ភ្នំពេញ: រដ្ឋាភិបាល​កម្ពុជា តាមរយៈ​អង្គភាព​ព័ត៌មាន និង​ប្រតិកម្ម​រហ័ស របស់​ទីស្តីការ​គណៈរដ្ឋ​មន្ត្រី បាន​ផលិត​នូវ​ឯកសា​រ​វិដេអូ រយៈពេល ៣៥ នាទី ដើម្បី​ចាក់​ផ្សាយ​តាម​កញ្ចក់​ទូរ​ទស្សន៍​ក្នុងស្រុក​មួយ​ចំនួន ជុំវិញ​បញ្ហា​ព្រំដែន​កម្ពុជា និង​វៀតណាម​។ ឯកសារ​ថ្មី ដែល​នឹង​​ចាក់​បញ្ចាំង តាម​ទូរទស្សន៍ នា​ព្រលប់​ថ្ងៃទី​២​សីហា ឆ្នាំ​២០១២ ដើម្បី​បន្សាប​នូវ​ការ​ឃោសនា​​ជាច្រើន​របស់​គណបក្សប្រឆាំង និង​សង្គម​ស៊ីវិល​មួយចំនួន ដែលថា ការបោះ​បង្គោល​​ព្រំដែន​កម្ពុជា​-​វៀតណាម នាំ​ឲ្យ​កម្ពុជា​ បាត់បង់​ទឹក​ដី​ទៅ​ខាង​វៀតណាម​។​

ថ្ងៃទី 2 សីហា 2012
ដោយ: សុខ ភក្តី
CEN

ភ្នំពេញ: រដ្ឋាភិបាល​កម្ពុជា តាមរយៈ​អង្គភាព​ព័ត៌មាន និង​ប្រតិកម្ម​រហ័ស របស់​ទីស្តីការ​គណៈរដ្ឋ​មន្ត្រី បាន​ផលិត​នូវ​ឯកសា​រ​វិដេអូ រយៈពេល ៣៥ នាទី ដើម្បី​ចាក់​ផ្សាយ​តាម​កញ្ចក់​ទូរ​ទស្សន៍​ក្នុងស្រុក​មួយ​ចំនួន ជុំវិញ​បញ្ហា​ព្រំដែន​កម្ពុជា និង​វៀតណាម​។ ឯកសារ​ថ្មី ដែល​នឹង​​ចាក់​បញ្ចាំង តាម​ទូរទស្សន៍ នា​ព្រលប់​ថ្ងៃទី​២​សីហា ឆ្នាំ​២០១២ ដើម្បី​បន្សាប​នូវ​ការ​ឃោសនា​​ជាច្រើន​របស់​គណបក្សប្រឆាំង និង​សង្គម​ស៊ីវិល​មួយចំនួន ដែលថា ការបោះ​បង្គោល​​ព្រំដែន​កម្ពុជា​-​វៀតណាម នាំ​ឲ្យ​កម្ពុជា​ បាត់បង់​ទឹក​ដី​ទៅ​ខាង​វៀតណាម​។​

