ដោយ កែវពេជ្រ មេត្តា
2010-03-08
វិទ្យុអាស៊ីសេរី
មន្ដ្រីមន្ទីរសុខាភិបាលរាជធានីភ្នំពេញ បានឲ្យដឹងនៅថ្ងៃ៧ មីនា ឆ្នាំ២០១០នេះថា នៅចុងខែមីនានេះ គេគ្រោងនឹងធ្វើយុទ្ធនាការចាក់ថ្នាំវ៉ាក់សាំងការពារការឆ្លងជំងឺគ្រុនផ្ដាសាយថ្មី A(H1N1) ឲ្យដល់កុមារ ស្ដ្រីមានផ្ទៃពោះនិងបុគ្គលិកសុខាភិបាល ព្រមទាំងមន្ដ្រីនគរបាលនិងកងរាជអាវុធហត្ថ។
អ្នក ដំណើរ ពាក់ ម៉ាស មុខ ខណៈ ដើ រកាត់ ផ្សារ មួយ នៅ ក្នុង រាជធានី ភ្នំពេញ កាល ពី ថ្ងៃ ៦ តុលា ២០០៩។ (AFP/TANG CHHIN SOTHY)
លោក យឹម ដេត អ្នកសម្របសម្រួលយុទ្ធនាការចាក់ថ្នាំបង្ការនៃការិយាល័យស្រុកប្រតិបត្តិកណ្ដាលរបស់មន្ទីរសុខាភិបាលរាជធានីភ្នំពេញ បានមានប្រសាសន៍ថា ក្រុមគោលដៅទាំងប៉ុន្មាននេះគឺត្រូវបានគេចាត់ទុកថា ជាក្រុមងាយរងគ្រោះនិងជាអ្នកមានភាពជិតស្និទ្ធនឹងអ្នកជំងឺ។
លោក យឹម ដេត មានប្រសាសន៍ឲ្យដឹងដូច្នេះ ៖ «ថ្នាំសម្រាប់ត្រៀមរៀបចំចាក់ហ្នឹងអត់បានគ្រប់ទាំងអស់គ្នាទេ ព្រោះគេឲ្យមកវាតិចដែរ។ យើងជ្រើសរើសក្រុមគោលដៅដែលក្មេង៦ខែទៅក្រោម២ឆ្នាំ ស្រ្ដីមានផ្ទៃពោះ បុគ្គលិកសុខាភិបាលនិងរដ្ឋអំណាចមូលដ្ឋាន មានប៉ូលិស ប៉េអឹម»។
លោកវេជ្ជបណ្ឌិត លី សូវ៉ាន់ អនុប្រធាននាយកដ្ឋានប្រយុទ្ធជំងឺឆ្លងនៃក្រសួងសុខាភិបាលបានបញ្ជាក់ប្រាប់ដែរថា ការគ្រោងធ្វើយុទ្ធនាការចាក់វ៉ាក់សាំងការពារការឆ្លងជំងឺគ្រុនផ្ដាសាយថ្មី A(H1N1) ទៅលើក្រុមគោលដៅទាំងប៉ុន្មានដូចបានបញ្ជាក់មកនេះ គឺជាផែនការរបស់ក្រសួងសុខាភិបាលសហការជាមួយអង្គការសុខភាពពិភពលោក ហើយមិនមែនធ្វើតែនៅទីក្រុងភ្នំពេញទេ គឺនឹងធ្វើនៅទូទាំងប្រទេស។
លោកវេជ្ជបណ្ឌិត លី សូវ៉ាន់ មានប្រសាសន៍ដូច្នេះ ៖ «ថ្នាំវ៉ាក់សាំងដែលគេត្រៀមនឹងធ្វើការចាក់ជាដំបូងគឺមានប្រមាណ៣សែនដូស គឺយើងនឹងទទួលបានប្រមាណជា១០% នៃប្រជាពលរដ្ឋ។ ដំបូងយើងចាប់ផ្ដើមខេត្តក្រុងដែលយើងថា មានជំងឺផ្ដាសាយថ្មីហ្នឹង គឺភ្នំពេញ ខេត្តកណ្ដាល កំពង់ស្ពឺអីអ៊ីចឹងជាដំបូងសិន ហើយបន្ទាប់មកទៀតយើងនឹងពង្រីកឲ្យបានទូទាំងប្រទេស។ វ៉ាក់សាំងនឹងមកជាបន្តបន្ទាប់ក្នុងអំឡុងពេល១ឆ្នាំរហូតដល់ឆ្នាំ២០១១ បានយើងបានគម្រប់ដល់១០% នៃប្រជាពលរដ្ឋ»។
មន្ដ្រីក្រសួងសុខាភិបាលដដែលបានឲ្យដឹងផងដែរថា ប្រទេសកម្ពុជាមានការឆ្លងជំងឺគ្រុនផ្ដាសាយថ្មី A(H1N1) រហូតមកដល់ពេលនេះគឺមានចំនួន៥៦២ករណី ហើយនិងមានអ្នកស្លាប់ចំនួន៦ករណី ឬ៦នាក់។ ក្នុងចំណោមអ្នកស្លាប់ទាំងនោះគឺមានស្ដ្រីមានផ្ទៃពោះនិងកុមារផងដែរ ៖ «ប៉ុន្តែគ្រាន់តែថា វ័យដែលយើងពិនិត្យឃើញភាគច្រើន ច្រើនតែអាយុក្រោម២០ឆ្នាំ»។
មន្ដ្រីក្រសួងសុខាភិបាលដដែលបានឲ្យដឹងផងដែរថា ស្ថានភាពនៃការឆ្លងជំងឺគ្រុនផ្ដាសាយថ្មី A(H1N1) នៅក្នុងខែមីនានេះ បានថយចុះច្រើនហើយ គឺមានតែប្រមាណ១ករណី ឬ២ករណីទេ។ ទោះជាយ៉ាងនេះក្តី ក្រសួងសុខាភិបាលនៅតែបន្តការពារនិងទប់ស្កាត់ដោយប្រុងប្រយ័ត្នដែរ ដូចជាការត្រៀមធ្វើយុទ្ធនាការចាក់វ៉ាក់សាំងការពារនោះជាដើម ពីព្រោះគេមានក្តីបារម្ភខ្លាចក្រែងជំងឺនេះនឹងមានការផ្ទុះជាលើកទី២ ឬទី៣នៅពេលខាងមុខ៕
សរសេរបញ្ចេញមតិរបស់អ្នក
សូមមេត្តាកុំប្រើពាក្ស អសុរស់ មតិរបស់អ្នកសំខាន់ណាស់ សំរាប់អ្នកអានផ្សេងៗទៀត អ្នកអានគ្រប់ៗគ្នាមិនត្រឹមតែធ្វើការសិក្សាដោយ អានតែអត្ថបទនេះទេ គេគ្រប់គ្នា តែងតែអាន និង សិក្សាមតិរបស់អ្នកផងដែរ។ មតិរបស់អ្នក នឹង ចុះផ្សាយលើទំព័រនេះក្នងរយះពេល ឆាប់ៗបំផុត។
There are no comments on this entry.