ដួង លីនដា តំណាង​កញ្ញា​ឯក​កម្ពុជា​ទៅ​ប្រកួត​នៅ​កូរ៉េ

ភ្នំពេញ : តារា​ម៉ូដែល​រូប​ស្រស់​រាង​ខ្ពស់​ស្រឡះ​កម្ពស់​១,៧០​ម៉ែត្រ​ដែល​ទើប​ទទួល​ជ័យលាភី​លេខ១ ក្នុង​ពិធី​ប្រឡង​ជ្រើស​រើស​កញ្ញា​ឯក Cambodia New Star Model Contest – Face of Cambodia ឆ្នាំ​២០១៣ កញ្ញា ដួង លីនដា នឹង​ឡើង​យន្ត​ហោះ​ទៅ​ប្រកួត​សម្រស់​តំណាង​នារី​ខ្មែរ​នៅ​ប្រទេស​កូរ៉េ​ខាង​ត្បូង​នៅ​ពាក់​កណ្តាល​ខែ​មករា​ឆ្នាំ​២០១៣​ខាង​មុខ​នេះ​។

Tuesday, 18 December 2012
ស៊ូ វុទ្ធី
ភ្នំពេញ ប៉ុស្តិ៍

កញ្ញាឯក ដួង លីនដា អាយុ​១៩​ឆ្នាំ។ រូបថត ឈឹម ស្រីនាង

កញ្ញាឯក ដួង លីនដា អាយុ​១៩​ឆ្នាំ។ រូបថត ឈឹម ស្រីនាង

ប៉ុន្តែ​ដំណើរ​ទៅ​ប្រកួត​សម្រស់​នៅ​ប្រទេស​កូរ៉េ​នេះ​មិន​ត្រូវ​បាន​ស្រី​ស្រស់​លីនដា សម្តែង​ការ​ទុក​ចិត្ត​លើ​ខ្លួន​ឯង​ឡើយ ដោយ​នាង​និយាយ​ថា៖​«ខ្ញុំ​នៅ​មិន​មាន​ភាព​ជឿ​ជាក់​លើ​ខ្លួន​ឯង​នោះ​ទេ​»។

កញ្ញា​ឯក​ដែល​ជា​តារា​ម៉ូដែល​មក​ពី Sun Model Cambodia រូប​នេះ​បាន​ឲ្យ​ដឹង​ថា៖ «ខ្ញុំ​នឹង​ឡើង​យន្ត​ហោះ​ទៅ​ចូល​រួម​ប្រកួត​ជ្រើស​រើស​កញ្ញា​ឯក​ប្រចាំ​តំបន់​អាស៊ី​សម្រាប់​ឆ្នាំ​២០១៣​នៅ​ប្រទេស​កូរ៉េ​ខាង​ត្បូង នៅ​ពាក់​កណ្តាល​ខែ​មករា​ខាង​មុខ​នេះ​ដោយ​ស្នាក់​នៅ​ទីនោះ​រយៈ​ពេល​មួយ​សប្តាហ៍​ខណៈ​ការ​ប្រកួត​មាន​តែ​មួយ​ថ្ងៃ»។

