ថ្ងៃទី 9 មិថុនា 2012
ដោយ: រតនា
CEN
លោក រ៉ុង ឈុន ប្រធាន សមាគម គ្រូបង្រៀន កម្ពុជា ឯករាជ្យ
ភ្នំពេញ: សិក្ខាសាលា ស្តីពី ការចងក្រង និងគ្រប់គ្រងសមាគម ចំនួន ១៩ ខេត្តក្រុង ដែលរៀបចំ ដោយសមាគមគ្រូបង្រៀនកម្ពុជាឯករាជ្យ ដោយមានអ្នកចូលរួមប្រមាណ ៥០ នាក់ បានធ្វើឡើង នៅភោជនីយដ្ឋាន ទាអាំង ហង្សទេព ស្ថិតនៅផ្ទះលេខ២C ផ្លូវលេខ៣៥២ សង្កាត់បឹងកេងកង១ ខណ្ឌចំការមន។
សិក្ខាសាលាពង្រឹងសមត្ថភាពគ្រូបង្រៀន ក្នុងការតស៊ូមតិនេះ បានឧបត្ថម្ភដោយអង្គការ ILO។
លោក រ៉ុង ឈុន ប្រធានសមាគមគ្រូបង្រៀនកម្ពុជាឯករាជ្យ បានមានប្រសាសន៍ប្រាប់អ្នកកាសែត នៅព្រឹកថ្ងៃទី៩ ខែមិថុនា ថា សិក្ខាសាលា នៅពេលនេះ គឺជាជុំទី៣ ក្រោមការឧបត្ថម្ភរបស់អង្គការពលកម្មអន្តរជាតិ ILO។
លោកបានបន្តថា សិក្ខាសាលានៅជុំទី៣នេះ គឺសរុបឡើងវិញ អំពីគោលបំណងរៀបចំក្រងសៀវភៅមេរៀន អំពី នីតិវិធី នៃការតស៊ូមតិ និងបណ្តុះបណ្តាលពង្រឹងសមត្ថភាពថ្នាក់ដឹកនាំសមាសភាពដឹកនាំគ្រូបង្រៀនកម្ពុជាឯករាជ្យ នៅតាមបណ្តាខេត្តក្រុងទូទាំងប្រទេស។
លោក រ៉ុង ឈុន បានបញ្ជាក់ថា “នេះជាការប្រឹងនូវការបណ្តុះឆន្ទៈ ហើយនិងយុទ្ធសាស្ត្រអំពីរបៀបនៃការតស៊ូមតិតាមមូលដ្ឋាន ខេត្តក្រុងទូទាំងប្រទេស បើសិនជាមានបញ្ហាអីកើតឡើង ត្រូវធ្វើបែបម៉េច ដើម្បីស្វែងរកដំណោះស្រាយជូនសមាជិកសមាគគ្រូបង្រៀន”។
លោក រ៉ុង ឈុន បានបន្តថា នៅពេលដែលមានអំពើអយុត្តិធម៌កើតឡើង រំលោភសិទ្ធិមនុស្ស គឺសមាជិកសមាគមនៃគ្រូបង្រៀនកម្ពុជាឯករាជ្យ ត្រូវអនុវត្ត គឺសិក្សាតាមដាន និងស្វែងពីអង្គហេតុនៃទំនាស់ និងចូលទៅជួយធ្វើអន្តរាគមន៍ តាមផ្លូវច្បាប់ ធ្វើជាមូលដ្ឋាន៕