ថ្ងៃទី 15 កក្កដា 2012
ដោយ: លីនណា
CEN
ភ្នំពេញ: ថ្នាក់ដឹកនាំគណបក្សប្រឆាំងសម រង្ស៊ី និងគណបក្សសិទ្ធិមនុស្ស នៅថ្ងៃទី១៥ ខែកក្កដា ឆ្នាំ២០១២ នឹងធ្វើដំណើរចាកចេញពីប្រទេសកម្ពុជា ទៅកាន់ទីក្រុងម៉ានីល ប្រទេសហ្វីលីពីន ដើម្បីធ្វើការចរចាគ្នាអំពីការបង្រួបបង្រួមគណបក្សប្រឆាំងនៅកម្ពុជា សម្រាប់ចូលរួមការបោះឆ្នោតជ្រើសតាំងតំណាងរាស្ត្រ អាណត្តិទី៥ ឆ្នាំ២០១៣។
លោក កឹម សុខា ប្រធានគណបក្សសិទ្ធិមនុស្ស បានមានប្រសាសន៍ថា ក្រុមការងាររបស់គណបក្សសិទ្ធិមនុស្ស នឹងធ្វើដំណើរទៅកាន់ប្រទេសហ្វីលីពីន នៅថ្ងៃទី១៥ ខែកក្កដា ឆ្នាំ២០១២ ដើម្បីជួបពិភាក្សាជាមួយខាងគណបក្សសម រង្ស៊ី។ សម្រាប់សមាសភាពដែលទៅចូលរួមមាន លោក ប៉ុល ហំម និងលោក យ៉ែម បុញ្ញឫទ្ធិ។
លោក កឹម សុខា បានបន្តថា របៀបវារៈ នៃកិច្ចប្រជុំពិភាក្សាជាមួយគណបក្សសម រង្ស៊ី គឺផ្តោតទៅលើការបង្រួបបង្រួមរវាងគណបក្សទាំងពីរ។
លោក កឹម សុខា បានបញ្ជាក់ថា “ការរួបរួមនេះ គឺជាការទាមទារចង់បានរបស់ប្រជាពលរដ្ឋខ្មែរ អ្នកស្នេហាជាតិ អ្នកស្រឡាញ់លទ្ធិប្រជាធិបតេយ្យ និងអ្នកដែលចង់ប្តូរអ្នកដឹកនាំបច្ចុប្បន្ន គឺចង់ឲ្យយើងរួបរួមគ្នា”។
ជាមួយគ្នានេះដែរ ប្រធានស្តីទីគណបក្សសម រង្ស៊ី លោក គង់ គាំ បានមានប្រសាសន៍ឲ្យដឹងថា ក្រុមការងារគណបក្សសម រង្ស៊ី នឹងធ្វើដំណើរចាកចេញពីកម្ពុជា ទៅកាន់ប្រទេសហ្វីលីពីន នៅថ្ងៃទី១៥ ខែកក្កដា ឆ្នាំ២០១២។ ចំណែកសមាភាពដែលទៅ រួមមាន៖ រូបលោក លោកសុន ឆ័យ លោកស្រី មូរ សុខហួរ លោក យឹម សុវណ្ណ និងលោក អេង ឆៃអ៊ាង។
លោក គង់ គាំ បានមានប្រសាសន៍បន្តថា “សម្រាប់របៀបវារៈ នៅក្នុងការពិភាក្សាជាមួយគណបក្សសិទ្ធិមនុស្ស គឺពិគ្រោះគ្នា ដើម្បីឲ្យមានការរួបរួមយកជ័យជំនះ នៅឆ្នាំ២០១៣ ឲ្យមានការផ្លាស់ប្តូរ”។
