សម្តេចនាយក​រដ្ឋមន្ត្រី អំពាវនាវ​ឲ្យ​ក្រុមហ៊ុន​ជី​វៀតណាម គិតគូ​ពី​គុណភាព និង​តម្លៃ ជា​ចំបង​

ភ្នំពេញ: សម្តេចនាយក​រដ្ឋមន្ត្រី ហ៊ុន សែន បានប្រកាស អំពាវនាវ​ទៅ​កាន់​ក្រុមហ៊ុន​ផលិត​ជី​វៀតណាម NPK ដែល​បាន​បើក​សម្ពោធ​ដាក់ឲ្យ​ដំណើរការ កាលពី​ព្រឹក​ថ្ងៃទី​២៥ ខែ​ធ្នូ ឆ្នាំ​២០១២ ឲ្យ​គិតគូ លើ​គុណភាព និង​តម្លៃ បើសិនជា​ចង់​លក់​ជី​កសិកម្ម​ឲ្យដាច់​នៅ​កម្ពុជា​។ សម្តេច ហ៊ុន សែន ក៏​បាន​ប្រកាស មិន​ជួយ​ដល់​ក្រុមហ៊ុន​វៀតណាម​នោះ លើ​ការ​ទប់ស្កាត់​ការ​នាំចូល​ជី​កសិកម្ម​ដទៃទៀត មក​កាន់​កម្ពុជា​នោះ​ឡើយ​។

ថ្ងៃទី 25 ធ្នូ 2012
ដោយ: លី សិលា
CEN

ក្នុង​ពិធី​សម្ពោធ ដាក់​ឲ្យ​ដំណើរការរោង​ចក្រ​វៀតណាម ផលិត​ជី​កសិកម្ម PNK នៅ​ស្រុក​កៀនស្វាយ ខេត្ត​កណ្តាល កាលពី​ព្រឹក​ថ្ងៃទី​២៥ ខែ​ធ្នូ ឆ្នាំ​២០១២ សម្តេច​តេជោ ហ៊ុន សែន បាន​មានប្រសាសន៍ថា “​បញ្ហា​តម្លៃ ជា​បញ្ហា​មួយ​ដ៏​សំខាន់ ដែល​ខ្ញុំ​សូម​អំពាវនាវ​ចំពោះ​ក្រុមហ៊ុន គឺ​បើសិន​ចង់​ឲ្យ​លក់ដាច់ ហើយ​កុំឲ្យ​មាន​ការនាំចូល​ជី​ពី​ក្រៅ​ប្រទេ​ស នោះ​ជម្រើស​ដ៏​ល្អ គឺ​គុណភាព​ឲ្យ​វា​ប្រាកដប្រជា បូក​នឹង​តម្លៃ​ឲ្យ​វា​ថោក​។ បើ​មិន​ដូច្នោះ​ទេ កុំ​មក​ពឹងពាក់​រដ្ឋាភិបាល ថា​សុំ​ជួយ​ទប់ស្កាត់​ការ​នាំចូល​!​។ រដ្ឋាភិបាល​អត់​មាន​នយោបាយ​បែបនេះ​ទេ សូម​បញ្ជាក់​ជូន​លោក ចិន ម៉ា​ខា ដែល​ជា​ប្រធាន​សមាគម​វិនិយោគ​វៀតណាម នៅ​កម្ពុជា ឲ្យ​ហើយ​ស្រេច ព្រោះ​ល្ងាច​នេះ ជួបគ្នា កុំ​លើក​សំណូមពរ​ថា សូម​ជួយ​ទប់ស្កាត់ កុំ​ឲ្យ​នាំ​ចូលជី​ពី​ក្រៅ​ប្រទេស​!​។ អា​រឿង​នឹង រាជរដ្ឋាភិបាល​កម្ពុជា ធ្វើ​អត់​បាន​ទេ ព្រោះ​អានេះ គឺ​ថា​អង្គការ​ពិភពលោក​សុទ្ធ នៅទីនេះ សេរី សេដ្ឋកិច្ច​ផ្សារ​។ បើ​ចង់​លក់​ដាច់ គុណភាព​ល្អ និង​លក់​ឲ្យ​ថោក អា​នឹង​ដាច់​ហើយ​!”​។​

