បន្ទាយមានជ័យ: មន្ត្រីជាន់ខ្ពស់សាលាខេត្តបន្ទាយមានជ័យ អះអាងនៅថ្ងៃទី៧ ធ្នូ ថា យុទ្ធនាការវាស់វែងចុះបញ្ជីរដ្ឋបាលដីធ្លី និងធ្វើប័ណ្ណកម្មសិទ្ធិជូនពលរដ្ឋដែលបានកាន់កាប់ប្រើប្រាស់ និងនិងអាស្រ័យផលលើដីពុំទាន់មានការអនុញ្ញាត ព្រោះប៉ះពាល់នឹងដីព្រៃឈើ ដីបរិស្ថាន ដីសម្បទានសេដ្ឋកិច្ច ដីសម្បទានសង្គមកិច្ច គឺជាគោលនយោបាយរបស់រាជរដ្ឋាភិបាលកម្ពុជា មានសម្ដេចតេជោហ៊ុន សែន ជាប្រមុខ ពុំមែនជាគំនាប ឬ អនុសាសន៍របស់បរទេស , គណបក្សនយោបាយ និង អង្គការក្រៅរដ្ឋាភិបាលណាទេ។
ថ្ងៃទី 8 ធ្នូ 2012
ដោយ: សូផុន
CEN
ទាំងនេះ ជាការលើកឡើងរបស់លោក ទ្រី ណារិន អភិបាលរងខេត្តបន្ទាយមានជ័យ និយាយចំពោះមុខពលរដ្ឋរាប់រយនាក់ក្នុងពិធីប្រកាសបិទផ្សាយជាសាធារណៈនូវឯកសារវិនិច្ឆ័យលើការចុះបញ្ជីដីធ្លី នៅភូមិបន្ទាយឆ្មារត្បូង ឃុំបន្ទាយឆ្មារ ស្រុកថ្មពួក ប្រារឰកាលពីថ្ងៃទី៧ ធ្នូ ២០១២ នៅវិទ្យាល័យបន្ទាយឆ្មារ។
លោក ឌៀប ឈួន អភិបាលរងស្រុកថ្មពួក និយាយថា ការបិទផ្សាយទិន្នន័យក្បាលដីពលរដ្ឋនៅស្រុកថ្មពួក មានជាបន្តបន្ទាប់ គឺនៅតាមភូមិ នៃឃុំបន្ទាយឆ្មារ គោករមៀត។ ជានីតិវិធីបន្ទាប់ពីបញ្ចប់ជំហានវាស់វែង។
លោកវិស្វករ លី សារី ប្រធានមន្ទីររៀបចំដែនដីនគរូបនីយកម្ម សំណង់និងសុរិយោដី ខេត្តបន្ទាយមានជ័យ និយាយថា ការធ្វើប័ណ្ណកម្មសិទ្ធិដីធ្លីជូនពលរដ្ឋតាមគោលនយោបាយចាស់ សកម្មភាពថ្មី និងបទបញ្ជាលេខ០១ ប.ប របស់រាជរដ្ឋាភិបាលនេះ បានធ្វើឲ្យពលរដ្ឋមានភាពកក់ក្ដៅ និងបង្កើនផលិតភាពលើដីធ្លីរបស់ពួកគេ។
លោក លី សារី និយាយបន្តថា កន្លងមក ការចែកប័ណ្ណកម្មសិទ្ធិដីធ្លីជូនពលរដ្ឋនៅស្រុកថ្មពួក មាន៤លើកហើយ មានប័ណ្ណ ៦.៨៦២ ប័ណ្ណ។ ដោយឡែកទិន្នន័យក្បាលដី ក្នុងភូមិបន្ទាយឆ្មារលិចត្រូវបិទផ្សាយពេលនេះមានចំនួន ៧៨១ ក្បាលដី ទំហំដី ១៣៤០ ហិកតា នៃពលរដ្ឋ៤៦១គ្រួសារ។ បិទផ្សាយរបៀបនេះ ៦ លើក ហើយៗឯកសារនេះមានរយៈពេល ៣០ ថ្ងៃ សម្រាប់អ្នកកាន់កាប់ក្បាលដីមកពិនិត្យផ្ទៀងផ្ទាត់ និងសុំកែតម្រូវទិន្នន័យរបស់ខ្លួន។
