ថ្ងៃទី 25 មិថុនា 2012
ដោយ: កូឡាប
CEN
កិច្ចប្រជុំរបស់សាលារាជធានីភ្នំពេញ ស្តីពីឱសថក្លែងក្លាយ និងអន់គុណភាព កំពុងចោទជាបញ្ហាយ៉ាងស្មុគស្មាញដល់ប្រទេសកំពុងអភិវឌ្ឍន៍ ពិសេសប្រទេសកម្ពុជា
ភ្នំពេញ: បច្ចុប្បន្នឱសថក្លែងក្លាយ និងអន់គុណភាព កំពុងចោទជាបញ្ហាយ៉ាងស្មុគស្មាញដល់ប្រទេសកំពុងអភិវឌ្ឍន៍ ពិសេសប្រទេសកម្ពុជា ដែលជារៀងរាល់ឆ្នាំ ថវិកានិងជីវិតមនុស្សជាច្រើនត្រូវបានបាត់បង់ដោយសារឱសថក្លែងក្លាយ អន់គុណភាព និងសេវាសុខាភិបាលខុសច្បាប់។
គេហទំព័រសាលារាជធានីភ្នំពេញ ចេញផ្សាយថ្ងៃទី២៤ខែមិថុនា ឆ្នាំ២០១២ បានលើកឡើងថា ដើម្បីពង្រឹងការគ្រប់គ្រងសេវាឯកជន និងពង្រឹងក្រមសីលធម៌វិជ្ជាជីវៈ ជាគ្រូពេទ្យ ឲ្យមានតម្លាភាព និងប្រសិទ្ធភាព ទាមទារបុគ្គលទាំងនោះមានមនសិការស្វែងយល់ពីច្បាប់ និងតួនាទីរបស់ខ្លួនជាមុនសិន ហើយការអនុវត្តនិតីវិធីច្បាប់គ្រប់គ្រង ការពិន័យ និងការដាក់បន្ថែមទម្ងន់ទោសដល់ជនប្រព្រឹត្តល្មើស ប្រព្រឹត្តខុសក្រមសីលធម៌វិជ្ជាជីវៈ ក៏ជាគន្លឹះនៃការលុបបំបាត់ភាពអសកម្មដែលបានលើកឡើងដ៏មានប្រសិទ្ធផលដែរ។
ទាក់ទងការអនុវត្ត និងវិធានការលុបបំបាត់ភាពអសកម្មខាងលើ នៅសាលារាជធានី ក្នុងនោះមានលោកស្រី ទូច សារ៉ុម អភិបាលរងរាជធានីភ្នំពេញ បានដឹកនាំប្រជុំគណៈកម្មការលុបបំបាត់ឱសថក្លែងក្លាយថ្នាក់រាជធានី ដើម្បីតាមដានសកម្មភាពការងារដែលបានអនុវត្តន៍កន្លងមកជាបន្តបន្ទាប់។ កិច្ចប្រជុំនេះ មានការចូលរួមពីលោកប្រធាន-អនុប្រធានមន្ទីរសុខាភិបាល ប្រធានផ្នែកសេវា សុខាភិបាល ប្រធានការិយាល័យអគ្គកាំកុងត្រូល ព្រះរាជ្ញារងអមសាលាដំបូងរាជធានី និងអាជ្ញាធរពាក់ព័ន្ធ។
គេហទំព័រដដែលបានឲ្យដឹងទៀតថា លោក ចាន់ អាន អនុប្រធានមន្ទីរសុខាភិបាលរាជធានី បានឲ្យដឹងថា បច្ចុប្បន្ននៅរាជធានីភ្នំពេញ មានឱសថស្ថានចំនួន ៤៥៦ កន្លែង ឱសថស្ថានរង “ក” ៥៨ កន្លែង ឱសថស្ថានរង “ខ” ១០០ កន្លែង សរុបទាំងអស់ ៦១៤ កន្លែង ហើយពុំមានឱសថស្ថានណាមួយដែលគ្មានច្បាប់អនុញ្ញាតឡើយ។ នៅក្នុងនោះ មន្ទីរបានអនុវត្តន៍ការងារចុះណែនាំ និងលុបបំបាត់ឱសថស្ថានគ្មានច្បាប់អនុញ្ញាត និងមានការបញ្ឈប់ទីតាំងមួយចំនួនមកហើយ។
ក្នុងឱកាសនោះ លោកស្រីអភិបាលរង ប្រធានអង្គប្រជុំ ស្នើឱ្យមន្ត្រីមន្ទីរជំនាញ សហការជាមួយអាជ្ញាធរ អង្គភាពពាក់ព័ន្ធយកចិត្តទុកដាក់ និងខិតខំបន្ថែមទៀតតាមតួនាទី ការទទួលខុសត្រូវ លើភារកិច្ចដែលបានបែងចែក ដើម្បីធានាឱ្យបានការលុបបំបាត់ទាំងស្រុងនូវការចរាចរឱសថក្លែងក្លាយ ខូចគុណភាព ក៏ដូចជា ផលិតផលគ្រឿងសម្អាងក្លែងក្លាយដែលកំពុងប៉ះពាល់ដល់សុខុមាលភាពប្រជាពលរដ្ឋយើង។ បន្ទាប់មក លោកស្រី បានលើកពីចំណុចសំខាន់ៗមួយចំនួន អំពីភារកិច្ច តួនាទី និងក្រមសីលធម៌ជាគ្រូពេទ្យ លោកស្រីបានបន្តថា វិស័យសុខាភិបាល ដើរតួនាទីយ៉ាងសំខាន់នៅក្នុងសង្គមជាតិ ផ្សារភ្ជាប់នឹងជីវិតរស់នៅរបស់ប្រជាពលរដ្ឋគ្រប់រូប ដោយពុំអាចខ្វះបាន ដូច្នេះគ្រូពេទ្យមិនត្រូវគិតតែពីចំណូល និងផលចំណេញពេកនោះទេ គឺត្រូវគិតពីភារកិច្ចខ្លួនជាអ្នកសង្គ្រោះផង ហើយរាល់ព័ត៌មានរិះគន់ វាជាសញ្ញាណមួយដែលត្រូវយកចិត្តទុកដាក់ ដើម្បីឱ្យស្របនឹងទំនុកចិត្តរបស់ប្រជាពលរដ្ឋ ក៏ដូចជាថ្នាក់ក្រសួង និងប្រមុខដឹកនាំផ្តល់ភារកិច្ចជូន៕ S