យ៉ាងណាក៏ដោយ ជាមួយនឹង​ប្រសាសន៍​ក្រើនរម្លឹក​ដល់​ក្រុមហ៊ុន​ផលិត​ជី​វៀតណាម​ដូច្នេះ កាលពី​ព្រឹក​មិញ សម្តេច​តេជោ ហ៊ុន សែន ក៏បាន​លើកឡើង​ថា វត្តមាន​របស់​ក្រុមហ៊ុន​ផលិត​ជី​វៀតណាម​ដ៏​ធំ លើកដំបូង នៅ​កម្ពុជា ដែល​មាន​ទីតាំង​នៅ​ស្រុក​កៀនស្វាយ ខេត្ត​កណ្តាល ពេលនេះ បង្កើតបានជា​មូលដ្ឋាន​សម្រាប់​កសិករ​របស់​យើង ក្នុង​មួយ​ចំណែក ហើយ​កាត់បន្ថយ​បាន​នូវ​ការនាំ​ចេញ​រូបិយប័ណ្ណ ទៅ​នាំ​ចូល​ជី​កសិកម្ម ពី​ក្រៅ​ប្រទេស តាមរយៈ​ការផលិត​ក្នុងស្រុក ហើយ​ដែល​មាន​ការវិនិយោគ​ពី​ខាង​ក្រុមហ៊ុន​វៀតណាម មក​ក្នុង​ព្រះរាជាណាចក្រ​កម្ពុជា​។​

​យ៉ាងណាក៏ដោយ សម្តេចនាយក​រដ្ឋមន្ត្រី ហ៊ុន សែន ក៏​បាន​គូសបញ្ជាក់​ជា​ថ្មី​ថា “​អីចឹង ឥឡូវ​បញ្ហា​ការប្រកួតប្រជែង​។ បើ​យើង​ចង់បាន ការលក់​ផលិត​ដាច់ វា​ទាមទារ​ឲ្យមាន​ការ តម្លៃ​របស់​យើង គឺថា ថោក​ដែរ ដើម្បី​ជំនួស​ឲ្យ​ការនាំចូល ហើយ​ខ្ញុំ​សូមបញ្ជាក់​ថា ខ្ញុំ​មិន​អនុវត្ត​នូវ​នយោបាយ​គាំពារ​និយម​ទេ​… ការធ្វើ​ដូច្នោះ វា​ខុសពី​គោលការណ៍​របស់​អង្គការ​ពាណិជ្ជកម្ម​ពិភពលោក​។ ម្យ៉ាងទៀត រោងចក្រ​នេះ ដើម្បី​បាន​លក់ដាច់ ក៏​ត្រូវ​មាន​ការណែនាំ​ពី​របៀប​ប្រើ​ដែរ ព្រោះ​នៅ​ទី​កន្លែង​ខ្លះ ប្រជាពលរដ្ឋ​របស់​យើង រោងចក្រ និង​ផ្នែក​កសិកម្ម ត្រូវ​រួមគ្នា ដើម្បី​ប្រាប់​ពី​របៀប​ប្រើប្រាស់​ជី​កសិកម្ម​…”​។​

​យ៉ាងណាក៏ដោយ សម្តេច​តេជោ ហ៊ុន សែន ក៏​មិន​ភ្លេច​បាន​អំពាវនាវ​ទៅកាន់​ប្រជាកសិករ កុំ​ភ្លេច ក្នុង​ការប្រើប្រាស់​ជីសរីរាង្គ ឬក៏​ជីធម្មជាតិ ដែល​ផ្សំ​ពី​លាមក​គោ មាន់ ជាដើម​។​

