ដោយ អ៊ុក សាវបូរី
2012-06-29
វិទ្យុអាស៊ីសេរី
គណៈកម្មាធិការជាតិគ្រប់គ្រងគ្រោះមហន្តរាយឲ្យដឹងថា ក្រសួងធនធានទឹកបានព្យាករថា ឆ្នាំ២០១២ នេះ ទឹកទន្លេមេគង្គ ទន្លេសាប ទន្លេចតុមុខ នឹងឡើងខ្លាំងជាងឆ្នាំ២០១១។
២២-កញ្ញា-២០១១៖ ក្រុមប្រជាពលរដ្ឋមួយចំនួននៅឃុំឃុនរាម ស្រុកបន្ទាយស្រី ខេត្តសៀមរាប ត្រូវជាប់ខ្លួនដោយសារទឹកជំនន់ ហើយនាំគ្នាឡើងទៅលើចុងឈើ។
RFA/Hang Savyouth
គណៈកម្មាធិការជាតិគ្រប់គ្រងគ្រោះមហន្តរាយ អំពាវនាវសុំឲ្យពលរដ្ឋត្រៀមលក្ខណៈការពារទឹកជំនន់ ទោះបីពលរដ្ឋដែលមិនធ្លាប់មានទឹកជន់ចូលភូមិឋានក៏ដោយ។
នាយខុទ្ទកាល័យ និងជាអនុប្រធានព័ត៌មាន និងទំនាក់ទំនងនៃគណៈកម្មាធិការជាតិគ្រប់គ្រងគ្រោះមហន្តរាយ លោក កែវ វី ថ្លែងថា ក្រសួងធនធានទឹកបានព្យាករទឹកជំនន់នៅក្នុងឆ្នាំរោង ថានឹងឡើងខ្ពស់ជាងរាល់ឆ្នាំ៖ «ព្រោះនៅក្នុងឆ្នាំ២០១២ នេះ នឹងមានបញ្ហានេះកើតឡើង ហើយអាចគាត់នឹងចូលរួមសហការជាមួយនឹងអាជ្ញាធរមូលដ្ឋាន និងបុគ្គលិកស្ម័គ្រចិត្តរបស់កាកបាទក្រហម ពេលមានបញ្ហាណាកើតឡើង»។
ពាក់ព័ន្ធនឹងការអំពាវនាវនេះ ប្រជាពលរដ្ឋរស់នៅក្នុងភូមិវាល ឃុំកំពង់រាប ស្រុកកោះសូទិន ខេត្តកំពង់ចាម លោកស្រី អែម ហៀវ បានឲ្យដឹងថា កាលពីឆ្នាំ២០១១ គាត់មានការលំបាកកន្លែងសម្រាប់គោសំរាក ពីព្រោះទឹកឡើងខ្លាំង គោគ្មានកន្លែងដេក។ ប៉ុន្តែឆ្នាំនេះមន្ត្រីគ្រប់គ្រងគ្រោះមហន្តរាយផ្សព្វផ្សាយថា ទឹកនៅក្នុងឆ្នាំរោងនឹងឡើងខ្ពស់ជាងឆ្នាំ២០១១ កម្ពស់កន្លះម៉ែត្រថែមទៀត គាត់បានរៀបចំត្រៀមចាក់ដីសំរាប់ធ្វើទួលឲ្យគោសម្រាក និងត្រៀមចងស្មៅ ចំបើងទុកដាក់ហើយ។ ចំណែកផ្ទះវិញ គាត់ជួលគេលើកខ្ពស់ជាងមុន ១ម៉ែត្រទៀតពីដី។
ឯវិធីការពារជីវិតមនុស្ស គាត់ត្រៀមចានដែក និងធុងជ័រ ព្រមទាំងកិនអង្ករទុកបង្ការក្រែងទឹកចូលមិនបានការពារអាចខ្វះស្បៀង៖ «ខ្ញុំបានលើកទួលគោហើយ នៅស្មៅ… ទិញចំបើងគេមកញាត់ជង្រុកហ្នឹង។ លិចគួរសមដែរឆ្នាំទៅ វាហូរដែរ ប៉ុន្តែថា ទួលគោខ្ញុំអត់បានត្រៀម»។
លោក រៀម កាក់ នៅភូមិនោះដែរ បានឲ្យដឹងថា គាត់បានត្រៀមថវិកាជួលទូកជិះចម្លងសត្វ និងមនុស្ស ប្រសិនបើខែកញ្ញា ខែតុលា ខាងមុខ ទឹកឡើងខ្លាំងមិនអាចទប់ទល់បាន ដើម្បីជម្លៀសទៅរស់នៅភ្នំពាមជាំង ក្បែរស្រុកអូររាំងឪ ឯណោះ។
