ថ្ងៃទី 20 កក្កដា 2012
ដោយ: ឆាយា
CEN
ភ្នំពេញ: ករណីបណ្តឹងរបស់លោក ញ៉ឹក ប៊ុនឆៃ ចៅក្រមស៊ើបសួរសាលាដំបូងរាជធានីភ្នំពេញ នឹងចេញដីកាបង្គាប់ម្តងទៀតឱ្យនាយកវិទ្យុអេហ្វអឹម ៩០ មេហ្គាហឺត ចូលមកតុលាការ ដើម្បីសាកសួរពីដំណើររឿងដែលត្រូវចោទប្រកាន់ពីបទរំលោភលើទំនុកចិត្ត ដោយយោងតាមពាក្យបណ្តឹងរបស់លោក ញ៉ឹក ប៊ុនឆៃ ប្រធានប្រតិបត្តិគណបក្សហ្វ៊ុនស៊ិនប៉ិច។
ការចេញដីកាបង្គាប់ឱ្យចូលខ្លួនម្តងទៀតនេះ បានធ្វើឡើងក្រោយពេលដែលតុលាការបានចេញដីកាបង្គាប់ពីរលើករួចមកហើយ តែនាយកវិទ្យុរូបនេះ មិនឃើញចូលខ្លួននោះទេ ដោយសំអាងថាពុំដែលបានទទួលដីកាម្តងណាឡើយ។
ចំណែកបុគ្គលិកស្រីម្នាក់ទៀត ដែលរងនូវការចោទប្រកាន់ដែរនោះ បានចូលមកបំភ្លឺរួចហើយ កាលពីថ្ងៃទី១៧ ខែកក្កដា ឆ្នាំ២០១២ កន្លងទៅ ដោយចៅក្រមស៊ើបសួរបានសម្រេចមិនឃុំខ្លួន តែដាក់ឱ្យស្ថិតក្រោមការត្រួតពិនិត្យតាមផ្លូវតុលាការ រួចអនុញ្ញាតឱ្យវិលត្រឡប់ទៅវិញ។
ក្នុងពាក្យបណ្តឹង ចុះថ្ងៃទី៦ ខែមករា ឆ្នាំ២០១២ ដែលមានកម្មវត្ថុប្តឹងលោក ញ៉ែម សុផាន់ណា អាយុ ៤៨ឆ្នាំ មុខរបរនាយកវិទ្យុអេហ្វអឹម ៩០ មេហ្គាហឺត ទីលំនៅសព្វថ្ងៃផ្ទះលេខ ៣៩AE0 ផ្លូវលេខ២៥៧ សង្កាត់ទឹកល្អក់ទី៣ ខណ្ឌទួលគោក រាជធានីភ្នំពេញ និងបុគ្គលិកស្រីម្នាក់ទៀតនោះ លោក ញ៉ឹក ប៊ុនឆៃ ក្នុងនាមប្រធានប្រតិបត្តិគណបក្សហ្វ៊ុនស៊ីនប៉ិច បានបញ្ជាក់ថា ពួកគេទាំងពីរបានឃុបឃិតគ្នាធ្វើសកម្មភាពកិបកេងលួចបន្លំយកថវិកា និងសម្ភារៈរបស់ក្រុមហ៊ុន ឃ្លាំងមឿងម៉ាល់ធីមេឌា អេនត្រេចខបភើរេស៊ីន KMAT តាំងពីអំឡុងខែកញ្ញា ឆ្នាំ២០០៨ មកម្ល៉េះ ដោយប្រើរូបភាពរាយការណ៍ភូតកុហកអំពីប្រាក់ចំណូល និងយកទីតាំងស្ថានីយវិទ្យុមួយចំនួនទៅគ្រប់គ្រងខ្លួនឯង ក្នុងនាមក្រុមហ៊ុន សុផាន់ណា មេឌា អេនអេតវើថាយស៊ីង វិញ។
ពាក្យបណ្តឹងដដែលនេះ បានសំណូមពរសុំឱ្យតុលាការចាប់ខ្លួនពួកគេយកមកផ្តន្ទាទោសតាមច្បាប់ និងទាមទារសំណងចំនួន ៤០ ម៉ឺនដុល្លារអាមេរិក និងជំងឺចិត្ត ១០ ម៉ឺនដុល្លារអាមេរិក។
ចំពោះការចោទប្រកាន់តាមពាក្យបណ្តឹងនេះ បានត្រូវលោក ញ៉ែម សុផាន់ណា បដិសេធចោល ដោយបានពោលអះអាងថា លោក ញ៉ឹក ប៊ុនឆៃ ពុំមានលក្ខណសម្បត្តិគ្រប់គ្រាន់តាំងខ្លួនជាដើមបណ្តឹងទេ ពោលគឺមានតែលោកស្រី សម សុភាព ជាភរិយាលោក ញ៉ឹក ប៊ុនឆៃ ប៉ុណ្ណោះ។
ក្នុងនោះ លោក ញ៉ែម សុផាន់ណា បានបញ្ជាក់ថា ក្រុមហ៊ុនឆព្វណ្ណរាជសីហ៍ ក្រុមហ៊ុនឃ្លាំងមឿងមេឌាគ្រុប ក្រោយមកប្តូរនាមករណ៍មកជាក្រុមហ៊ុន សុផាន់ណា មេឌា អេនអេតវើថាយស៊ីង និងក្រុមហ៊ុនឃ្លាំងមឿង ម៉ាល់ធី មេឌា អេនអេតវើថាយស៊ីន មាននីតិបុគ្គលដាច់ដោយឡែកពីគ្នាតាមផ្លូវច្បាប់ ពោលគឺពុំមានក្រុមហ៊ុនណាមួយ កែពីមួយទៅមួយទៀតនោះទេ។
ទោះជាលោក ញ៉ែម សុផាន់ណា បានដាក់ពាក្យចូលបំភ្លឺរួចហើយក៏ដោយចុះ ក៏លោកស្រី ស៊ឺ វណ្ណនី ព្រះរាជអាជ្ញារងអមសាលាដំបូងរាជធានីភ្នំពេញ បានសម្រេចចោទប្រកាន់លោក ញ៉ែម សុផាន់ណា និងបុគ្គលិកស្រីម្នាក់ទៀតពីបទរំលោភលើទំនុកចិត្ត រួចបញ្ជូនសំណុំរឿងនេះឱ្យចៅក្រមស៊ើបសួរចាត់ការបន្តតាមនីតិវិធី៕ S