​ក្រុមហ៊ុន​ផលិត​ជី​វៀតណាម PNK នៅក្នុង​ឃុំ​សំរោង​ធំ ស្រុក​កៀនស្វាយ ខេត្ត​កណ្តាល តាម​ផ្លូវជាតិ​លេខ​១ បាន​កសាង​កាលពី​ថ្ងៃ​ទី​២៤ ខែ​ធ្នូ ឆ្នាំ​២០០៩ ហើយ​បាន​បើកសម្ពោធ ដាក់ឲ្យ​ដំណើរការ នៅ​ថ្ងៃ​ទី​២៥ ខែ​ធ្នូ ឆ្នាំ​២០១២​។ ក្រុមហ៊ុន​ជី​វៀតណាម​ថ្មី​នេះ ផលិត​ក្នុង​ជំ​ហ៊ាន​ដំបូង ចំនួន ៣៥ ម៉ឺន​តោន ក្នុង​មួយ​ឆ្នាំ ដែល​ផ្តោត​សំខាន់​លើ​ដំណាំ​ស្រូវ​។ នៅ​ដំណាក់កាល​ទី​២ ក្រុមហ៊ុន​ជី​វៀតណាម​នោះ នឹង​ផលិត​ដល់ ៥០ ម៉ឺន​តោន​។​

​កន្លងមក កម្ពុជា មាន​រោងចក្រ​ផលិត​ជី ផូស្វាត នៅឯ​ភ្នំ​ធំ ខេត្ត​បន្ទាយមានជ័យ អាច​ផលិត​ជី​ផូស្វាត ក្នុង​មួយ​ឆ្នាំ​ពី ៦ ទៅ ៧.០០០ តោន​។​

​របាយការណ៍​របស់​លោក ចាន់ សារុន រដ្ឋមន្ត្រី​ក្រសួង​កសិកម្ម រុក្ខាប្រម៉ាញ់ និង​នេសាទ បង្ហាញ​ពី​និន្នាការ​នៃ​ការប្រើប្រាស់​ជី​កសិកម្ម នៅ​កម្ពុជា មាន​ការកើនឡើង ចាប់តាំងពី​ឆ្នាំ​១៩៦០ មកដល់​ពេល​ប​ច្ច​ប្បន្ន រួមមាន​៖

-​ឆ្នាំ​១៩៦០ ការប្រើប្រាស់​ជីគីមី នាំចូល សរុប​ប្រមាណ ២.៧០០ តោន
-​ឆ្នាំ​១៩៦៦ ការប្រើប្រាស់​ជីគីមី​នាំចូល​សរុប ៤.៥០០ តោន ហើយ​ផលិត​ជី​ផូស្វាត ក្នុងស្រុក បាន​ប្រមាណ ៤.០០០ ទៅ ៧.០០០ តោន​ទៀត​
-​ឆ្នាំ​១៩៦៨ ការប្រើប្រាស់​ជីគីមី​នាំចូល​សរុប មាន​ដល់ ៩.២០០ តោន​
-​ក្រោយ​ឆ្នាំ​១៩៧៩ អង្គការ​ស្បៀងអាហារ និង​កសិកម្ម របស់​អង្គការសហប្រជាជាតិ បាន​ផ្តល់​ជី​សម្រាប់​ធ្វើ​ប្រពលវប្បកម្ម ដំណាំ​ស្រូវ ចំនួន ៥ ម៉ឺន​ហិកតា ហើយ​បន្ទាប់​ទៅ បាន​កើន​ដល់ ៩០ ម៉ឺន​ហិកតា នៅ​ទស្សវត្ស​ឆ្នាំ​៩០​។
-​ការប្រើប្រាស់​ជីគីមី មាន​ការកើនឡើង ឆ្នាំ​១៩៧០ ការប្រើប្រាស់​ជីគីមី​សរុប តាមរយៈ​ជំនួយ មាន ២៧.៥០០ តោន​
-១៩៨៦ ការប្រើប្រាស់​ជីគីមី​សរុប តាមរយៈ​ជំនួយ ២៨.៥០០ តោន​
-១៩៩៣ ការនាំ​ចូល​ជីគីមី ៣៥.៥០០ តោន​
-២០០៣ នាំចូល​ជីគីមី មកប្រើប្រាស់ ៤៣.៦២០ តោន​
-២០០៨ នាំចូល​ជីគីមី មកប្រើប្រាស់​សរុប ១៦២.១៤០ តោន​
-២០០៩ នាំចូល​ជីគីមី មកប្រើប្រាស់ ១៧២.០២០ តោន​
-២០១០ នាំចូល​ជីគីមី មកប្រើប្រាស់ ចំនួន ២៥០.៨៥៤ តោន​
-២០១១ នាំចូល​ជីគីមី មកប្រើប្រាស់​ចំនួន ៥១២.៩០០ តោន​
-២០១២ ការនាំ​ចូល​ជីគីមី បាន​កើនឡើង​រហូត​ដល់ ៥៥៦.៤០០ តោន​