លោក ទ្រី ណារិន អភិបាលរងខេត្តបន្ទាយមានជ័យ និយាយថា រាជរដ្ឋាភិបាលមានសម្ដេចតេជោជាប្រមុខបានចេញគោលនយោបាយវាស់វែងចុះបញ្ជី និងធ្វើប័ណ្ណកម្មសិទ្ធិដីធ្លីនេះជូលពលរដ្ឋ ពុំមែនជាអនុសាសន៍ ឬ គំនាបពីបរទេសពីអង្គការក្រៅរដ្ឋាភិបាល និងគណបក្សនយោបាយណាទាំងអស់។ រាជរដ្ឋាភិបាលមានបំណងឲ្យពលរដ្ឋម្ចាស់កាន់កាប់ដីធ្លីដែលប៉ះពាល់នឹងដីព្រៃឈើដីបរិស្ថាន , ដីសម្បទានសេដ្ឋកិច្ច និងសង្គមកិច្ច ឬជាដីកាន់កាប់ពុំទាន់មានការអនុញ្ញាត ឲ្យមានប្លង់មានលំនឹងក្នុងកម្មសិទ្ធិ និងបង្កើនផលលើដី។
លោក ទ្រី ណារិន និយាយបន្តថា ផុតកំណត់នៃការបិទផ្សាយនេះ ឯកសារនេះត្រូវគណៈកម្មការរដ្ឋបាលបូកសរុបលទ្ធផល និងលើកសំណើផ្ដល់សិទ្ធិលើអចលនវត្ថុ ទៅសាលាខេត្ត ដើម្បីពិនិត្យសម្រេច និងចេញប័ណ្ណកម្មសិទ្ធិជូនម្ចាស់ដី ឬ អ្នកកាន់កាប់ដីណាដែលបានបំពេញត្រឹមត្រូវ និងគ្រប់គ្រាន់តាមលក្ខខណ្ឌច្បាប់៕ S
វាជារឿងធម្មតាទេចំពោះប្រទេសកម្ពុជា ព្រោះជិតដល់ថ្ងៃបោះឆ្នោតសកល ដើម្បីរើសនាយករដ្ឋមន្ត្រីផង ដូច្នេះ ហ៊ុន សែន ត្រូវតែធ្វើឥចឹង!។តែដល់ថ្ងៃក្រោយដីត្រូវចំកន្លែងខ្លាញ់ នោះប្រហែលជារឿងផ្សេងទៀត! តែចំណែកពួកបឹងកក់,បូរីកីឡា,ដីក្រហមវិញ គឺមិនអាចដោះស្រាយបានទេ ព្រោះពួកគាត់ចងគុំនុំនឹងរដ្ឋាភិបាលរួចទៅហើយ បើជួយក៏ពួកគាត់ក៏មិនបោះឆ្នោតឲ្យដែរ។តែកុំភ្លេចក្រោយបោះឆ្នោតរួចរឿងយំនឹងសើច គឺស្រេចទៅលើវាសនាទៀតហើយ ព្រោះកន្លងមកការសន្យាខ្យល់ នឹងស្បថបំពានរាប់មិនអស់ទៅហើយ ចំពោះបក្សប្រជាជន ។រីឯរឿងចែកប័ណ្ណដីធ្លីគឺជាវិធីសាស្ត្រថ្មី! ជំនួសប៊ីចេងសារុងស្ករនឹងអង្ករម្តងតែប៉ុណ្ណោះ !។
ប័ណ្ណកម្មសិទ្ធិ ប្រហែលជាប្តូរស្លឹកឆ្នោតបានមិនតិចទេ ដែលបក្សដ៏ទៃមិនអាចធ្វើបាន។
វាស់ទៅវាស់ទៅអ្នកដែលអត់ដីធ្វើស្រែនៅតែអត់ដដែល,អ្នកដែលមានដីច្រើនរាប់សិបហិចតាគឹអ្នកធំ
បក្សប្រជាជន ពួកវាសម្បយចិត្តណាស់ដែលមានប័ណ្ណកម្មសិទ្ធិស្របច្បាប់៕
ពិតហើយខ្ញុំធ្លាប់បានដឹងពីការចុះវាស់វែងដីលក្ខណះជាប្រពន្ធ័ជាកោលការណ៍របស់រដ្ឋាភិបាល
ប៉ុន្តែការចុះវាស់វែងកន្លងមកមានលក្ខណះយឺតយ៉ាវខណះការផ្លល់ដីសម្បទានកាន់តែមានចំនួនច្រើន
ដែលអាចលើកទឹកចិត្តឲ្យមានវិវាទដីធ្លីកើតឡើងមិនចេះចប់។ បើចង់លុបបំបាត់ទំនាស់ដីធ្លីរដ្ឋាភិបាល ត្រូវតែអនុវត្តនូវការចុះបញ្ជីរដីធ្លីជាលក្ខណះប្រពន្ធ័ឲ្យបានចប់សព្វគ្រប់សិនមុននិងផ្តល់ដីសម្បទាន ឲ្យទៅក្រុមហ៊ុនវិនិយោគណាមួយនោះ។