លោកប្រធានស្ដីទីបន្តថា មុននឹងឈានចូលដល់ការជួបពិភាក្សាជាមួយខាងក្រុមការងារគណបក្សសិទ្ធិមនុស្ស គឺក្រុមការងាររបស់គណបក្សសមរង្ស៊ី នឹងជួបពិភាក្សាជាមួយលោកសម រង្ស៊ី នៅថ្ងៃទី១៦ ខែកក្កដា ឆ្នាំ២០១២ នៅទីក្រុងម៉ានីល។ បន្ទាប់មក ថ្នាក់ដឹកនាំគណបក្សសមរង្ស៊ី រួមទាំងលោកសមរង្ស៊ី នឹងជួបជាមួយក្រុមការងារខាងគណបក្សសិទ្ធិមនុស្ស នៅថ្ងៃទី១៧ ខែក្កដា ឆ្នាំ២០១២។
ដោយសារតែលោកសមរង្ស៊ី ជាប់ទោស មិនអាចវិលត្រឡប់ មកកាន់កម្ពុជាវិញបាន ទើបថ្នាក់ដឹកនាំគណបក្សសមរង្ស៊ី និងគណបក្សសិទ្ធិមនុស្ស ត្រូវទៅជួបប្រជុំគ្នា នៅប្រទេសហ្វីលីពីន ដើម្បីនិយាយពីការរួបរួមឡើងវិញ។
ជាការកត់សម្គាល់ គណបក្សសមរង្ស៊ី និងគណបក្សសិទ្ធិមនុស្ស បានចុះហត្ថលេខាព្រមព្រៀងគ្នាម្តងមកហើយ កាលពីថ្ងៃទី១៥មករា ឆ្នាំ២០០៩ ក្រោយពីការបោះឆ្នោតជាតិឆ្នាំ២០០៨។ ក៏ប៉ុន្តែសម្ព័ន្ធភាពអ្នកប្រជាធិបតេយ្យ ត្រូវបានរលាយទៅវិញ នៅរយៈពេលជាង ១ ឆ្នាំ ក្រោយពីការចរចារវាងក្រុមការងារទាំងពីរ មិនត្រូវរ៉ូវគ្នា។
នោះគឺគណបក្សសមរង្ស៊ី មិនទុកចិត្តលើគណបក្សសិទ្ធិមនុស្សរបស់លោកកឹមសុខា ដោយសង្ស័យថា លោកកឹមសុខា ជាកូនជឹងរបស់សម្តេចនាយករដ្ឋមន្ត្រី ហ៊ុន សែន ហើយចូលទៅកកូរកកាយគណបក្សសមរង្ស៊ី ដោយប្រែក្លាយការរួបរួមនោះ ទៅជាការបំបែក និងរំលាយគណបក្សសមរង្ស៊ី។ មូលហេតុមកពីលក្ខខណ្ឌរួបរួមរបស់លោកកឹមសុខា ត្រូវបានកំណត់ឲ្យមានការប្តូរឈ្មោះគណបក្សសមរង្ស៊ី និងកំណត់អាណត្តិប្រធាន តែពីរអាណត្តិ ក្នុងរយៈពេល ១០ ឆ្នាំ ជាដើម។
ក៏ប៉ុន្តែសម្រាប់ការវិលទៅចូលរួមតុចរចាឡើងវិញនាពេលនេះ ដោយសារតែលទ្ធផលនៃការបោះឆ្នោតរបស់គណបក្សប្រឆាំងទាំងពីរ គឺគណបក្សសិទ្ធិមនុស្សរបស់លោកកឹមសុខា ទទួលបានសំឡេងឆ្នោត ដោយជាប់ជាមេឃុំចំនួន ១៨ ឃុំ។ រីឯគណបក្សសមរង្ស៊ី បានធ្លាក់ចុះសំឡេងគាំទ្រក្នុងការបោះឆ្នោតឃុំសង្កាត់៕
ខ្ញុំឆ្ងល់ ថាគេបាះឆ្នោតយ៉ាងម៉េចបើអាប៊ីតនិងកីឡាករគឺក្រុមតែ១….??
