ភ្នំពេញ: តុលាការកំពូល នឹងបើកសវនាការនៅថ្ងៃទី១៩ ខែកញ្ញា ឆ្នាំ២០១២ ដើម្បីជំនុំជម្រះករណីចោទប្រកាន់លោកស្រី សេង ចន្ទដា ភរិយារបស់លោកឧកញ៉ា ខូវ ជឺលី ថាជាអ្នកនៅពីក្រោយគម្រោងការសម្លាប់លោកស្រី ស៊ុន សុត្ថា ភរិយារបស់លោកទេសរដ្ឋមន្ត្រី ស៊ុន ចាន់ថុល និងជនសង្ស័យ ៣នាក់ទៀត ដែលត្រូវបានចោទថា ជាប់ពាក់ព័ន្ធនឹងគម្រោងការសម្លាប់នោះ កាលពីថ្ងៃទី១៣ ខែមិថុនា ឆ្នាំ២០១០ នៅភូមិគ្រឹះលេខ០១បេ ផ្លូវហាណូយ សង្កាត់ទឹកថ្លា ខណ្ឌសែនសុខ រាជធានីភ្នំពេញ។ លោកស្រី ស៊ុន សុត្ថា ជាកូនបង្កើតរបស់លោកឧកញ៉ា ខូវ ជឺលី។
ថ្ងៃទី 18 កញ្ញា 2012
ដោយ: CEN
ករណីចោទប្រកាន់មួយនេះ រហូតមកដល់ពេលនេះ បានរីករាលដាលកាន់តែធំឡើងៗ នៅក្នុងគ្រួសារត្រកូល ខូវ ឥឡូវនេះ មានការចោទប្រកាន់រីករាលដាលរហូតដល់លោកឧកញ៉ា ខូវ ជឺលី ដែលជាឪពុកបង្កើតលោកឧកញ៉ា ខូវ ផល្លាបុត្រ ដែលត្រូវជាប្អូនបង្កើតរបស់លោកស្រី ឡាយ ហួង និង ហ៊ុយ សុខលាប ថាជាអ្នកមេគំនិតរៀបចំគម្រោងសម្លាប់នេះ។
លោក លឹម វណ្ណា មេធាវីការពារក្ដីឲ្យលោក សេង ចន្ទដា បានឲ្យដឹងថា ដោយសាលាដំបូងរាជធានីភ្នំពេញ និងសាលាឧទ្ធរណ៍ មិនបានផ្ដល់យុត្តិធម៌ឲ្យកូនក្ដីលោក ទើបកូនក្ដីលោកប្ដឹងសាទុក្ខទៅតុលាការកំពូលរកយត្តិធម៌ឲ្យ។
លោកមេធាវីរូបនេះបន្តថា “ឥឡូវនេះ តុលាការកំពូល នឹងលើកយកសំណុំរឿងព្រហ្មទណ្ឌនេះមកជម្រះនៅថ្ងៃទី១៩ ខែកញ្ញា ឆ្នាំ២០១២ ខាងមុខនេះ យើងខ្ញុំសង្ឃឹមថា តាមរយៈភស្ដុតាងសាក្សីដោះបន្ទុក និងសារណា ២០ទំព័រ ដែលបានបញ្ជាក់យ៉ាងច្បាស់អំពីអង្គហេតុមិនប្រក្រតីនៃរឿងក្ដីនេះ តុលាការកំពូល នឹងផ្ដល់យុត្តិធម៌ឲ្យលោកស្រី សេង ចន្ទដា កូនក្ដីរបស់ខ្ញុំឲ្យរួចផុតពីការចោទប្រកាន់”។
លោកមេធាវីបញ្ជាក់ថា “បើគិតរហូតមកដល់ពេលនេះ កូនក្ដីរបស់ខ្ញុំ ត្រូវបានឃុំដោយអំពើអយុត្តិធម៌នៅក្នុងពន្ធនាគារព្រៃស អស់រយៈពេលជាងពីរឆ្នាំមកហើយ”។
ចំណែកលោក ការ សាវុធ មេធាវីការពារលោកស្រី សេង ចន្ទដា ដែរនោះ បានបញ្ជាក់យ៉ាងខ្លីថា “ខ្ញុំមិនធ្វើការបកស្រាយអ្វីវែងឆ្ងាយទេ។ ខ្ញុំគ្រាន់តែចង់ទាញអារម្មណ៍សាធារណជនថា តើលោក ខូវ ជឺលី មានអាយុ ៨៣ឆ្នាំ ដែលជាអ្នកមានប្រាំជំនាន់ ហើយគាត់ខំចិញ្ចឹមបីបាច់កូនទាំង ១១នាក់ តាំងពីបាតជើងក្រហម រហូតដល់រៀបចំឲ្យមានគូស្រករទៀត។ តើមានហេតុផលអ្វី ដែលគាត់ត្រូវទៅសម្លាប់កូន និងចៅ ជាទីស្រឡាញ់របស់ខ្លួននោះ? តើគាត់ធ្វើដើម្បីអ្វី? ចម្លើយ គឺគ្មានហេតុផលណាមួយដែលធ្វើឲ្យគេជឿឡើយ ព្រោះលើលោកនេះគ្មានឪពុកណាសម្លាប់កូនបង្កើតរបស់ខ្លួននោះទេ”។
