ការប្រគល់កម្មសិទ្ធិដីធ្លី ជាប្រវត្តិសាស្ត្រមួយ សម្រាប់កម្ពុជា

កំពត: ​ការប្រគល់​កម្មសិទ្ធិ​ដីធ្លី​ជូន​ប្រជាពលរដ្ឋ​ដោយ​រាជរដ្ឋាភិបាល​បច្ចុប្បន្ន គឺជា​ប្រវត្តិសាស្ត្រ​មួយសម្រាប់​កម្ពុជា ព្រោះ​តាំងពីដើម​រៀងមក មិនដែល​មានទិដ្ឋភាព​បែបនេះកើតឡើង​ឡើយ​។ ទាំងនេះ គឺជា​ប្រសាសន៍​របស់​តំណាង​សម្តេចនាយក​រដ្ឋមន្ត្រី ក្នុងឱកាស​ចែក​ប័ណ្ណកម្មសិទ្ធិ​ដីធ្លីជូន​ប្រជាពលរដ្ឋ​ឃុំ​ត្រពាំង​ភ្លាំង និង​ឃុំ​ល្បើក ស្រុក​ឈូក ខេត្តកំពត កាលពី​ព្រឹកថ្ងៃទី​២៥ ខែធ្នូ ឆ្នាំ​២០១២ ធ្វើឡើង​នៅ​ឃុំ​ត្រពាំង​ភ្លាំង​។​

ថ្ងៃទី 26 ធ្នូ 2012
ដោយ: ឌីណា
CEN

ប្រជាពលរដ្ឋ​ស្រុក​ឈូក​២៣៥​គ្រួសារ​ទទួល​ប័ណ្ណកម្មសិទ្ធិ​ដីធ្លី​ពី​តំណាង​សម្តេចនាយក​រដ្ឋមន្ត្រី​

ប្រជាពលរដ្ឋ​ស្រុក​ឈូក​២៣៥​គ្រួសារ​ទទួល​ប័ណ្ណកម្មសិទ្ធិ​ដីធ្លី​ពី​តំណាង​សម្តេចនាយក​រដ្ឋមន្ត្រី​

គួរ​បញ្ជាក់ថា កាលពី​ព្រឹក​ថ្ងៃទី​២៥ ខែធ្នូ ឆ្នាំ​២០១២ លោក នៃ ប៉េ​ណា ប្រធាន​គណៈកម្មការ​ទី​៧ ព្រឹទ្ធសភា និង​ជា​តំណាង​សម្តេច​អគ្គមហាសេនាបតី​តេ​ជោ ហ៊ុន សែន នាយករដ្ឋមន្ត្រី នៃ​រាជរដ្ឋាភិបាល​កម្ពុជា បាន​អ​ញ្ជើញ​ចុះ​ចែក​ប័ណ្ណកម្មសិទ្ធិ​ដីធ្លី ជូន​ប្រជាពលរដ្ឋដែល​កាន់កាប់​ដី​ក្នុងភូមិ​ព្រៃ​ពាយ ឃុំ​ត្រពាំង​ភ្លាំង និង​ភូមិ​ត្រពាំង​គគីរ ភូមិ​ត្រពាំងថ្ម ឃុំ​ល្បើក ស្រុក​ឈូក ខេត្តកំពត​។​