លោក រៀម កាក់៖ «ត្រៀមលើកទួលលើកអីហើយ ស្មៅអីក៏កំពុងទិញ ចំបើងអីដាក់ត្រៀមហើយ ព្រោះឆ្នាំទៅវាលិចហ្ហែលៗ ឥឡូវលើកជួលគេ ២០ម៉ែត្រហើយ។ តែដល់លិចលង់មុខជារត់ទៅមុខជារត់ទៅភ្នំពាមជាំងនោះហើយ ស្រែស្ពៃនោះ ក្បែរអូររាំងឪ»។
ចំណែកប្រជាពលរដ្ឋរស់នៅក្នុងស្រុកអង្គរបុរី ខេត្តតាកែវ ជាតំបន់ទឹកលិចរាល់ឆ្នាំ លោកស្រី កែវ សុខា អះអាងថា គាត់ត្រៀមរួចហើយ និងបង្ការខ្លាចកូនធ្លាក់ទឹកនៅពេលទឹកឡើងនាខែខាងមុខ៖ «ពេលទឹកជំនន់ ខ្ញុំជីកស្មៅគោឲ្យគោស៊ីឲ្យច្រើន ហើយនឹងប្រមូលរបស់របរទុកឲ្យស្រួលបួល កុំឲ្យទឹកជំនន់ហូររសាត់បាត់អស់»។
របាយការណ៍របស់ក្រសួងកសិកម្ម រុក្ខាប្រមាញ់ និងនេសាទ ឆ្នាំ២០១១ ២០១២ បង្ហាញថា ផ្ទៃដីស្រូវវស្សាដែលទទួលរងនូវគ្រោះទឹកជំនន់មានប្រមាណជាង ៤១ម៉ឺន៦ពាន់ហិកតារ។ ក្នុងនោះស្រូវខូចទាំងស្រុងជាង ២៦ម៉ឺន ៧ពាន់ហិកតារ ហើយផ្ទៃដីដំណាំរួមផ្សំ និងដំណាំកសិ-ឧស្សាហកម្ម ជាង ៣ម៉ឺនហិកតារ បានជន់លិច ក្នុងនោះខូចចំនួន ២២.៩០៣ហិកតារ។ ពិតមែនតែផ្ទៃដីជិត ២៧ម៉ឺនហិកតារបានរងគ្រោះដោយជំនន់ទឹកភ្លៀង និងទឹកទន្លេមេគង្គ តែបរិមាណទិន្នផលស្រូវ នៅតែទទួលបានជាង ៨,៧៧លានតោន និងអាចសល់ស្បៀងជាស្រូវជាង ៤,៣៤លានតោន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
មន្រ្តីខ្មែរពេលនោះបានលាភចូលហោបៅទៀតហើយ លុយជំនួយធ្លាក់ទៀតហើយ ធើ្វតែ40ភាគរយ 60ភាគរយទៀតទុកទិញឡាន និងទិញផ្ទះអោយស្រីស្នេហ៌វិញ អាណាងាប់អីងាប់ទៅ កុំអោយតែងាប់ ក្រុមគ្រួសារអញបានហើយ
មន្ត្រីនៅកម្ពុជាហាក់បីដូចជាគ្មានយកចិត្តទុកដាក់ និង ជីវភាពរបស់ប្រជារាស្រ្តខ្មែរទាល់តែសោះ ទាល់តែនាំគ្នាមកតវ៉ា ទើបនាំគ្នាមកចាត់ចែងរឿងនឹង ខ្មែរដែលនៅតែលំបាក គឺសែនវេទនា ឯអ្នកមានរិតតែមាន នោះសបញ្ជាក់ថា អ្នកណាកើតអីក៏កើតទៅ បើថ្នាក់លើបញ្ជាចាំនាំគ្នាធ្វើ
ខ្ញុំគិតថាប្រជារាស្រ្តខ្មែរបានសុខគ្រប់គ្នាហើយ មួយចំនួនតូចតែប៉ុណ្ណោះដែលជួបភាពលំបាក តែបើថាមន្រ្តីកម្ពុជាមិនយកចិត្តទុកដាក់ និងប្រជារាស្រ្តខ្មែរគ្នាឯងនោះវាហាក់បីដូចជា មិនពិតទាល់ តែសោះ រដ្ឋាភិបាលយើងយកចិត្តទុកដាក់ណាស់ ចំពោះការរស់នៅរបស់ប្រជាជនកម្ពុជា មួយចំនួន
តូចទេដែលខ្វះខាតក្នុងជីវភាព។ (បុរីបឹងកក់) មួយភាគធំបានសំណង តែមួយចំនួនតូចពុំទាន់ បានសំនង