ទោះ​ជា​យ៉ាង​ណា ឱកាស​នាំ​យក​សម្រស់​ដ៏​ផូរ​ផង់​ទៅ​ប្រកួត​ស្រី​ស្អាត​ប្រចាំ​តំបន់​អាស៊ី​នេះ​ធ្វើ​ឲ្យ​កញ្ញាដួង លីនដា ស្ទាក់​ស្ទើរ​មិន​មាន​ទំនុក​ចិត្ត​លើ​ខ្លួន​ឯង​ទៅ​វិញ ដោយ​នាង​និយាយ​យ៉ាង​ដូច្នេះ​ថា៖ «ដ្បិត​ថា​ខ្ញុំ​នៅ​ឯ​ការ​ប្រកួត​ប្រជែង​ក្នុង​ស្រុក​ខ្មែរ​ទទួល​បាន​ជ័យលាភី​លេខ១​ទាំង​ផ្នែក​រូប​សម្រស់​ស្លៀក​ពាក់​ប្រពៃណី​ខ្មែរ​ស្អាត និង​កម្ពស់​របស់​ខ្ញុំ​ជាប់​កម្រិត​ស្តង់​ដារ​ម៉ូដែល​ខ្មែរ​ក៏​ដោយ​តែ​សម្រាប់​ការ​ប្រកួត​នៅ​កូរ៉េ​ខាង​ត្បូង ខ្ញុំ​នៅ​មិន​ទាន់​ដឹង​ពី​សម្រស់​លក្ខណ​សម្បត្តិ​របស់​តារា​មក​ពី​បណ្តា​ប្រទេស​ជុំវិញ​ពិភពលោក​៥៥​ប្រទេស​ថា​គេ​មាន​រូប​សម្រស់​ស្អាត និង​កម្ពស់​គេ​ប្រសើរ​ជាង​ខ្ញុំ​ឬ​យ៉ាង​ណា​នោះ​ទេ​យើង​មិន​ទាន់​ដឹង​នៅ​ឡើយ​»។

កញ្ញា​ដួង លីនដា​បាន​បោះ​ជំហាន​ចូល​ប្រឡូក​ក្នុង​វិថី​សិល្បៈ​ផ្នែក​ម៉ូដែល​២ឆ្នាំ ខណៈ​ទទួល​បាន​ភ្លើង​ខៀវ​ក្លាយ​ជា​តារា​ម៉ូដែល​ក្នុង​ក្រុម Sun Model Cambodia ដោយ​ពុំ​ធ្លាប់​ឆ្លង​កាត់​ការ​ប្រឡង​ឬ​ហ្វឹក​ហាត់​ក្នុង​ក្លិប​ណា​មួយ​ឡើយ​។ តែ​យ៉ាង​ណា​ពីរ​ឆ្នាំ​កន្លង​ទៅ​ស្រី​ស្រស់​កម្ពស់​បាន​រូប​នេះ​មិន​សូវ​មាន​ប្រជា​ប្រិយភាព​និង​មាន​មហាជន​ស្គាល់​នាង​ប៉ុន្មាន​ទេ​ក្នុង​ពិភព​សិល្បៈ ព្រោះ​តែ​នាង​មិន​សូវ​លេច​មុខ​តាម​កញ្ចក់​ទូរទស្សន៍​ឬ​ចម្រៀង​ខារ៉ាអូខេ​នានា ដូច​តារា​ដទៃ​ទៀត​។

ស្រី​ស្រស់​វ័យ​១៩ឆ្នាំ​មាន​កំណើត​នៅ​ក្រុង​ប៉ោយ​ប៉ែត​រូប​នេះ​និយាយ​ថា៖ «​ខ្ញុំនៅ​ក្នុង​ក្រុម​Sun Model Cambodia ក្នុង​នាទី​ជា​តារា​បង្ហាញ​ម៉ូដ​រយៈ​ពេល​ជាង​ពីរ​ឆ្នាំ​មក​ហើយ​គ្រាន់​តែ​ទស្សនិក​ជន​មួយ​ចំនួន​ធំ​មិន​ធ្លាប់​បាន​ស្គាល់​រូប​នាង​ខ្ញុំ​»។


