ភ្នំពេញ: ពិព័រណ៍ឧស្សាហកម្មគ្រឿងយន្ត ឬគ្រឿងម៉ាស៊ីនកម្ពុជាអន្តរជាតិ ឆ្នាំ២០១២ និងពិព័រណ៍ឧស្សាហកម្មសម្លៀកបំពាក់ និងវាយនភណ្ឌអន្តរជាតិកម្ពុជា ឆ្នាំ២០១២ បានបើកសម្ពោធ នាព្រឹកថ្ងៃទី១៧ ខែសីហា ឆ្នាំ២០១២ នៅកោះពេជ្រ រាជធានីភ្នំពេញ។ ពិព័រណ៍នោះ នឹងបន្តរហូតដល់ថ្ងៃទី២០ ខែសីហា ឆ្នាំ២០១២។
ថ្ងៃទី 17 សីហា 2012
ដោយ: សុខ ភក្តី
CEN
ម៉ាស៊ីន សម្រាប់កែច្នៃស្រូវអង្ករ ត្រូវបានដាក់តាំង ក្នុងពិព័រណ៍ឧស្សាហកម្មគ្រឿងយន្តកម្ពុជាអន្តរជាតិ ឆ្នាំ២០១២ នៅកោះពេជ្រ នាថ្ងៃទី១៧ ដល់ថ្ងៃទី២០ ខែសីហា ឆ្នាំ២០១២
(រូបថត៖ សុខ ភក្តី)
ពិព័រណ៍ឧស្សាហកម្មគ្រឿងយន្តកម្ពុជាអន្តរជាតិ ឆ្នាំ២០១២ រៀបចំឡើងដោយក្រុមហ៊ុនរបស់ចិនហុងកុង សហការជាមួយនាយកដ្ឋានជំរុញពាណិជ្ជកម្មរបស់ក្រសួងពាណិជ្ជកម្មកម្ពុជា សភាពាណិជ្ជកម្មកម្ពុជា សមាគមកាត់ដេរនៅកម្ពុជា ក្រុមហ៊ុន និងពិព័រណ៍ពាណិជ្ជកម្មជាតិវៀតណាម។
លោក ម៉ៅ ថូរ៉ា រដ្ឋលេខាធិការក្រសួងពាណិជ្ជកម្ម បានថ្លែងក្នុងពិធីសម្ពោធពិព័រណ៍ នៅព្រឹកមិញថា ពិព័រណ៍ពាណិជ្ជកម្ម ឧស្សាហកម្ម ដែលមានលក្ខណៈវិជ្ជាជីវៈជាលើកទី២នេះ នៅក្នុងព្រះរាជាណាចក្រកម្ពុជា មានសារៈសំខាន់មួយ សម្រាប់បណ្តាអ្នកផលិត អ្នកទិញ ពាណិជ្ជករ អ្នកចែកចាយ ព្រមទាំងសម្រាប់មន្ត្រីរដ្ឋាភិបាលផងដែរ។ ពិព័រណ៍ដែលមានលក្ខណៈវិជ្ជាជីវៈនេះ គឺជាវេទិកា ដែលប្រកបដោយឧត្តមគតិ និងមានប្រយោជន៍សម្រាប់ធុរជន និងពាណិជ្ជករកម្ពុជា។
លោក ម៉ៅ ថូរ៉ា បានបញ្ជាក់ថា “ព្រឹត្តិការណ៍ពាណិជ្ជកម្មនេះ នឹងត្រួសត្រាយផ្លូវសម្រាប់ប្រទេសកម្ពុជា ក្នុងការអភិវឌ្ឍន៍ឧស្សាហកម្មគ្រឿងម៉ាស៊ីន នៅពេលបច្ចុប្បន្ន និងនៅពេលអនាគតរបស់ខ្លួន ជាមួយនឹងបច្ចេកវិជ្ជាទាន់សម័យដ៏ជឿនលឿន។ គ្រឿងម៉ាស៊ីនទាំងអស់ ចាត់ទុកថា ជាមធ្យោបាយផលិតកម្ម។ អីចឹងកាលណា យើងរៀបចំពិព័រណ៍តាំងមធ្យោបាយផលិតកម្ម បានសេចក្តីថា យើងមានផលិតកម្មច្រើនគ្រប់គ្រាន់ ដែលអាចអភិវឌ្ឍន៍ប្រទេសបាន។ បើសិនជាអត់មានពិព័រណ៍ មធ្យោបាយផលិតកម្មទេ យើងឃើញថា សេដ្ឋកិច្ចរបស់យើង មានការលូតលាស់នៅទន់ខ្សោយដែរ”។
