ភ្នំពេញៈ តារាចម្រៀងគ្រាប់ពូជរបស់ផលិតកម្ម ខេអេច ប្រូម៉ូហ្សិន រូបសង្ហា សម អាន់ដា បានប្រកាសពីការតាំងចិត្តតាមស្រឡាញ់ តារាសម្តែង និងម៉ូដែលរូបស្រស់ថ្ពាល់ខួច នៅ សូនីតា លុះដល់នាងដើរចែកធៀបការជាមួយប្រុសផ្សេង។ ផ្ទុយពីការតាំងចិត្តរបស់ អាន់ដា នោះ នៅ សូនីតា បានប្រាប់ថា ស្នេហានាង និងលោកអាន់ដា មិនមានទេ មានត្រឹមតែការរាប់អានគ្នាជាមិត្តភក្តិតែប៉ុណ្ណោះ។
Wednesday, 10 October 2012
ស៊ូ វុទ្ធី
ភ្នំពេញ ប៉ុស្តិ៍
តារាសម្តែង និងដើរម៉ូដជំនាន់ក្រោយនាង នៅ សូនីតា វ័យក្មេង។ រូបថត សហការី
កំលោះ សង្ហានិងជាតារាចម្រៀងដ៏ល្បីរបស់ផលិតកម្ម ខេអេច ប្រូម៉ូហ្សិន លោក សម អាន់ដា បានប្រាប់ភ្នំពេញប៉ុស្តិ៍ ដោយមិនមានការលាក់លៀមថា លោកពិតជាមានចិត្តស្រឡាញ់ កញ្ញា នៅ សូនីតា ដោយចិត្តស្មោះមែន ហើយថែមទាំងមានបំណងឲ្យចាស់ទុំចូលទៅចែចូវ កញ្ញានៅ សូនីតា ដល់ឪពុកម្តាយរបស់នាងទៀតផង។
លោក អាន់ដា បានបន្តថា៖«ខ្ញុំមានចិត្តទៅលើតារាសម្តែងកញ្ញា នៅ សូនីតា នេះរយៈ២ឆ្នាំហើយ ពោលគឺតាំងពីពួកយើងចាប់ផ្តើមសម្តែងជាមួយគ្នាដំបូងម្ល៉េះ»។
ប៉ុន្តែ តារាចម្រៀងដែលក្រាញននៀលជាមួយផលិតកម្ម ខេអេច ប្រូម៉ូហ្សិន មិនស្រមើស្រមៃចង់ដូរផលិតកម្មដូចមិត្តរួមទ្រនំ សម អាន់ដា បានបញ្ជាក់ឲ្យដឹងថា រយៈ២ឆ្នាំ ដែលខ្លួនមានចិត្តស្រឡាញ់នាងសូនីតា នេះ ខ្លួនមិនដែលបានសារភាពប្រាប់នាងដោយផ្ទាល់នៅឡើយទេ ក្រៅពីអ្នកទាំងពីរបានត្រឹមបណ្តើរគ្នាទៅចូលរួមកម្មវិធីមិត្តភក្តិម្តងម្កាល និងទៅញ៉ាំអាហារជាមួយគ្នានោះ។
បើទោះជា រយៈកន្លងមក លោកមិនបានសារភាពប្រាប់នាងដោយផ្ទាល់មាត់ និងមិនទាន់ទទួលបានចម្លើយថា យ៉ាងណាពីនាងក៏ដោយ តែលោកអះអាងថា កន្លងមកលោកតែងសម្គាល់មើលចិត្តនាងដែរ ហើយការសម្គាល់នោះ អាចនិយាយបានដែរថា សូនីតា ក៏មានចិត្តលើលោកខ្លះដែរ។
ផ្ទុយ ពីការគិតរបស់លោក អាន់ដា នោះ មុននេះ កញ្ញា នៅ សូនីតា បានប្រកាសដាច់ខាតថា នាងមិនមានចិត្តបង្កើតចំណងស្នេហាជាមួយលោក សម អាន់ដា សូម្បីកូនចិត្តតូចមួយក៏គ្មានដែរ ក្រៅពីចាត់ទុក អាន់ដា ជាមិត្តភក្តិ និងដូចជាបងប្រុសនាងនោះ។ ជាមួយការបដិសេធមិនមានអារម្មណ៍បង្កើតចំណងស្នេហ៍ជាមួយ លោក សម អាន់ដា នោះនាងក៏បានប្រកាសដោយបើកចំហថា មិនទទួលយកស្វាមី ដែលមានអាជីពជាអ្នកសិល្បៈទៀតផង ដោយនាងនិយាយថា មួយជាតិនេះ បើរកប្តីមិនបានក៏មិនយកដែរស្វាមីជាអ្នកសិល្បៈនោះ។