ថ្លែង​ទាក់​ទិន​នឹង​ការងារ​សិល្បៈ​វិញ​បុប្ផា​ក្រុង​ប៉ោយ​ប៉ែត ដែល​នឹង​បង្អួត​សម្រស់​លើ​ឆាក​អន្តរជាតិ​រូប​នេះ​បាន​បញ្ជាក់​ឲ្យ​ថា៖ «ជាង​២​ឆ្នាំ​មក​នេះ​ឱកាស​សម្តែង​ភាពយន្ត​មិន​ទាន់​បាន​មួយ​រឿង​នៅ​ឡើយ​ទេ សូម្បី​តែ​តួ​រាយ​រង​ក៏​ដោយ​។​តែ​បើ​ការ​សម្តែង​ចម្រៀង​កាយ​វិការ​ខារ៉ាអូខេ​បាន​បី​បទ​ដែរ​ឲ្យ​ផលិត​កម្ម​ថោន​មាន​បទ បង​នឹក​គេ​ដល់​ថ្នាក់​ចង់​ឈឺ បទ​ស្ងៀម​តែ​មិន​ល្ងង់​និង​បទ​មនុស្ស​បី​នាក់»។

ដោយ​ឡែក​ជាមួយ​នឹង​ឱកាស​ទៅ​ប្រកួត​សម្រស់​តំណាង​ឲ្យ​នារី​កម្ពុជា​នៅ​ក្នុង​ប្រទេស​កូរ៉េ​ខាង​ត្បូង​នោះ​កញ្ញា ដួង លីនដា បាន​ថ្លែង​ក្នុង​ជំនួប​ផ្ទាល់​នៅ​ឯ​ការិយាល័យ​ភ្នំពេញ​ប៉ុស្តិ៍​ថា៖​«ការ​ចាក​ចេញ​ទៅ​ប្រឡង​បវរ​កញ្ញា​តំណាង​ប្រទេស​កម្ពុជា នៅ​ឯ​ប្រទេស​កូរ៉េ​ខាង​ត្បូង​នេះ​គឺ​មាន​ការ​លំបាក​ណាស់ ព្រោះ​មុន​នឹង​ជាប់​ឈ្មោះ​បាន​ទៅ​ប្រទេស​កូរ៉េ​ខ្ញុំ​ត្រូវ​ឆ្លង​កាត់​ការ​ប្រឡង​ប្រកួត​ប្រជែង​គ្នា​យ៉ាង​ស្វិត​ស្វាញ​។ សម្រាប់​ការ​ប្រឡង​ដើម្បី​ចេញ​ទៅ​ប្រកួត​នៅ​ប្រទេស​កូរ៉េ​កាល​ពីថ្ងៃ​ទី១​១ ខែ​ធ្នូ​ឆ្នាំ​២០១២​នេះ គឺ​មាន​អ្នក​ប្រកួត​រហូត​ដល់​ទៅ​២២​នាក់​ឯណោះ ក្នុង​នោះ​មាន​ប្រុស​១១​នាក់​និង​ស្រី​១១​នាក់ »។

ការ​ប្រកួត Cambodia New Star Model contest – Face of Cambodia ឆ្នាំ​២០១៣ បាន​សម្រាំង​យក​បេក្ខនារី​លេខ១ និង​លេខ២​។ សម្រាប់​បុរស​ក៏​ដូច្នោះ​ដែរ ដើម្បី​ទៅ​ប្រកួត​ប្រជែង​លើ​ឆាក​អន្តរជាតិ។

នាង​ក៏​បាន​បង្ហាញ​ឲ្យ​ដឹង​ពី​ចំណុច​ដែល​នាង​បាន​ជាប់​ជា​កញ្ញា​ឯក​លេខ១​ពី​ការ​ប្រកួត​នេះ​ដែរ​ថា៖ «ខាង​គណៈ​កម្មការ​វិនិច្ឆ័យ​គាត់​ឲ្យ​ពិន្ទុ​ខ្ញុំ​ជាប់​លេខ១​នោះ​យោង​ទៅ​លើ​ការ​ស្លៀក​ពាក់​សម្លៀក​បំពាក់​ប្រពៃណី​បុរាណ​ខ្មែរ ទី២​រូប​សម្បតិ្ត​និង​ទី៣​គឺ​កម្ពស់​របស់​ខ្ញុំ​១,៧០​ម៉ែត្រ​»។

