ថ្ងៃទី 20 កក្កដា 2012
ដោយ: បាយ័ន
CEN
យុវជនស្ម័គ្រចិត្តចុះធ្វើសលាកបត្រព័ត៌មាន ជូនប្រជាពលរដ្ឋនៅស្រុកបន្ទាយអម្ពិល
ឧត្តរមានជ័យ: លោក គីម ប៊ុនថាន នាយករងខុទ្ទកាល័យសម្តេចអគ្គមហាសេនាបតីតេជោ ហ៊ុន សែន នៅថ្ងៃទី១៩ ខែកក្កដា ឆ្នាំ២០១២ បានចុះពិនិត្យសកម្មភាពរបស់យុវជនស្ម័គ្រចិត្ត ធ្វើសលាកបត្រព័ត៌មានជូនប្រជាពលរដ្ឋនៅស្រុកបន្ទាយអម្ពិល ខេត្តឧត្តរមានជ័យ។
លោក ហាំង ម៉េង អភិបាលស្រុកបន្ទាយអម្ពិល បានរាយការណ៍ឲ្យដឹងថា ផលប៉ះពាល់ដីប្រជាពលរដ្ឋនៅក្នុងស្រុកបន្ទាយអម្ពិលសរុប ២.១៣៧ហិកតា ស្មើនឹង១.៧៣៧គ្រួសារ។ ចាប់ពីក្រុមការងារចម្រុះបើកយុទ្ធនាការចុះធ្វើការវាស់វែងដីធ្លីជូនប្រជាពលរដ្ឋ រហូតមកដល់ពេលនេះ ក្នុងស្រុកបន្ទាយអម្ពិលទាំងមូលបានចុះឈូសឆាយធ្វើផ្លូវមេបែងចែកដីឡូត៍ដែលមានក្បាលដីប្រវែង៤០ម៉ែត្រ និងជម្រៅ២៥០ម៉ែត្រស្មើនឹង ១ហិកតា ក្នុង១គ្រួសារ និងធ្វើការចាប់ឆ្នោតប្រគល់ជូនពួកគាត់បានប្រមាណជិត៩០%ហើយ ហើយនៅពេលថ្មីៗនេះទៀតក្រុមយុវជនស្ម័គ្រចិត្តរបស់សម្តេចតេជោ ហ៊ុន សែន បានសហការជាមួយក្រុមការងារចម្រុះ និងអាជ្ញាធរស្រុកបន្ទាយអម្ពិលចុះធ្វើសលាកបត្រព័ត៌មានជូនប្រជាពលរដ្ឋបន្ថែមទៀតសម្រាប់ប្តូរយកប្លង់កម្មសិទ្ធិស្របច្បាប់នៅពេលក្រោយ។
លោក គីម ប៊ុនថាន បានគូសបញ្ជាក់ថា ប្រជាពលរដ្ឋគ្រប់ក្រុមគ្រួសារ ក្រោយពេលទទួលបានប្លង់កម្មសិទ្ធិស្របច្បាប់ហើយ ត្រូវយកចិត្តទុកដាក់ក្នុងការរុករានដីដើម្បីសាងសង់លំនៅដា្ឋន និងបង្កបង្កើនផលឲ្យអស់ផ្ទៃដីដែលខ្លួនបានទទួល ហើយរាជរដ្ឋាភិបាលសន្យាថានឹងជួយកសាងនូវរាល់ហេដ្ឋារចនាសម្ព័ន្ធនានា ដូចជា ផ្លូវគមនាគមន៍ សាលារៀន និងមណ្ឌលសុខភាពជាដើម។
លោក គីម ប៊ុនថាន បានកោតសរសើរដល់ក្រុមការងារចម្រុះស្រុកបន្ទាយអម្ពិល ជាពិសេសក្រុមយុវជនស្ម័គ្រចិត្តសម្តេចជោ ហ៊ុន សែន បានចំណាយពេលវេលាពីការសិក្សាចុះវាស់វែងដីធ្លីជូនប្រជាពលរដ្ឋក្នុងគោលដៅរួមចំណែកបំពេញកាតព្វកិច្ចជូនជាតិ និងមាតុភូមិ។
ជាមួយគ្នានេះផងដែរ លោក គីម ប៊ុនថាន បានផ្តល់ជូននូវម៉ាស៊ីនហ្វូតូកូពី ១គ្រឿង ដែលជាអំណោយរបស់លោក គន់ គីម ប្រធានក្រុមទីប្រឹក្សាសម្តេចអគ្គមហាសេនាបតីតេជោ ហ៊ុន សែន ដល់អាជ្ញាធរស្រុកបន្ទាយអម្ពិល សម្រាប់បង្កលក្ខណៈដល់ការងាររបស់ក្រុមយុវជនស្ម័គ្រចិត្តសម្តេចតេជោផងដែរ៕ S