​ជាមួយ​នឹង​និន្នាការ​កើនឡើង​នៃ​ការប្រើប្រាស់​ជីគីមី​កសិកម្ម សម្រាប់​ផលិតផល​កសិកម្ម នៅ​កម្ពុជា​ខាងលើនេះ សម្តេចនាយក​រដ្ឋមន្ត្រី ហ៊ុន សែន ក៏​បាន​ប្រកាស​ពី​ការព្យាករណ៍ នៃ​តម្រូវការ​ជី​គីមីកសិកម្ម សម្រាប់​កសិករ​កម្ពុជា ដោយ​សម្តេច​បាន​លើកឡើង​ថា សម្រាប់​ផ្ទៃដី​ដាំ​ដុះ ៤.១០០.០០០ ហិកតា ដែល​កសិករ​កំពុង​ប្រើប្រាស់​ដាំ​ដុះ សព្វថ្ងៃនេះ យើង​ត្រូវការ​ជី​កសិកម្ម រហូត​ទៅ​ដល់ ៦១៧.០០០ តោន ក្នុង​មួយ​ឆ្នាំ​។ ក្នុង​ដំណាំ​ស្រូវ គឺមាន ៣ លាន​ហិកតា ចែកចេញ​ជា ២,៥ លាន​ហិកតា ក្នុង​រដូវវស្សា និង​កន្លះ​លាន​ហិកតា ក្នុង​រដូវប្រាំង​។ ស្រូវ​យើង ត្រូវការ​ជី ១០០ គីឡូក្រាម ក្នុង​មួយ​ហិកតា​។ ដំណាំ​រួមផ្សំ មាន ៨០ ម៉ឺន​ហិកតា ហើយ​យើង​មិនទាន់​គិត​ពី​ដី ដែល​យើង​កំពុង​ដើរ​ចែក​នៅពេល​សព្វថ្ងៃ​ទេ ដោយ​ដំណាំ​រួមផ្សំ​នឹង ត្រូវការ​ជី​កសិកម្ម ជាធ​ម្យមប្រមាណ ២៥០ គីឡូក្រាម ក្នុង​មួយ​ហិកតា​៕​

What Next?

Recent Articles

4 Responses to "សម្តេចនាយក​រដ្ឋមន្ត្រី អំពាវនាវ​ឲ្យ​ក្រុមហ៊ុន​ជី​វៀតណាម គិតគូ​ពី​គុណភាព និង​តម្លៃ ជា​ចំបង​"

  1. ̣̣̣̣̣̣ហាហាហា says:

    តាំងពីដើមមកខ្មែរយើងតែងនិយាយថាវត្ថុអិ្វមួយអោយតែយួនជាអ្នកផលិតគឺសុតតែអន់គុណភាព
    អស់ ( អារបស់យួនវាមិនដែលល្អទេ)

  2. tokkee says:

    what is so crazy let VN do factory in our country ?

  3. 18 Mars says:

    រោងចក្រនោះសរសេរយីហោពីរ មួយភាសាខ្មែរ (ខាងឆ្វង) មួយទៀតភាសាយួន ប្រធានរោងចក្រនេះ អាចមានឋានន្តរស័ក្តប្រហែលឬអាចធំជាង ហ៊ុន សែន