ប្រទេសកម្ពុជា មានទីផ្សារថ្មីសម្រាប់នាំចេញអង្ករផ្សេងទៀត គឺប្រទេសចិន ដោយសារតែប្រទេសចិន មានតម្រូវការអង្ករកើនឡើងរៀងរាល់ឆ្នាំ ហើយការធ្វើពាណិជ្ជកម្មទ្វេភាគី កម្ពុជា-ចិន បានព្រមព្រៀងគ្នាដោះស្រាយកត្តាប្រឈមជាច្រើន ទាក់ទងនឹងបច្ចេកទេស និងអនាម័យលើផ្នែកនាំចេញអង្ករ។
ដោយ អាន ស៊ីថាវ
2012-09-27
វិទ្យុអាស៊ីសេរី
១៨-តុលា-២០១១៖ បុគ្គលិកក្រុមហ៊ុនបៃតងកម្ពុជា ជួយលើកអង្ករដាក់លើម៉ូតូពលរដ្ឋដែលមកទិញអង្ករនៅតាមស្តង់ នារាជធានីភ្នំពេញ។ RFA/Ouk Savborey
បច្ចុប្បន្នមានក្រុមហ៊ុននាំចេញអង្កររបស់កម្ពុជា បានទទួលកិច្ចព្រមព្រៀងបញ្ជាទិញអង្ករពីប្រទេសចិន រួចហើយ ដែលតាមការប៉ាន់ស្មាន កម្ពុជាគ្រោងនឹងនាំចេញអង្ករទៅប្រទេសចិន ប្រមាណ ៣០ម៉ឺនតោនក្នុងមួយឆ្នាំ។
ប្រធានក្រុមហ៊ុននាំចេញអង្ករ ឡូរ៉ង់ (Loran Import Export Co., Ltd) លោក ឧកញ៉ា លឹម ប៊ុនហេង មានប្រសាសន៍នៅថ្ងៃទី២៧ កញ្ញា ថា ការនាំចេញអង្ករទៅប្រទេសចិន មិនមានលក្ខណៈស្មុគស្មាញដូចមុនទេ ដោយសារមានការពិភាក្សាគ្នាជាមួយផ្នែកបច្ចេកទេសនាំចេញអង្ករដូចជាផ្នែកអនាម័យ កាំកុងត្រូល និងផ្នែកគយ បានព្រមព្រៀងគ្នាក្នុងការធ្វើពាណិជ្ជកម្មអង្កររវាងកម្ពុជា និងចិន។
លោកបញ្ជាក់ទៀតថា ការនាំចេញអង្ករទៅប្រទេសចិន មានផលចំណេញច្រើនជាងការនាំចេញទៅប្រទេសផ្សេងៗទៀត ដូចជាសហភាពអឺរ៉ុប ដោយសារទីតាំងនៅជិតហើយចំណេញរយៈពេលនាំចេញ។
លោកមានប្រសាសន៍បន្តថា មានក្រុមហ៊ុនចិនមួយចំនួន ក៏បានមកវិនិយោគនាំចេញអង្ករពីប្រទេសកម្ពុជាដែរ ដោយលោកបញ្ជាក់ថា និន្នាការបែបនេះនឹងផ្ដល់ផលចំណេញច្រើនដល់កម្ពុជា តាមរយៈការបង្កើតការងារ និងបង្កើតតម្លៃបន្ថែមផ្សេងៗ ហើយការចាប់ដៃគូវិនិយោគវិស័យនាំចេញអង្ករជាមួយចិននេះ ជាសក្ដានុពលមួយសំខាន់របស់អ្នកវិនិយោគអង្ករនៅប្រទេសកម្ពុជា។
យ៉ាងណាក៏ដោយ រដ្ឋមន្ត្រីក្រសួងពាណិជ្ជកម្ម លោក ចម ប្រសិទ្ធិ ធ្លាប់មានប្រសាសន៍ថា ប្រទេសកម្ពុជា គ្រោងនឹងនាំចេញអង្ករទៅប្រទេសចិន ប្រមាណ ៣០ម៉ឺនតោនរៀងរាល់ឆ្នាំ បន្ទាប់ពីបានជួបពិភាក្សាជាមួយលោករដ្ឋមន្ត្រីពាណិជ្ជកម្មចិន នៅក្នុងកិច្ចប្រជុំរដ្ឋមន្ត្រីសេដ្ឋកិច្ចអាស៊ានកន្លងមក ហើយក្រុមហ៊ុនចិនពីរ កំពុងវិនិយោគសាងសង់រោងម៉ាស៊ីនកិនស្រូវទំនើប នៅខេត្តកំពង់ឆ្នាំង និងខេត្តតាកែវ។
បញ្ហានេះ ត្រូវបានអ្នកវិភាគសេដ្ឋកិច្ចលោក ហេង ឌីណា មានប្រសាសន៍ថា ការវិនិយោគរបស់ប្រទេសចិន នឹងផ្ដល់ផលវិជ្ជមានសម្រាប់អភិវឌ្ឍផ្នែកនាំចេញអង្ករ ដោយសារតែប្រទេសកម្ពុជា មានសក្ដានុពលខ្លាំងលើកកម្ពស់ផ្នែកនាំចេញអង្ករនេះ និងទីផ្សាររបស់ប្រទេសចិន មាននិន្នាការតម្រូវអង្ករកាន់តែកើនឡើង។
របាយការណ៍អង្គការស្បៀងអាហារ និងកសិកម្ម (FAO) ប្រចាំឆ្នាំ២០១២ បានបង្ហាញថា ផលិតកម្មស្រូវរបស់ប្រទេសចិន មានបរិមាណសរុបប្រមាណជាង ២០២លានតោន នៅឆ្នាំ២០១២ កើនឡើងប្រមាណជិត ១% ធៀបនឹងឆ្នាំ២០១១។
បើទោះប្រទេសចិន ផលិតស្រូវ ប៉ុន្តែប្រទេសចិន បាននាំចូលអង្ករមានកំណើនកាន់តែច្រើនឡើងពីមួយឆ្នាំទៅមួយឆ្នាំ ដែលតាមការប៉ាន់ស្មានដោយអង្គការស្បៀងអាហារ និងកសិកម្ម មានចំនួន ១,៦លានតោន នៅក្នុងឆ្នាំ២០១២ ដែលលើសពីឆ្នាំ២០១១ ប្រមាណមួយលានតោន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
it is the best market for Cambodia,, to OUR BIG BROTHER CHINA
from now on, Cambodia does not need to beg Thailand any more…
ស្រុកចិនគឺជាជង្រុកសម្រាប់ផ្ទុកអង្ករដែលប្រទេសកម្ពុជាត្រូវសង
រាប់សតវត្សទៅមុខ!
China is a Great Friend of Cambodia!!!