រួបរួមគ្នា ជាម៌ាគា នាំនាវា កម្ពុជា ឆ្ពោះត្រើយសុខ៕
ទោះជារួមគ្នាក៏សម រង្សី អត់បានមអីដែរ គឺកឹម សុខាមេបោកដែលបានចំណេញច្រើន។ តែរួមគ្នា ទៅ លះបង់ដើម្បីជាតិមិនអីចឹងពួកយើងជាអ្នកប្រឆាំងផ្កាប់ឆ្នាំង។ទោះចាំជាតិក្រោយក៏មិនទាន់ហួសពេល ដែរ។
បើទស្សនិកជនយល់ថា អាជ្ញាកណ្តាលមានភាពលំអៀងលើក្រុមកីឡាករណាមួយនោះ មេក្រុមកីឡាករម្ខាងទៀត អាចមានដំណោះស្រាយច្រើនយា៉ង ដូចជាស្នើដល់គណៈកម្មការកីឡាអូឡាំពិកអន្តរជាតិ ជួយ៖
១- កែគោលការណ៍ដើម្បីតំរង់ទិស អាជ្ញាកណ្តាលអោយអនុវត្តទៅតាមគោលការណ៍ ឬ
២- ជ្រើសរើស អាជ្ញាកណ្តាលថ្មី ឬ
៣- បញ្ជូនអាជ្ញាកណ្តាលនោះទៅវិនិច្ឆ័យកំហុសដោយ គណៈកម្មការកីឡាអូឡាំពិកអន្តរជាតិ
៤-……. ។ល។
ពួកអាយ៉ងវាខ្លាចណាស់ បើអ្នកស្នេហាជាតិរួមគ្នា កុំថាពួកវាមិនបារម្មណ៍ អញ្ចឹងហើយបានជាពួកវាតែងតែរិះរកគ្រប់មធ្យោបាយដើម្បីបំបែក ដូច្នេះសូមមេបក្សទាំងពីរត្រូវប្រុងប្រយ័ត្តអោយមែនទែន ពួកអាគុម្មុយនិស្ដផ្ដាច់ការវាមានល្បិចច្រើនណាស់។
បើសិនជាថែមបក្សប្រឆាំងពីទៀតនោះ ប្រហែលជាបានត្រឹមស្មើរបក្សកាន់អំណាច។ បក្សប្រឆាំងអាចទៅរួច បុ៉ន្តែប្រហែលជាត្រ្ូវប្រើពេលយូរ ប្រហែលជាទឹកទីប្រាំ ព្រោះស្តេចប្រដាល់តេជោមិនបោះបង់កាប្រគួត ដោយមិនប្រើក្បាច់ពិសេសៗទេ។ នេះជាគូរពិសេសអ្នកឈ្នះបានកៅអី ដុល្លារនិងអំណាច អ្នកចាញ់បាត់ទាំងអស់ ។
រីករាយណាស់ នៅពេលឃើញអ្នកប្រជាធិបត្តេយ្យរួបរួមគ្នា តែសូមកុំក្បត់គ្នា។
ខ្ញុំចង់អោយការចរចារដំនើរការណ៍ទៅ ដោយទទួលបានលទ្ធផលវិជ្ជមាន គឺការរួបរួមគ្នា ដើម្បីលទ្ធិប្រជាធិបតេយ្យពិតប្រាកដនៅកម្ពុជា
គួរអោយអាណិតម៉ម សូណង់ដូដែរ ដែលពេលវេលាចុងក្រោយនៃជីវិតមិនគួរមានរឿងដូច្នេះសោះ តាមពិតយើងជាខ្មែរយើងមិនចង់អោយអ្នកណាម្នាក់ពាក់ព័ន្ធនិងរឿងគុកច្រវ៉ាក់ទេ យើងគួរតែរស់ នៅយ៉ាងសុខសាន្តតែផ្ទុយទៅវិញនេះគឺជា មនោគមន៏វិជ្ជាដែលគេម្នាក់ៗ ទទួលបានហើយយកមកស្ល បំពុល ពង្វក់ខ្មែរ អោយឡប់ទៅតាមអ្វីដែលគេចង់បាន។
ខ្មែរមួយចំនួនតូចពេលបានរត់ទៅរស់នៅប្រទេសក្រៅបានទទួលការចេះដឹងបន្តិចបន្តួចពីលោក ខាងលិច គួបផ្សំនិងការបានវោហាសាសន៏ បានតាំងខ្លួនជាមនុស្សចេះដឹង គ្រប់សព្វពីប្រជាធិបតេយ្យហើយយក់មកពង្វក់ខ្មែរនៅក្នុងស្រុក តែទីបញ្ចប់លទ្ធផលបានបង្ហាញ ស្រាប់ខ្លះចាប់គុក ខ្លះរត់ចោលស្រុក យ៉ាងវេទនាបំផុត តែនេះជាអ្វីដែលគេជ្រើសរើស ផ្លូវសំរាប់គេដែលគេត្រូវដើរ។ប្រទេសកម្ពុជា,ប្រជាជនកម្ពុជាបច្ចុប្បន្នមានសុខសន្តិភាពគ្រប់គ្រាន់ហើយ ថ្វីត្បិត មានបញ្ហាមួយចំនួនកំពុងកើតមាននៅក្នុងសង្គម តែប្រមុខរដ្ធាភិបាល ,រដ្ថាភិបាលកំពុងតែដោះស្រាយ យ៉ាងខ្លាំងក្លា។ល្មមហើយអ្នកប្រឆាំងទាំងឡាយ អើយ, តែពុំមានគ្រូអាចារ្យ ណាប្រដៅពួកគេបានឡើយសូមពួកគេបន្តបេសកកម្មគេបន្តទៀតចុះរហូត បានជោគជ័យ។សូមព្រះប្រទានពរ។