ភ្នំពេញ: លិខិតមួយច្បាប់ ដែលចេញដោយរដ្ឋមន្ត្រីក្រសួងឧស្សាហកម្ម រ៉ែ និងថាមពល ដើម្បីជម្រាបជូនទៅលោកប្រធានសហជីពសេរីកម្មករ ក្នុងការធ្វើអន្តរាគមន៍ ដោះស្រាយផ្តល់ប្រាក់អត្ថប្រយោជន៍ផ្សេងៗ ដល់អតីតកម្មកររដ្ឋចាស់ចំនួន ១៩ នាក់ នៅរោងចក្រ Manhattan Textile and Garment Corp ដែលបានឈប់សម្រាកពីការងារ។
ថ្ងៃទី 2 សីហា 2012
ដោយ: ចៅចិត្រ
CEN
ដោយយោងតាមកិច្ចព្រមព្រៀងជួលរោងចក្រតម្បាញកំពង់ចាម ចុះថ្ងៃទី៩ ខែកុម្ភៈ ឆ្នាំ១៩៩៩ រវាងក្រសួងឧស្សាហកម្មរ៉ែ និងថាមពល និងក្រុមហ៊ុន Manhattan Textile and Garment Corp។
នៅក្នុងលិខិតនោះ លោករដ្ឋមន្ត្រី ក្រសួងឧស្សាហកម្មរ៉ែ និងថាមពល បានជម្រាបទៅលោកប្រធានសហជីពសេរីកម្មករថា តាមកិច្ចព្រមព្រៀង ជួលរោងចក្រតម្បាញកំពង់ចាម រវាងក្រសួងឧស្សាហកម្មរ៉ែ និងថាមពល និងក្រុមហ៊ុន Manhattan Textile and Garment Corp ក្រសួងបានតម្រូវឲ្យក្រុមហ៊ុនទទួលយកអតីតកម្មកររដ្ឋទាំងអស់ ទៅបម្រើការងារ ក្នុងរោងចក្រ លើកលែងតែក្នុងករណី ក្រុមហ៊ុន បញ្ឈប់ គឺក្រុមហ៊ុន ត្រូវផ្តល់ប្រាក់បំណាច់ផ្សេងៗ ដូចមាននៅក្នុងប្រការ ទី៦.៣ ចំណុច១ ចែងថា ៖ “អ្នកជួល” ត្រូវទទួលយកជាបន្តបន្ទាប់ ក្នុងរយៈពេលបីខែ នូវនិយោជិត កម្មករ ដែលមានស្រាប់នៅក្នុងរោងចក្រ ដូចចែងក្នុង(ឧបសម្ព័ន្ធ៣) ចាប់ពីថ្ងៃតចុះកិច្ចព្រមព្រៀងជួលនេះ។
ការគ្រប់គ្រងនិយោជិត កម្មករក្នុង (ឧបសម្ព័ន្ធ៣) ត្រូវអនុវត្តតាមច្បាប់ការងារ លើកលែងប្រាក់បំណាច់ ក្នុងការបញ្ឈប់ការងារ “អ្នកជួល” ត្រូវផ្តល់តាមចំនួនស្មើនឹងបៀវត្សប្រចាំខែចុងក្រោយ របស់និយោជិត កម្មករ គុណនឹងចំនួនឆ្នាំបំរើការងារក្នុងរោងចក្រ ចាប់ពីឆ្នាំ១៩៧៩ និងឆ្នាំបន្តបន្ទាប់មក។ ប្រាក់បំណាច់នេះនឹងមិនលើសពី ១០ខែ ឬ តិចជាង៣ខែ នៃប្រាក់បៀវត្សប្រចាំខែឡើយ។
លិខិតបានបន្តថា ក៏ប៉ុន្តែកម្មករទាំង ១៩រូបនេះ បានបន្តការងារនៅក្នុងរោងចក្ររហូតដល់បច្ចុប្បន្នមានន័យថា កម្មករទាំងនោះគឺបានស្ថិតនៅក្រោមការគ្រប់គ្រងរបស់ច្បាប់ស្តីពីការងារ ដូច្នេះការផ្តល់អត្ថប្រយោជន៍ផ្សេងៗ ក្នុងការលាឈប់ពីការងារនោះ គឺត្រូវអនុវត្តតាមច្បាប់ស្តីពីការងារ៕