ប្រទេសកម្ពុជា កំពុងរៀបចំបង្កើតគម្រោងផែនការប្លង់មេសម្រាប់ការអភិវឌ្ឍលើបញ្ហាវិទ្យាសាស្ត្រ និងបច្ចេកវិទ្យាទំនើប។
ដោយ សេក បណ្ឌិត
2012-07-31
វិទ្យុអាស៊ីសេរី
លោក ឆាយ ថន ទេសរដ្ឋមន្ត្រី និងជារដ្ឋមន្ត្រីក្រសួងផែនការ ថ្លែងក្នុងឱកាសបើកសិក្ខាសាលានៅថ្ងៃទី៣១ កក្កដា អំពីផែនការអភិវឌ្ឍន៍លើវិស័យបច្ចេកវិទ្យា និងវិទ្យាសាស្ត្រទំនើប។
RFA/Sek Bandith
ការចាប់ផ្ដើមបង្កើតគម្រោងផែនការប្លង់មេនេះ ដើម្បីជំរុញឲ្យមានផលិតភាព និងគុណភាពនៃផលិតផលខ្ពស់ក្នុងវិស័យនីមួយៗនៅកម្ពុជា និងឲ្យស្របទៅតាមយុគសម័យជឿនលឿននៃបច្ចេកវិទ្យាទំនើបនៅលើពិភពលោក។
ទីភ្នាក់ងារសហប្រតិបត្តិការអន្តរជាតិ (KOICA) វិទ្យាស្ថានផែនការ និងវាយតម្លៃវិទ្យាសាស្ត្រ និងបច្ចេកវិទ្យានៃសាធារណរដ្ឋកូរ៉េ (KISTEP) បានផ្ដល់ទឹកប្រាក់ប្រមាណជាង ៣លានដុល្លារ ក្នុងការជួយរៀបចំបង្កើតគម្រោងផែនការប្លង់មេ សម្រាប់វិទ្យាសាស្ត្រ និងបច្ចេកវិទ្យាទំនើបនៅកម្ពុជា។
គម្រោងនេះភាគីទាំងពីរ (កម្ពុជា-កូរ៉េ) បានសិក្សារួមគ្នាជាជំហានដំបូងនៅឆ្នាំ២០១១ រហូតមកដល់ថ្ងៃទី៣១ កក្កដា ឆ្នាំ២០១២ ទើបក្រសួងផែនការបើកសិក្ខាសាលាពិគ្រោះយោបល់ថ្នាក់ជាតិលើកទីមួយ ដើម្បីបង្ហាញពីលទ្ធផលនៃការសិក្សា និងបង្ហាញពីគោលបំណងមួយច្បាស់លាស់ដល់ស្ថាប័នពាក់ព័ន្ធ ស្ដីពីការបង្កើតគម្រោងផែនការប្លង់មេសម្រាប់ការប្រើប្រាស់វិទ្យាសាស្រ្ត និងបច្ចេកវិទ្យាទំនើបនេះ។
លោក ឆាយ ថន ទេសរដ្ឋមន្រ្តី និងជារដ្ឋមន្ត្រីក្រសួងផែនការ មានប្រសាសន៍ក្នុងឱកាសបើកសិក្ខាសាលានៅថ្ងៃទី៣១ កក្កដា ថា កម្ពុជាត្រូវការជាចាំបាច់នូវការអភិវឌ្ឍលើវិស័យបច្ចេកវិទ្យា និងវិទ្យាសាស្ត្រទំនើប ដើម្បីឲ្យស្របទៅនឹងប្រព័ន្ធបច្ចេកវិទ្យានៃប្រទេសជាច្រើននៅពិភពលោក ជាពិសេសប្រទេសនៅក្នុងតំបន់។
លោកបន្តថា វិស័យជាច្រើននៅកម្ពុជា ដែលត្រូវការវិទ្យាសាស្ត្រ និងបច្ចេកវិទ្យាទំនើបជាចាំបាច់នោះ មានដូចជាវិស័យកសិកម្ម ឧស្សាហកម្មជាបឋម និងប្រព័ន្ធបច្ចេកវិទ្យាកុំព្យូទ័រ (Computer) ឬសេវាកម្មជាដើម ដើម្បីលើកស្ទួយ និងបង្កើនជីវភាពប្រជាពលរដ្ឋ និងមានលទ្ធភាពប្រកួតប្រជែងផ្នែកសេដ្ឋកិច្ចជាមួយប្រទេសដទៃ។
ទាក់ទងបញ្ហានេះដែរ បណ្ឌិត លីចម ស៊ីក (Lee Jeom Sig) អ្នកស្រាវជ្រាវនៃសាកលវិទ្យាល័យមួយក្នុងប្រទេសកូរ៉េ បានធ្វើបទបង្ហាញថា កសិកម្មជាវិស័យមួយសំខាន់ក្នុងការទ្រទ្រង់ស្បៀងសម្រាប់ប្រទេសនីមួយៗ ប៉ុន្តែវិស័យនេះក៏ត្រូវការចាំបាច់នូវវិទ្យាសាស្ត្រ និងបច្ចេកវិទ្យា ដើម្បីផ្សារភ្ជាប់ទៅនឹងវិស័យផ្សេងៗទៀត ដូចជាបរិស្ថាន និងឧស្សាហកម្មជាដើម។
ប្រធានមន្ទីរផែនការខេត្តព្រៃវែង លោក សំរិទ្ធ មករា ដែលបានចូលរួមក្នុងសិក្ខានេះដែរ មានប្រសាសន៍ថា នៅពេលកម្ពុជា មានប្រព័ន្ធវិទ្យាសាស្ត្រ និងបច្ចេកវិទ្យាមួយទំនើបច្បាស់លាស់នោះ លោកជឿថា គ្រប់វិស័យទាំងអស់នឹងមានការរីកចំរើនជាងពេលបច្ចុប្បន្ន។
ការបង្កើតគម្រោងផែនការប្លង់មេលើផ្នែកវិទ្យាសាស្រ្ត និងបច្ចេកវិទ្យាទំនើបនេះ នឹងចាប់ផ្ដើមជាផ្លូវការពីឆ្នាំ២០១៤ ដល់ឆ្នាំ២០២០។ ប៉ុន្តែមុននេះ អ្នកជំនាញត្រូវការរយៈពេលសិក្សាប្រមាណ ៣ឆ្នាំដើម្បីរៀបចំនូវគ្រោងឆ្អឹងនៃផែនការប្លង់មេនេះ ដោយគេបានសិក្សាបណ្ដើរមកហើយតាំងពីឆ្នាំ២០១១ នៅប្រទេសកូរ៉េ និងនៅកម្ពុជា ចាប់ផ្ដើមពីឆ្នាំ២០១២ ដល់ឆ្នាំ២០១៤៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។