របាយការណ៍របស់នាយកដ្ឋានជំរុញពាណិជ្ជកម្ម របស់ក្រសួងពាណិជ្ជកម្ម បង្ហាញថា នៅក្នុងពិព័រណ៍ឆ្នាំនេះ មានក្រុមហ៊ុនជាង ២០០ បានចូលរួម និងមានស្តង់សរុបទាំងអស់ ៣០០ ស្តង់ ដែលនឹងដាក់តាំងនូវគ្រឿងម៉ាស៊ីនទំនើបៗ ទាន់សម័យជាច្រើនប្រភេទ គ្រឿងបរិក្ខា ឧបសាធន និងគ្រឿងបន្លាស់ ដែលពាក់ព័ន្ធ។ គ្រឿងឧបរកណ៍បរិក្ខា ដែលដាក់តាំងនោះ រួមមាន៖ សម្លៀកបំពាក់ និងវាយនភណ្ឌ ស្បែកជើង និងស្បែក ក្រណាត់ និងឧបសាធន ប្លាស្ទីក និងកៅស៊ូ ការបោះពុម្ព និងការវេចខ្ចប់ ការកែច្នៃម្ហូបអាហារ គ្រឿងបរិក្ខាពេទ្យ គ្រឿងលោហៈ និងស្វ័យប្រវត្តិ ឧបករណី និងគ្រឿងដែក សេវាកម្ម និងគ្រឿងឧបករណ៍កសិកម្ម។
អ្នកតាំងពិព័រណ៍ មកពីប្រទេសចំនួន ២០ រួមមាន៖ កម្ពុជា ឆេក អាល្លឺម៉ង់ ឥណ្ឌា ឥណ្ឌូនេស៊ី អ៊ីតាលី ជប៉ុន កូរ៉េ ម៉ាឡេស៊ី សឹង្ហបុរី អេស្ប៉ាញ ស្រីលង្កា ស្វីស ចិន កោះតៃវ៉ាន់ ទីក្រុងហុងកុង ថៃ អង់គ្លេស សហរដ្ឋអាមេរិក និងវៀតណាម។
លោករដ្ឋលេខាធិការ ម៉ៅ ថូរ៉ា បានបន្ថែមថា បើប្រៀបធៀបនឹងឆ្នាំមុន ពិព័រណ៍លើកនេះ មានទំហំធំជាង ៣៥ ភាគរយ និងមានគ្រឿងម៉ាស៊ីនច្រើនប្រភេទ មកពីបណ្តាឧស្សាហកម្ម និងប្រទេសនានា ដូចជា មកពីកាណាដា សឹង្ហបុរី និងចិន។ គ្រឿងបរិក្ខាសុខភាពមកពីសាធារណរដ្ឋ ឆេក និងមកពីកោះតៃវ៉ាន់ ជាដើម។
ក្រៅពីនោះ ក៏មានគ្រឿងម៉ាស៊ីនកសិកម្ម ហើយអ្នកតាំងពិព័រណ៍កម្ពុជា កោះតៃវ៉ាន់ និងជប៉ុន ក៏បានដាក់តាំងបង្ហាញនូវម៉ាស៊ីនកិនស្រូវ ម៉ាស៊ីនធ្វើតេស្តសំណើម ម៉ាស៊ីនសម្ងួត និងប្រព័ន្ធស្តុកទុក ម៉ាស៊ីនបាញ់ឲ្យចេញជាផ្សែង ម៉ាស៊ីនធ្វើជី និងម៉ាស៊ីនធ្វើដី។ល។
លោករដ្ឋលេខាធិការ ម៉ៅ ថូរ៉ា ក៏បានលើកឡើងថា “ក្នុងនាមជាសមាជិកមួយរូបរបស់អាស៊ាន កម្ពុជា គឺជាប្រទេសមួយ ក្នុងចំណោមបណ្តាប្រទេស ដែលមានការរីកលូតលាស់តទៅទៀត ហើយត្រូវគេរំពឹងថា កម្ពុជានឹងមានកំណើនសេដ្ឋកិច្ច ៦,៦ ភាគរយ នៅឆ្នាំ២០១២។ លើសពីនេះទៀត តម្លៃពាណិជ្ជកម្មបរទេសរបស់កម្ពុជា ក្នុងរយៈពេល ៦ ខែ ដំបូង ក្នុងឆ្នាំ២០១២ បានកើនឡើង ១៦ ភាគរយ បើប្រៀបធៀបទៅនឹងរយៈពេលដូចគ្នា កាលពីឆ្នាំមុន។ ការរីកចម្រើននេះ គឺមិនគ្រាន់តែជាលទ្ធផលនៃការកើនឡើងវិញនូវតម្រូវការបរទេសប៉ុណ្ណោះទេ គឺវាថែមទាំងបង្ហាញឲ្យឃើញពីសក្តានុពល ដ៏ធំសម្បើម និងកាលានុវត្តភាពធុរកិច្ចនៅកម្ពុជា”។
ក៏ប៉ុន្តែចំពោះមុខកំណើនសេដ្ឋកិច្ចដ៏វិជ្ជមាននេះ លោក ម៉ៅ ថូរ៉ា ក៏បានកត់សម្គាល់ថា “កម្ពុជាចាំបាច់ត្រូវធ្វើពិពិធកម្មលើសកម្មភាពសេដ្ឋកិច្ចរបស់ខ្លួន និងត្រូវធ្វើការជំរុញការនាំចេញ ដើម្បីសម្រេចកំណើនសេដ្ឋកិច្ចដ៏ខ្ពស់មួយ ដែលប្រកបដោយចីរភាព និងផលិតផល នៃតម្លៃបន្ថែមដែលខ្ពស់ជាងមុន”៕