញមតិរបស់អ្នក
សូមមេត្តាកុំប្រើពាក្ស អសុរស់ មតិរបស់អ្នកសំខាន់ណាស់ សំរាប់អ្នកអានផ្សេងៗទៀត អ្នកអានគ្រប់ៗគ្នាមិនត្រឹមតែធ្វើការសិក្សាដោយ អានតែអត្ថបទនេះទេ គេគ្រប់គ្នា តែងតែអាន និង សិក្សាមតិរបស់អ្នកផងដែរ។ មតិរបស់អ្នក នឹង ចុះផ្សាយលើទំព័រនេះក្នងរយះពេល ឆាប់ៗបំផុត។