ថ្ងៃទី 24 មិថុនា 2012
ដោយ: សោភ័ណ
CEN
ជំងឺកាមរោគក៏អាចឆ្លងពីមនុស្សម្នាក់ទៅមនុស្សម្នាក់តាមផ្លូវផ្សេងៗគ្នាជាច្រើន
ភ្នំពេញ: គេធ្លាប់បានឮថា ជំងឺកាមរោគឆ្លងតែតាមផ្លូវរួមភេទតែមួយគត់ ហើយគេក៏គិតថា ឱ្យតែប្រើស្រោមអនាម័យនៅពេលរួមភេទ គឺគ្រប់គ្រាន់ដើម្បីបង្ការបញ្ចៀសជំងឺបាន។ ប្រសិនជាគេពិតជាគិតឃើញដូច្នោះ ចូរផ្លាស់ប្តូរការរិះគិតនេះភ្លាម។
ជាក់ស្តែង ជំងឺកាមរោគក៏អាចឆ្លងពីមនុស្សម្នាក់ទៅមនុស្សម្នាក់តាមផ្លូវផ្សេងៗគ្នាជាច្រើន មិនតែប៉ុណ្ណោះឆ្លងតាមផ្លូវដែលអ្នកមិនអាចស្មានដល់។
១.អូរ៉ាល់សិច
ថ្វីត្បិតពុំមានការប្រឈមឆ្លងជំងឺកាមរោគខ្ពស់ដូចការរួមភេទតាមទ្វារមាស ឬរន្ធគូទ តែអូរ៉ាល់សិចនៅតែប្រឈមការឆ្លងជំងឺកាមរោគនិងហ៊ីវ។ ទឹកកាមនិងរំអិលទ្វារមាសត្រូវបានចាត់ទុកជាសារជាតិប្រាស្រ័យផ្ទាល់ មានលទ្ធភាព”សាយភាយ”ជំងឺ។
អ្នកណាក៏ដោយ ពេលប្រាស្រ័យផ្ទាល់ជាមួយទឹកកាមរំអិលទ្វារមាស ឬឈាមពីស្នាមដាច់របកលើប្រដាប់ភេទ ឬក្នុងមាត់អ្នកជំងឺនោះ សុទ្ធតែអាចឆ្លងជំងឺ។ ដូច្នេះ អូរ៉ាល់សិចក៏ត្រូវប្រើស្រោមអនាម័យ ទើបធានាសុវត្ថិភាព។
២.ផ្លូវឈាម
កន្លងមក ការផ្តល់ឈាមច្រើនតែមិនត្រូវបានពិនិត្យជំងឺរលាកថ្លើម ហើយលទ្ធផលគឺអ្នកទទួលឈាម ពេលវិភាគឈាមនោះឃើញវិជ្ជមានជាមួយជំងឺរលាកថ្លើម។ ប្រការនេះក៏ដូចគ្នាចំពោះជំងឺហ៊ីវ ឬអេដស៍។
អាស្រ័យហេតុនេះ បច្ចុប្បន្នពេលផ្តល់ឈាម គេត្រូវធ្វើប្រយ័ត្នប្រយែងការវិភាគចម្រាញ់ ដើម្បីចៀសវាងទទួលឈាមមានផ្ទុកជំងឺ រាប់ទាំងជំងឺកាមរោគ។ ព្រោះនៅក្នុងសរីរាង្គអ្នកជំងឺ វីរុសជំងឺមានវត្តមានក្នុងជាតិរំអិលទាំងអស់។
៣.ទឹកដោះម្តាយ
ប្រសិនមាតាម្នាក់មានជំងឺកាមរោគ មិនបានព្យាបាល ជួនកាលជំងឺអាចត្រូវបានចម្លងទៅឱ្យកូនក្នុងពេលចិញ្ចឹមកូនដោយទឹកដោះម្តាយ (ឬក្នុងពេលសម្រាល)។ ជំងឺកាមរោគអាចសម្ងំមិនពង្រីកឥទ្ធិពលចេញក្រៅក្រោយរយៈពេលច្រើនឆ្នាំ ឬនៅលក្ខខណ្ឌជាក់ស្តែងណាមួយនោះ ជំងឺទើបលេចចេញ។ នេះគឺជាមូលហេតុដែលស្ត្រីជាច្រើនពុំទាន់ដែលមានទំនាក់ទំនងផ្លូវភេទម្តងសោះ បែរជាពិនិត្យឃើញមានជំងឺកាមរោគ។
៤.ប្រាស្រ័យស្បែកនិងស្បែក
សូម្បីតែពេលស្បែកប៉ះស្បែក ក៏គ្រប់គ្រាន់អាចធ្វើឱ្យឆ្លងជំងឺកាមរោគដែរ ។ ក៏ដូចជាអូរ៉ាល់សិចដែរ ប្រសិនលើស្បែកមានស្នាមរលាត់របកនោះ វីរុសងាយជ្រៀត ចូលតាមរយៈស្នាមដាច់នោះទៅក្នុងសរីរាង្គ៕ S