ដួង លីនដា បាន​បង្ហើប​ឲ្យ​ដឹង​ទៀត​ថា ការ​ចេញ​ទៅ​ប្រកួត​នៅ​ទឹក​ដី​កូរ៉េ ជា​លើក​ដំបូង​របស់​នាង​នៅ​គ្រា​នេះ​នឹង​ប្រព្រឹត្ត​ទៅ​នៅ​ពាក់​កណ្តាល​ខែ​មករា ឆ្នាំ​២០១៣ ដោយ​មាន​ការ​ចូល​រួម​ពី​កញ្ញា អឿន វល័ក្ខ និង​ប្រហែល​ជា​មាន​វត្តមាន​របស់ កញ្ញា អឿន លៈលីតា ផង​ដែរ។

បើ​ទោះ​ជា​កញ្ញា ដួង លីនដា បាន​ឆ្លង​កាត់​ដំណាក់​កាល​ប្រកួត​យ៉ាង​រំជើប​រំជួល​កាល​ពី​ថ្ងៃ​ទី១១ ខែ​ធ្នូ​កន្លង​ទៅ​នេះ នៅ​ក្នុង​ស្រុក​ក្ដី ក៏​ម្ចាស់​ជ័យលាភី​ក្នុង​កម្មវិធី​នេះ​កំពុង​តែ​សម្តែង​ការ​មិន​ទុក​ចិត្ត​លើ​សម្រស់​ខ្លួន​ខណៈ​ត្រូវ​ប្រឈម​នឹង​កញ្ញា​ឯក​ដល់​ទៅ​ជាង​៥០​នាក់​ទៀត​នោះ។

តារា​ម៉ូដែល​រាង​ស្រឡូន​សាច់​ស​ខ្ចី កញ្ញា ដួង លីនដា បាន​សម្ដែង​នូវ​ភាព​ស្រពេច​ស្រពិល​ថា៖ «ខ្ញុំ​នៅ​មិន​ទុក​ចិត្ត​លើ​រូប​សម្រស់​ខ្ញុំ​ឡើយ ខណៈ​មាន​ស្រី​ស្អាត​មក​ពី​បណ្តា​ប្រទេស​ផ្សេងៗ​គ្នា​ដល់​ទៅ​ចំនួន​៥៥ប្រទេស​ឯណោះ​មក​ធ្វើ​ការ​ប្រកួត​ប្រជែង​នៅ​ប្រទេស​កូរ៉េ​លើក​នេះ»។

បើ​ទោះ​ជា​នាង​មាន​កម្ពស់​រាង​រៅ​ត្រូវ​តាម​ស្ដង់​ដារ​អន្តរជាតិ​ក្ដី ប៉ុន្តែ​នាង​បែរ​ជា​ចាត់​ទុក​លក្ខណ​សម្បត្តិ​នេះ​ជា​ចំណុច​ខ្សោយ​របស់​ខ្លួន​ទៅ​វិញ។

នាង​បាន​បញ្ជាក់​យ៉ាង​ខ្លី​ថា៖ «ចំណុះ​ដែល​ខ្ញុំ​បារម្ភ​នោះ​គឺ កម្ពស់​របស់​ខ្ញុំ​តែ​ម្ដង​ដែល​នាំ​ឲ្យ​ខ្ញុំ​បារម្ភ​តែ​បើ​រូប​សម្រស់​នោះ​ដូច​មិន​ជា​បញ្ហា​ប៉ុន្មាន​ទេ»​៕

What Next?

Recent Articles

3 Responses to "ដួង លីនដា តំណាង​កញ្ញា​ឯក​កម្ពុជា​ទៅ​ប្រកួត​នៅ​កូរ៉េ"

  1. Anonymous says:

    សូមជូនពរឧ្យយទទួលជ័យជំនះ

  2. hour says:

    you will be success, i hope so!

  3. Anonymous says:

    Wishing you to get success for her contest in Korea Bravo Cambodian Women.
    But do all the best for the Khmer Ladies.