ភ្នំពេញ: កងកម្លាំងនគរបាលរបស់នាយកដ្ឋានជំនាញ និងស្នងការនគរបាលខេត្តចំនួន ៩ អង្គភាព សរុបចំនួន ៣៨៤ នាក់ ដែលជាកម្លាំងត្រូវបំពេញបេសកកម្មនៅតំបន់គ្មានកងទ័ពបណ្តោះអាសន្ន នៅព្រំដែនប្រាសាទព្រះវិហារ ក្នុងជំហានទី៣។ កម្លាំងបូលិសថ្មីនេះ ត្រូវទៅឈរជើងការពារព្រំដែន ជំនួសកម្លាំងចាស់ដែលត្រូវប្តូរវេន។
ថ្ងៃទី 15 កញ្ញា 2012
ដោយ: សុខ ភក្តី
CEN
ក្រុមប៉ូលិស ផ្លាស់ប្តូរកម្លាំង ឈរជើងការពារព្រំដែនប្រាសាទព្រះវិហារ នៅតំបន់គ្មានកងទ័ពបណ្តោះអាសន្ន (រូបថត៖ ប៉ូលិសជាតិ)
គេហទំព័រប៉ូលិសជាតិ បានផ្សព្វផ្សាយថា កាលពីថ្ងៃទី១០ ខែកញ្ញា ឆ្នាំ២០១២ លោកឧត្តមសេនីយ៍ឯក ហ៊ូ សាគុណ ប្រធានគណៈបញ្ជាការដឹកជញ្ជូនកងនគរបាលជាតិបំពេញបេសកកម្មតំបន់គ្មានកងទ័ពបណ្ដោះអាសន្ន ក្បូនរថយន្តចំនួន ៩គ្រឿង បានធ្វើដំណើរពីរាជធានីភ្នំពេញ ទៅកាន់ខេត្តព្រះវិហារ ដែលមានកម្លាំងប៉ូលិសជាក់ស្ដែង សរុប ៣៨៤ នាក់ ដើម្បីទៅបំពេញបេសកកម្មឈរជើងការពារព្រំដែននៅតំបន់ប្រាសាទព្រះវិហារ ក្នុងតំបន់គ្មានកងទ័ពបណ្តោះអាសន្ន ដែលបានកំណត់ដោយតុលាការយុត្តិធម៌អន្តរជាតិ ក្នុងរឿងក្តីជម្លោះព្រំដែនរវាងកម្ពុជា ជាមួយនឹងប្រទេសថៃ។
ប៉ូលិសក៏បានឲ្យដឹងថា ចំពោះកម្លាំងនគរបាល ដែលបានបញ្ចប់បេសកកម្មក្នុងតំបន់គ្មានកងទ័ពបណ្ដោះអាសន្ន ជំហានទី២ មានចំនួន ៤៣១ នាក់ ក៏ត្រូវបានដឹកជញ្ជូនវិលត្រឡប់វិញ និងប្រគល់ជូននាយកដ្ឋាន៥ និងស្នងការដ្ឋាននគរបាលខេត្ត ចំនួន ៤ កាលពីថ្ងៃទី១១ ខែកញ្ញា ឆ្នាំ២០១២ រួចរាល់ហើយ។
ជាការកត់សម្គាល់ កាលពីថ្ងៃពុធ ទី១៨ ខែកក្កដា ឆ្នាំ២០១២ កម្ពុជានិងថៃ បានកែសម្រួលដកកងទ័ពលើកទី១ ចេញពីតំបន់ព្រំដែនប្រាសាទព្រះវិហារ នៅចំណុចគ្មានកងទ័ពបណ្តោះអាសន្ន។ ទីតាំងនោះត្រូវបានជំនួសដោយកងកម្លាំងនគរបាលជាតិ។
កងទ័ពកម្ពុជា ចំនួន ៤៨៥ នាក់ ត្រូវបានដកចេញពីតំបន់គ្មានកងទ័ពបណ្តោះអាសន្ន នៅព្រំដែនប្រាសាទព្រះវិហារ។ ក្នុងជំហានទី១នោះ កងទ័ពកម្ពុជា ត្រូវបានដកចេញពីបរិវេណជុំវិញប្រាសាទព្រះវិហារ ចំនួន ៤ ចំណុច រួមមាន៖ ផ្សារជណ្តើរនាគ ជណ្តើរបុរាណខាងជើង ជណ្តើរបុរាណខាងកើត និងវត្តកែវសិក្ខាគីរីស្វារៈ។ ទីតាំងទាំង៤នោះ ត្រូវជំនួសមកវិញដោយកងកម្លាំងនគរបាលជាតិចំនួន ២៥៥ នាក់ និងសន្តិសុខអភិរក្សប្រាសាទព្រះវិហារចំនួន ១០០ នាក់។
កងទ័ពកម្ពុជា និងថៃ ដែលបានដកចេញពីតំបន់គ្មានកងទ័ពបណ្តោះអាសន្ន ទំហំជាង ១៧ គីឡូម៉ែត្រក្រឡា កាលពីថ្ងៃទី១៨ ខែកក្កដា ឆ្នាំ២០១២ គឺអនុវត្តន៍តាមដីកាបង្គាប់របស់តុលាការយុត្តិធម៌អន្តរជាតិ ទីក្រុងឡាអេ កាលពីថ្ងៃទី១៨ ខែកក្កដា ឆ្នាំ២០១១៕ S