ថ្ងៃទី 29 មិថុនា 2012
ដោយ: ចៅចិត្រ
CEN
ភ្នំពេញ: ក្នុងនាមជាប្រធានអាស៊ាននៅឆ្នាំ២០១២ ព្រះរាជាណាចក្រកម្ពុជា នឹងធ្វើជាម្ចាស់ផ្ទះ នៃកិច្ចប្រជុំរដ្ឋមន្ត្រីការបរទេស អាស៊ានលើកទី ៤៥ កិច្ចប្រជុំជាមួយប្រទេសដៃគូ ក្រោយកិច្ចប្រជុំរដ្ឋមន្ត្រីការបរទេសអាស៊ាន កិច្ចប្រជុំវេទិការអាស៊ានលើកទី១៩ និងកិច្ចប្រជុំរដ្ឋមន្ត្រីការបរទេសលើកទី២ នៃកិច្ចប្រជុំកំពូលអាស៊ីបូព៌ា ដែលនឹងប្រព្រឹត្តទៅថ្ងៃទី៦ ខែកក្កដា ដល់ ថ្ងៃទី១៣ ខែកក្កដា ឆ្នាំ២០១២ នៅរាជធានីភ្នំពេញ។
សេចក្តីជូនព័ត៌មាន របស់ក្រសួងការបរទេស ចុះថ្ងៃទី២៩មិថុនា ឆ្នាំ២០១២ បង្ហាញថា សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នឹងធ្វើជាអធិបតីក្នុងពិធីបើកកិច្ចប្រជុំខាងលើនេះ។ ចំណែកលោកឧបនាយករដ្ឋមន្ត្រី ហោ ណាំហុង រដ្ឋមន្ត្រីការបរទេស និងសហប្រតិបត្តការអន្តរជាតិ នៃព្រះរាជាណាចក្រកម្ពុជា នឹងធ្វើជាប្រធាននៃកិច្ចប្រជុំរដ្ឋមន្ត្រីការបរទេសអាស៊ាន លើកទី៤៥ កិច្ចប្រជុំជាមួយប្រទេសដៃគូ ក្រោយកិច្ចប្រជុំរដ្ឋមន្ត្រីការបរទេសអាស៊ាន កិច្ចប្រជុំវេទិការតំបន់អាស៊ាន លើកទី១៩ និងកិច្ចប្រជុំរដ្ឋមន្ត្រីការបរទេសលើកទី២ នៃកិច្ចប្រជុំកំពូលអាស៊ីបូព៌ា។
សេចក្តីជូនព័ត៌មានដដែល ក៏បានបង្ហាញថា ក្រៅពីកិច្ចប្រជុំខាងលើ ព្រះរាជាណាចក្រកម្ពុជា នឹងធ្វើជាម្ចាស់ផ្ទះផងដែរ នៃកិច្ចប្រជុំថ្នាក់រដ្ឋមន្ត្រីពាក់ព័ន្ធផ្សេងទៀតដូចខាងក្រោម៖
១- កិច្ចប្រជុំរដ្ឋមន្ត្រីការបរទេសអាស៊ាន ជាមួយគណៈកម្មាធិការអន្តររដ្ឋាភិបាលអាស៊ាន ស្តីអំពីតំណាងសិទ្ធិមនុស្ស នៅថ្ងៃទី៨ ខែកក្កដា ឆ្នាំ២០១២។
២- កិច្ចប្រជុំគណៈកម្មការតំបន់អាស៊ីអាគ្នេយ៍ គ្មានអាវុធនុយក្លេអែរ នៅថ្ងៃទី៨ ខែកក្កដា ឆ្នាំ២០១២។
៣- កិច្ចប្រជុំរដ្ឋមន្ត្រីការបរទេសអាស៊ាន+៣ លើកទី១៣ នៅថ្ងៃទី១០ ខែកក្កដា ឆ្នាំ២០១២។
៤- កិច្ចប្រជុំរដ្ឋមន្ត្រីការបរទេសមេគង្គ-ជប៉ុន លើកទី៥ នៅថ្ងៃទី១០ ខែកក្កដា ឆ្នាំ២០១២។
៥- កិច្ចប្រជុំរដ្ឋមន្ត្រីការបរទេសមេគង្គ-សាធារណរដ្ឋកូរ៉េ នៅថ្ងៃទី១០ ខែកក្កដា ឆ្នាំ២០១២។
