ថ្ងៃទី 21 មិថុនា 2012
ដោយ: រតនា
CEN
ភ្នំពេញ: រូបចម្លាក់ចំណាស់ជាង ១ពាន់ឆ្នាំ ដែលគេបានលួចចេញពីកម្ពុជា ក្នុងសម័យប្រទេសជួបនឹងសង្គ្រាមស៊ីវិល ត្រូវបានគេរាយការណ៍ថា នឹងត្រូវតុលាការសហរដ្ឋអាមេរិក ធ្វើសវនាការនៅថ្ងៃទី២១ ខែមិថុនា ឆ្នាំ២០១២នេះ ជុំវិញបណ្តឹងទាមទាររបស់កម្ពុជា ដើម្បីឲ្យសហរដ្ឋអាមេរិកប្រគល់រូបចម្លាក់បុរាណនៃសតវត្សរ៍ទី១០ មកឲ្យកម្ពុជាវិញ។
រូបចម្លាក់ចំណាស់ជាង ១ពាន់ឆ្នាំនេះ ត្រូវមន្ត្រីកម្ពុជាឲ្យដឹងថា គឺជារូបចម្លាក់នៃទ្រព្យសម្បត្តិរបស់ប្រាសាទកោះកេរ ក្នុងខេត្តព្រះវិហារ ដែលចុងក្រោយនេះ ត្រូវគេប្រទះឃើញដាក់លក់ឡាយឡុងតម្លៃ ៣លានដុល្លារ ក្នុងសារមន្ទីរឯកជន Sotheby ក្នុងបុរីញូយ៉ក។
ប៉ូលិសសហព័ន្ធរបស់សហរដ្ឋអាមេរិក បម្រុងនឹងរឹបអូសយកសម្បត្តិបុរាណនេះមកឲ្យប្រទេសកម្ពុជាវិញ ប៉ុន្តែសារមន្ទីរឯកជន Sotheby បានតវ៉ាថា មិនមានភស្តុតាងណាមួយថា វត្ថុបុរាណនេះបានមកដល់សារមន្ទីរ Sotheby ដោយការលួចចេញខុសច្បាប់ពីកម្ពុជានោះទេ។
សេចក្តីរាយការណ៍ពីសហរដ្ឋអាមេរិក នៅថ្ងៃទី២១ ខែមិថុនានេះ បានឲ្យដឹងថា តុលាការសហរដ្ឋអាមេរិក នឹងធ្វើសវនាការជុំវិញរឿងរូបចម្លាក់ចំណាស់ជាង ១ពាន់ឆ្នាំនោះហើយ ដើម្បីនឹងកំណត់ថា តើនឹងត្រូវប្រគល់មកឲ្យកម្ពុជាវិញ ឬក៏យ៉ាងណានោះ។
សូមជម្រាបថា សង្គ្រាមស៊ីវិលអូសបន្លាយប្រមាណ ៣០ឆ្នាំ នៅក្នុងកម្ពុជា បានបំផ្លាញហេដ្ឋារចនាសម្ព័ន្ធប្រទេសខ្ទេចខ្ទី, ធនធានមនុស្សត្រូវរបបកម្ពុជាប្រជាធិបតេយ្យ បានបំផ្លាញ និងសម្លាប់ចោលស្ទើរអស់ទាំងស្រុង សម្បត្តិធនធានធម្មជាតិ ត្រូវសង្គ្រាមបំផ្លិចបំផ្លាញស្ទើរខ្ទេចខ្ទី កេរដំណែលមរតកដូនតា ជាសម្បត្តិវប្បធម៌ជាតិ ត្រូវគេលួច និងបន្លំយកធ្វើជាសម្បត្តិទ្រព្យប្រទេសដទៃ៕ S