នៅក្នុងសារណា ២០ ទំព័ររបស់លោកមេធាវី លឹម វណ្ណា និងលោក ការ សាវុធ បានបញ្ជាក់ថា នាង ចាន់ សុខា និងនាងស៊ីណាត ដែលជាអ្នកបម្រើ ត្រូវបានគេប្រើប្រាស់ឲ្យឆ្លើយទម្លាក់កំហុសមកលើលោកស្រី សេង ចន្ទដា និងបន្ទាប់មកនៅសាលាឧទ្ធរណ៍ ក៏ត្រូវបានគេប្រើប្រាស់ឲ្យឆ្លើយប្រឌិតរឿងចោទប្រកាន់ទៅលើលោកឧកញ៉ា ខូវ ជឺលី ជាមនុស្សចាស់ជរាអាយុជាង ៨៣ឆ្នាំ ជាឪពុកបង្កើតរបស់លោកជំទាវ ស៊ុន សុត្ថា ថាជាអ្នករួមគំនិតរៀបចំគម្រោងសម្លាប់កូនបង្កើតរបស់ខ្លួនទៅវិញ។
ក្រោយពីសាលាឧទ្ធរណ៍ ពុំបានចាត់ការតាមការស្នើសុំរបស់ខ្លួន លោកទេសរដ្ឋមន្ត្រី ស៊ុន ចាន់ថុល ក៏បានធ្វើលិខិតចុះ ថ្ងៃទី៧ ខែធ្នូ ឆ្នាំ២០១១ ស្នើសុំទៅរដ្ឋមន្ត្រីក្រសួងយុត្តិធម៌ ធ្វើអធិបញ្ជាឲ្យព្រះរាជ្ញាសាលាដំបូងរាជធានីភ្នំពេញ ធ្វើការចោទប្រកាន់លោកឧញ៉ា ខូវ ជឺលី និងស្នើឲ្យផ្ដន្ទាទោសលោកឧកញ៉ា ដែលត្រូវជាឪពុកក្មេក និងជាឪពុកបង្កើតរបស់លោកស្រី ស៊ុន សុត្ថា ឲ្យបានតឹងរ៉ឹងបំផុត រួមទាំងកូនរបស់ឧកញ៉ា ខូវ ជឺលី បីនាក់ទៀត។
លោកមេធាវីទាំងពីរ បានធ្វើការបញ្ជាក់ថា “រហូតមកដល់ពេលនេះ សំណុំរឿងព្រហ្មទណ្ឌ ដែលឯកឧត្តម ស៊ុន ចាន់ថុល ប្ដឹងលោកឧកញ៉ា ខូវ ជឺលី មិនទាន់ត្រូវបានព្រះរាជអាជ្ញាសាលាដំបូងរាជធានីភ្នំពេញ សម្រេចយ៉ាងណានៅឡើយទេ។ ដូច្នេះ ខ្ញុំគិតថា បើសិនជាតុលាការកំពូលសម្រេចរឿងក្ដីនេះខុស នោះរឿងអយុត្តិធម៌ និងភាពគួរឲ្យសង្វេគ នឹងកើតមានចំពោះមនុស្សស្លូតត្រង់ជាច្រើននាក់ទៀត រាប់ទាំង ចាន់ អង្គាររិទ្ធ កូនប្រុសរបស់នាង ចាន់ សុខា នឹងរស់នៅកំព្រា គ្មានឪពុកម្ដាយជាទីពឹង តើអនាគតរបស់ក្មេងប្រុសនេះនឹងទៅជាយ៉ាងណា? តែខ្ញុំជឿថា តុលាការកំពូលជាស្ថាប័នយុត្តិធម៌កំពូលរបស់ជាតិ ជាក្ដីសង្ឃឹមរបស់ប្រជារាស្ដ្រ ប្រាកដជាផ្ដល់យុត្តិធម៌ឲ្យកូនក្ដីរបស់យើងខ្ញុំ”។
គួររម្លឹកដែរថា កន្លងមក សាលាដំបូងរាជធានីភ្នំពេញ បានសម្រេចសេចក្ដីផ្ដន្ទាទោសលោកស្រី សេង ចន្ទដា និងជនសង្ស័យម្នាក់ទៀត ឈ្មោះ សុខ ឡាក់ ឲ្យជាប់ពន្ធនាគារម្នាក់ៗ ចំនួន ២០ឆ្នាំ ហើយឈ្មោះ ចាន់ សុខា និងនាងស៊ីណាត ឲ្យជាប់ពន្ធនាគារម្នាក់ៗ១៨ឆ្នាំ តែឈ្មោះ យាន សុធារិទ្ធ ដែលជាជនសង្ស័យដូច សុខ ឡាក់ ដែរ ត្រូវបានតុលាការលើកលែងការចោទប្រកាន់ ហើយសាលាឧទ្ធរណ៍ក៏សម្រេចតម្កល់សេចក្ដីសម្រេចរបស់តុលាការនៃសាលាដំបូងរាជធានីភ្នំពេញ ទុកជាបានការដដែល។
រឿងក្ដីព្រហ្មទណ្ឌមួយនេះ ត្រូវបានមជ្ឈដ្ឋានមហាជនកំពុងតាមដានយ៉ាងយកចិត្តទុកដាក់បំផុត ជាពិសេសមជ្ឈដ្ឋានអ្នកជំនួញធំៗ នៅក្នុងប្រទេសកម្ពុជា ចាំមើលតុលាការកំពូលមានសេចក្ដីក្លាហាន ហ៊ានវះកាត់រឿងក្ដីដ៏ធំនេះ យ៉ាងដូចម្ដេច?៕ S
ចុងក្រោយកាប់សំលាប់គ្រួសារឯងព្រោះតែរឿងមាសប្រាក់។មានពេកក៏ពិបាក រស់ដែរមិនថាតែអ្នកក្រទេ
ឈាមវាស្រែក ស្បែកហៅតែអញ្ចឹង! ពួកអាពុករលួយទាំងអស់នោះ យ៉ាងម៉េចហើយពួកអាគាំទ្រផ្គាប់មុខ CPP?