លោក ទិត សុធា អ្នកនាំពាក្យ និងជាអនុប្រធានអង្គភាពព័ត៌មាន និងប្រតិកម្មរហ័ស របស់​ទីស្តីការគណៈរដ្ឋមន្ត្រី បានមានប្រសាសន៍ថា “ការដែលអង្គភាពព័ត៌មាន និង​ប្រតិកម្មរហ័ស ផលិតស្ពតវិដេអូនេះឡើង គឺដើម្បីបកស្រាយ បំភ្លឺជូនសាធារណជន ក្នុងបំណងបន្សាបលើការធ្វើអាជីវកម្មនយោបាយ អំពីបញ្ហាព្រំដែនរបស់គណបក្ស​ប្រឆាំង និងក្រុមអង្គការសង្គមស៊ីវិលមួយចំនួន នៅក្នុងនោះ យើងដឹងហើយថា មាន​លោក ស៊ាន ប៉េងសែ ជាដើម ជាពិសេស គឺការចោទប្រកាន់នាពេលថ្មីនេះ របស់​លោក​សមរង្ស៊ី ដែលជាទណ្ឌិតរត់គេចខ្លួន ដែលថា សម្តេចហ៊ុនសែន ជាជនក្បត់ជាតិ ធ្វើឲ្យបាត់បង់ទឹកដី ទៅប្រទេសវៀតណាម។ ជាមួយគ្នានោះ មានការផ្តល់សម្ភាសន៍​ជាមួយវិទ្យុបរទេសមួយចំនួន ដែលមានអ្នកតំណាងរាស្ត្រគណបក្សប្រឆាំង​ ដូចជា ឯកឧត្តម យឹម សុវណ្ណ និងអង្គការក្រៅរដ្ឋាភិបាលមួយចំនួន ដូចជា លោករ៉ុងឈុន ជាដើម គឺគាត់តែងតែលើកថា មិនទទួលយកលទ្ធផលនៃការបោះបង្គោលព្រំដែន ដោយរាជរដ្ឋាភិបាលកម្ពុជាទេ បើសិនជាមិនមានការចូលរួមពីអង្គការសង្គមស៊ីវិល និងអ្នកសង្កេតការណ៍អន្តរជាតិ”។

លោក ទិត សុធា បានបន្ថែមថា “នៅក្នុងឯកសារស្ពត ដែលផ្សព្វផ្សាយតាមកញ្ចក់​ទូរទស្សន៍​នោះ គឺយើងបានដឹងហើយថា រដ្ឋសភា ជាស្ថាប័ននីតិបញ្ញត្តិមួយ ដែលបោះ​ឆ្នោត​ដោយសំឡេងប្រជាពលរដ្ឋនៅទូទាំងប្រទេស ហើយការងារបោះបង្គោលព្រំដែន​នោះ គឺបានប្រគល់ភារកិច្ចឲ្យទៅរដ្ឋាភិបាល ដើម្បីឲ្យធ្វើការ។ អីចឹង អ្វីដែលជាការ​បញ្ជាក់​​នោះ គឺជាទិដ្ឋភាពមួយដ៏រឹងមាំនៃការអនុវត្តទៅតាមលទ្ធិប្រជាធិបតេយ្យ ដែល​យក​ពលរដ្ឋជាធំ ដោយបានផ្តល់ការទុកចិត្តលើរដ្ឋាភិបាល ក្នុងការបោះបង្គោល​ព្រំដែន មិនចាំបាច់មានការចូលរួមពីអង្គការក្រៅរដ្ឋាភិបាល និងអ្នកសង្កេតការណ៍ ដូចការលើកឡើងដ៏ខុសឆ្គងរបស់អង្គការក្រៅរដ្ឋាភិបាល និងគណបក្សប្រឆាំងនោះទេ”។

ខ្សែវិដេអូឯកសាររយៈពេល ៣៥ នាទី ស្តីពីដំណើរការបោះបង្គោលព្រំដែន ដែល​រដ្ឋាភិបាលផលិតចាក់ផ្សាយតាមកញ្ចក់ទូរទស្សន៍ក្នុងស្រុកពេលនេះ មានការបក​ស្រាយ​បញ្ជាក់​ពីប្រមុខរាជរដ្ឋាភិបាល ពីអ្នកបច្ចេកទេសព្រំដែន ពិសេសលោក​ឧបនាយក​រដ្ឋមន្ត្រី សុខអាន អ្នកច្បាប់ ប្រជាពលរដ្ឋ និងអាជ្ញាធរពាក់ព័ន្ធមួយ​ចំនួន​ទៀត ដែលគេលើកឡើងថា មិនមានការបាត់បង់ទឹកដី ដោយសារការបោះបង្គោល​ព្រំដែន​នោះទេ។ នេះបើតាមការគូសបញ្ជាក់ពីលោកទិតសុធា៕