បើទោះជា ស្រីស្រស់ថ្ពាល់ខួចមានមន្ត ស្នេហ៍ សូនីតា ប្រកាសមិនទទួលយកចិត្តស្នេហ៍ពីលោកអាន់ដា យ៉ាងណាក៏ដោយ តែលោក សម អាន់ដា បានប្រកាសពីជំហរតាមសុំស្នេហ៍នាង សូនីតា មិនដកថយឡើយ។ លោកអះអាងថា ថ្ងៃដែលលោកដកចិត្តឈប់តាមស្រឡាញ់កញ្ញា នៅ សូនីតា លុះណាតែថ្ងៃនោះ កញ្ញា នៅ សូនីតា ដើរចែកធៀបរៀបការជាមួយអ្នកផ្សេង តែបើដរាបណា កញ្ញា នៅ សូនីតា នៅទំនេរខ្លួនមួយដូចពេលនេះ នោះគឺបេះដូងលោកនៅតែថតរូបនាងទុកជានិច្ច ហើយលោកក៏មិនទាន់អស់ សង្ឃឹមដែរ។ ជាមួយការតាំងចិត្តនេះទៀត តារាចម្រៀងសង្ហារូបនេះ បានប្រៀបប្រដូចស្នេហាគេមានចំពោះកញ្ញានៅ សូនីតា ទៅនឹងសេចក្តីស្នេហា រវាងនេនទុំ និងនាងទាវទៀតផង។
លោក សម អាន់ដា បានបញ្ជាក់ថា៖«ក្រោយពេលដែលមានបណ្តាញសារព័ត៌មានចេញផ្សាយថា កញ្ញា នៅ សូនីតា និយាយថា នាងមិនមានចិត្តលើខ្ញុំនោះ ខ្ញុំក៏បានខលទៅសួរនាងដែរ តែពេលនោះ នាងបានប្រាប់ខ្ញុំថា ពាក្យនោះនាងមិនបាននិយាយទេ ខាងសារព័ត៌មាននោះគេនិយាយបំផ្លើសហ្នឹង»។
ទាក់ទិននឹងរឿងរ៉ាវ នេះដែរ អ្នកស្រី នង សុភា ជាម្តាយបង្កើតរបស់ កញ្ញា នៅ សូនីតា បានប្រាប់ភ្នំពេញ ប៉ុស្តិ៍ឲ្យដឹងផងដែរ ដោយអ្នកស្រីនិយាយថា៖«រឿងក្មេងៗអ្នកស្រីមិនសូវជាបានដឹងទេ ប៉ុនែ្តអ្នកស្រីអះអាងថា កូនខ្ញុំ សូនីតា នាងនៅក្មេងណាស់ ឆ្នាំនេះអាយុ២២ឆ្នាំ និងនៅសិក្សាទៀត ខ្ញុំមិនទាន់ចង់ឲ្យកូនគិតពីរឿងនេះទេ ទុកឲ្យនាងរៀនបានខ្ពស់ជាងនេះ ដូចប៉ា ចប់អនុបណ្ឌិត»។
ជាមួយគ្នានោះអ្នកស្រីក៏បានលើកឲ្យដឹងទៀតថា៖«សព្វថ្ងៃនេះ ប៉ា ម៉ាក់ នៅផ្ទះក៏កំពុងតែឈឺក្បាលនឹងព័ត៌មានពីរឿង ទំនាក់ទំនងស្នេហ៍កូនជាមួយលោក អាន់ដា នេះដែរ»។ អ្នកស្រីបន្តថា៖«ខ្ញុំដឹងត្រឹមថា លោក អាន់ដា ជាមិត្តភក្តិរាប់អានកូនខ្ញុំធម្មតាៗទេ តែចំណែកស្នេហានោះខ្ញុំមិនបានដឹងទេ »។
ប៉ុន្តែអ្នកស្រីបានបញ្ជាក់ថា អ្នកស្រីមិនប្រកាន់ថា អ្នកនៅក្នុងសិល្បៈឬក្រៅសិល្បៈនោះ ទេ ឲ្យតែកូនពេញចិត្ត ហើយអ្នកនោះនាំចាស់ទុំចូលតាមផ្លូវប្រពៃណីនោះ អ្នកស្រីនឹងគិតគួរតាមនោះហើយរឿងលោកអាន់ដា តាមស្រឡាញ់កូនអ្នកស្រី លុះដល់ពេលណាក៏មិនបានខ្វល់ដែរ ព្រោះថារឿងនេះវាអាស្រ័យលើកូនរបស់អ្នកស្រីមានចិត្ត ឬមិនមានចិត្ត៕