៦- កិច្ចប្រជុំរដ្ឋមន្ត្រីការបរទេសអាស៊ាន-អូស្ត្រាលី នៅថ្ងៃទី១១ ខែកក្កដា ឆ្នាំ២០១២។
៧- កិច្ចប្រជុំរដ្ឋមន្ត្រីការបរទេសអាស៊ាន-កាណាដា នៅថ្ងៃទី១១ ខែកក្កដា ឆ្នាំ២០១២។
៨- កិច្ចប្រជុំរដ្ឋមន្ត្រីការបរទេសអាស៊ាន-សាធារណរដ្ឋប្រជាមានិតចិន នៅថ្ងៃទី១១ ខែកក្កដា ឆ្នាំ២០១២។
៩- កិច្ចប្រជុំរដ្ឋមន្ត្រីការបរទេសអាស៊ាន សហភាពអឺរ៉ុប នៅថ្ងៃទី១១ ខែកក្កដា ឆ្នាំ២០១២។
១០- កិច្ចប្រជុំរដ្ឋមន្ត្រីការបរទេសអាស៊ាន ជប៉ុន នៅថ្ងៃទី១១ ខែកក្កដា ឆ្នាំ២០១២។
១១- កិច្ចប្រជុំរដ្ឋមន្ត្រីការបរទេសអាស៊ាន ឥណ្ឌា នៅថ្ងៃទី១១ ខែកក្កដា ឆ្នាំ២០១២។
១២- កិច្ចប្រជុំរដ្ឋមន្ត្រីការបរទេសអាស៊ាន នូវ៉ែលហ្សេឡង់ នៅថ្ងៃទី១១ ខែកក្កដា ឆ្នាំ២០១២។
១៣- កិច្ចប្រជុំរដ្ឋមន្ត្រីការបរទេសអាស៊ាន សាធារណរដ្ឋកូរ៉េ នៅថ្ងៃទី១១ ខែកក្កដា ឆ្នាំ២០១២។
១៤- កិច្ចប្រជុំរដ្ឋមន្ត្រីការបរទេសអាស៊ាន រុស្ស៊ី នៅថ្ងៃទី១១ ខែកក្កដា ឆ្នាំ២០១២។
១៥- កិច្ចប្រជុំរដ្ឋមន្ត្រីការបរទេសអាស៊ាន សហរដ្ឋអាមេរិក នៅថ្ងៃទី១១ ខែកក្កដា ឆ្នាំ២០១២។
ក្នុងអំឡុងកិច្ចប្រជុំខាងលើ ឯកសារសំខាន់ៗមួយចំនួន នឹងត្រូវចុះហត្ថលេខា ដោយរដ្ឋមន្ត្រីការបរទេសអាស៊ាន និងរដ្ឋមន្ត្រីការបរទេសនៃប្រទេសដៃគូសន្ទនា៖
១- សេចក្តីប្រកាសស្តីពីពិធីសាលើសន្ធិសញ្ញា នៃតំបន់អាស៊ីអាគ្នេយ៍គ្មានអាវុធនុយក្លេអ៊ែរ ដោយរដ្ឋមន្ត្រីការបរទេសអាស៊ាន នៅថ្ងៃទី៩ ខែកក្កដា ឆ្នាំ២០១២។
២- អនុស្សារណៈនៃការយោគយល់គ្នារវាងអាស៊ាន និងចិន លើសន្ធិសញ្ញា ស្តីពី តំបន់អាស៊ីអាគ្នេយ៍គ្មានអាវុធនុយក្លេអ៊ែរ ស្តីពីសន្ធិសញ្ញា និងពិធីសារនៅថ្ងៃទី១០ ខែកក្កដា ឆ្នាំ២០១២។
៣- ពិធីសារលើសន្ធិសញ្ញាស្តីពីតំបន់អាស៊ីអាគ្នេយ៍គ្មានអាវុធនុយក្លេអ៊ែរ ដោយប្រទេសមហាងំណាចទាំង៥ នៅថ្ងៃទី១២ ខែកក្កដា ឆ្នាំ២០១២។
៤- លិខិតតុបករណ៍នៃការចូលជាភាគីរបស់សហភាពអឺរ៉ុប និងលិខិតតុបករណ៍នៃការបន្តលើសន្ធិសញ្ញា នៃមិត្តភាពនិងសហប្រតិបត្តិការនៅអាស៊ីអាគ្នេយ៍។
៥- លិខិតតុបករណ៍ នៃការចូលជាភាគីរបស់ចក្រក្រភពអង់គ្លេស និងលិខិតតុបករណ៍នៃការបន្តលើសន្ធិសញ្ញា នៃមិត្តភាព និងសហប្រតិបត្តិការនៅអាស៊ីអាគ្នេយ៍៕