ដោយ ដែន អយុធ្យា
2010-02-07
វិទ្យុអាស៊ីសេរី
របាយការណ៍សមាគមអាដហុកប្រចាំឆ្នាំ២០០៩ ដែលទើបចេញផ្សាយជាសាធារណៈកាលពីថ្ងៃទី៤ ខែកុម្ភៈ បានរកឃើញថា អំពើហិង្សានិងការរំលោភសេពសន្ថវៈទៅលើស្ត្រីនិងកុមារបានកើនឡើងខ្ពស់និងមានស្ថានភាពអាក្រក់ជាងឆ្នាំ២០០៨។
លោក ធន សារាយ ប្រធានសមាគមអាដហុក មានប្រសាសន៍ថា ការធ្លាក់ចុះសីលធម៌សង្គម ការប្រើប្រាស់ថ្នាំញៀន ការខ្វះចន្លោះរបស់អាជ្ញាធរក្នុងការគ្រប់គ្រងវីដេអូអាសអាភាសដែលកើតមានព្រោងព្រាតនៅតាមហាងកាហ្វេទូទាំងប្រទេសនិងនិទណ្ឌភាពជាមូលហេតុចម្បងៗនៃការកើតឡើងនៃអំពើនេះ។
លក ធន សារាយ មានប្រសាសន៍ដូច្នេះ ៖ «ការសម្របសម្រួលដោយបង្ខំឲ្យជនរងគ្រោះទៅរស់នៅជាមួយជនល្មើសបន្តទៅទៀត គឺជាមូលហេតុដ៏សំខាន់ដែលបណ្ដាលឲ្យជនរងគ្រោះទទួលរងនូវអំពើហិង្សាជាបន្តទៅទៀត។ អំពើរំលោភសេពសន្ថវៈទៅលើស្រ្តីនិងកុមារពុំមានការថយចុះទាល់តែសោះនៅឆ្នាំ២០០៩នេះ។ ការធ្លាក់ចុះសីលធម៌សង្គម ការប្រើប្រាស់ថ្នាំញៀន ការខ្វះចន្លោះក្នុងការគ្រប់គ្រងវីដេអូអាសអាភាសនិងនិទណ្ឌភាពជាមូលហេតុចម្បងៗនៃការកើតឡើងអំពើនេះ»។
ក្នុងចំណោមបទល្មើសរំលោភសេពសន្ថវៈចំនួន៤៦០ករណី មាន៦៦ករណីត្រូវបានធ្វើការសម្រុះសម្រួលជាសំណងរដ្ឋប្បវេណីនៅត្រឹមស្ថានីយប៉ូលិសដោយមិនបញ្ជូនសំណុំរឿងទៅកាន់តុលាការដើម្បីកាត់ទោសជនល្មើសនោះទេ នេះបើយោងតាមរបាយការណ៍សមាគមអាដហុក ធ្វើការស៊ើបអង្កេតនិងអន្តរាគមន៍។
លោក ធន សារាយ បន្តថា បទល្មើសនៃការរំលោភសេពសន្ថវៈលើស្ត្រីនិងកុមារ ជាពិសេសអនីតិជនពុំមានសញ្ញាថយចុះទាល់តែសោះទៅបណ្តាឆ្នាំខាងមុខៗ។ លោកឲ្យដឹងថា ឆ្នាំ២០០៩ បទល្មើសរំលោភសេពសន្ថវៈកើតមានលើស្ត្រីនិងកុមារមាន៧៨,២% ខណៈឆ្នាំ២០០៨ កើតមានត្រឹមតែ៦៧% នៃជនរងគ្រោះទាំងអស់។
លោក ទូច ណារ៉ុថ ស្នងការនគរបាលក្រុងភ្នំពេញ កាលពីពេលថ្មីៗនេះមានប្រសាសន៍ថា ដើម្បីទប់ស្កាត់ការរីករាលបទល្មើសរំលោភសេពសន្ថវៈទៅលើស្ត្រីនិងកុមារទទួលបានលទ្ធផលល្អ សមត្ថកិច្ចបានធ្វើការរឹបអូសវីស៊ីឌីអាសអាភាសយកទៅបំផ្លាញចោលបានជាច្រើនម៉ឺនឌីស មិនតែប៉ុណ្ណោះសមត្ថកិច្ចបានចាប់ខ្លួនអ្នកប្រព្រឹត្តល្មើសក្នុងការធ្វើចរាចរណ៍ឌីសអាសអាភាស បិទផ្ទះបនស្រីពេស្យាចារនិងជនល្មើសរំលោភផ្លូវភេទបញ្ជូនទៅកាន់តុលាការបានជាច្រើនករណី។
បទល្មើសផ្លូវភេទដែលកើនឡើងច្រើនពីមួយឆ្នាំទៅមួយឆ្នាំនៅកម្ពុជានេះ ក្រុមអង្គការសង្គមស៊ីវិលនិងប្រជាពលរដ្ឋបានដាក់ការស្តីបន្ទោសទៅលើអំពើពុករលួយនិងអសមត្ថភាពក្នុងការងាររបស់សមត្ថកិច្ច ព្រោះថា សមត្ថកិច្ចបានអនុញ្ញត្តឲ្យហាងកាហ្វេស៊ិចកើតមានស្ទើរគ្រប់តំបន់តាមខេត្ត-ក្រុងទូទាំងប្រទេសកម្ពុជាយ៉ាងអនាធិបតេយ្យ ដោយមិនមានការបង្ក្រាប ឬទប់ស្កាត់ឡើយ ផ្ទុយទៅវិញសមត្ថកិច្ចបានឈរជាខ្នងបង្អែកក្នុងការប្រកបរបរបើកហាងកាហ្វេស៊ិចនេះទៅវិញ ជាមួយការទទួលបានប្រាក់កម្រៃពីម្ចាស់ហាងកាហ្វេស៊ិច តាមរយៈការដាក់ខែឬប្រាក់ប្រចាំថ្ងៃ។
សមាគមអាដហុកបានព្រួយបារម្ភថា បទល្មើសនៃការរំលោភសេពសន្ថវៈទៅលើស្រ្តីនិងកុមារ នឹងនៅតែបន្តកើនឡើងទៅបណ្តាឆ្នាំខាងមុខបន្តទៀត ប្រសិនបើអាជ្ញាធរខ្វះចន្លោះការគ្រប់គ្រង់វីដេអូអាសអាភាសនិងនិទណ្ឌភាពនៅបន្តកើតមាននៅក្នុងប្រទេសកម្ពុជាជាបន្តទៀតនោះ៕
សរសេរបញ្ចេញមតិរបស់អ្នក
សូមមេត្តាកុំប្រើពាក្ស អសុរស់ មតិរបស់អ្នកសំខាន់ណាស់ សំរាប់អ្នកអានផ្សេងៗទៀត អ្នកអានគ្រប់ៗគ្នាមិនត្រឹមតែធ្វើការសិក្សាដោយ អានតែអត្ថបទនេះទេ គេគ្រប់គ្នា តែងតែអាន និង សិក្សាមតិរបស់អ្នកផងដែរ។ មតិរបស់អ្នក នឹង ចុះផ្សាយលើទំព័រនេះក្នងរយះពេល ឆាប់ៗបំផុត។
There are no comments on this entry.