របាយការណ៍​របស់លោក ខូ​យ ឃុន​ហ៊ួ​រ អភិបាល​ខេត្តកំពត មាន​ខ្លឹមសារ​ថា ដោយបាន​អនុវត្ត​ន៍យ៉ាង​ត្រឹមត្រូវ​តាម​ស្មារតី​នៃ​អនុ​ក្រិ​ត្យ​លេខ​៤៦ ចុះ​ថ្ងៃទី​៣១ ខែឧសភា ឆ្នាំ​២០១២ ស្តីពីនីតិវិធី​នៃ​ការកសាង​ប្លង់ សុរិយោដី និង​សៀ​ភៅ​គោល​បញ្ជី​ដីធ្លី គឺ​ការចុះបញ្ជី​ដីធ្លី​ជា​ប្រព័ន្ធ គណៈកម្មាធិការ​គ្រប់គ្រង​ដី​រដ្ឋ​ថ្នាក់​ខេត្ត ដំណើរការ​ចុះបញ្ជី​ក្បាលដី​គិត​មកដល់​ថ្ងៃទី​២២ ខែធ្នូ ឆ្នាំ​២០១២ សម្រេចបានការបំពេញ​សលាក​បត្រចំនួន ២៩.២១១ ក្បាលដី​, កត់​ក្នុង​សម្រង់​បញ្ជី​ឈ្មោះ​ម្ចាស់​ដី ២១.២២០ គ្រួសារ​, ផ្ទៀងផ្ទាត់​បាន ២២.១៦៣ គ្រួសារ​, វាស់​បាន​ចំនួន ២៨.២៣៩ ក្បាលដី​, គូរ​បាន​ចំនួន ១៤.១៧០ ក្បាលដី​, បំពេញ​ទម្រង់​បែបបទ​បាន​ចំនួន ២៦.៨៤៣ ក្បាលដី​, បិទ​ផ្សាយ​ទិន្នន័យ​ជា​សាធារណៈ​ចប់ចំនួន ២.៦៧០ ក្បាលដី​, កំពុង​បិទ​ផ្សាយទិន្នន័យ​ចំនួន ១.១៦៧ ក្បាលដី និង​ចែក​រួច​ចំនួន ២.២០១ ប័ណ្ណ​។

ដោយឡែក​ប័ណ្ណកម្មសិទ្ធិ​ដីធ្លី ដែល​ត្រូវ​ផ្តល់ជូន​ប្រជាពលរដ្ឋក្នុងថ្ងៃនេះ មាន​ចំនួន ២៣៥ គ្រួសារ ស្មើនឹង ៣៨៣​ក្បាលដី សម្រាប់​ភូមិ​ចំនួន​បី គឺ​ភូមិ ព្រៃ​ពាយ ឃុំ​ត្រពាំង​ភ្លាំង និង​ភូមិ​ត្រពាំងថ្ម ភូមិ​ត្រពាំង​គគីរ ស្រុក​ឈូក​។​

សំណេះសំណាល​ក្នុងឱកាស​នេះ លោក​នៃ ប៉េ​ណា ប្រធាន​គណៈកម្មការ​ទី​៧ ព្រឹទ្ធសភា​បាន​មានប្រសាសន៍ថា ការប្រគល់​កម្មសិទ្ធិ​ដីធ្លីជូន​ប្រជាពលរដ្ឋដោយ​រាជរដ្ឋាភិបាល​បច្ចុប្បន្ន គឺជា​ប្រវត្តិសាស្ត្រ​មួយ​សម្រាប់​កម្ពុជា ព្រោះ​តាំងពីដើម​រៀងមក មិន​ដែលមាន​ទិដ្ឋភាព​បែបនេះកើតឡើង​ឡើយ​។ ជាការ​ពិត ​រាប់​ជំនាន់​មកហើយ ប្រជាជន​នៅ​តំបន់​ខ្លះ​មិន​ដែលមាន​ប័ណ្ណកម្មសិទ្ធិ​ដីធ្លី​ទេ បើ​មាន​ត្រឹមតែ​បង្កាន់ដៃ​ប៉ុណ្ណោះ​។ មូលហេតុ​ជាច្រើនដែលនាំឱ្យ​ជួប​បញ្ហា​នេះ ដូចជា​សង្គ្រាម​នៅ​ឆ្នាំ​១៩៧០ និង​ឆ្នាំ​បន្តបន្ទាប់ ​ដោយ​បង្ខំ​ប្រជាពលរដ្ឋត្រូវ​រត់​ចេញពី​តំបន់​មួយទៅ​តំបន់​មួយទៀត ហើយ​បោះបង់ចោល​ដីធ្លី​ធ្លាប់​កាន់កាប់​។ លើសពីនោះ ទៀត​ កម្មសិទ្ធិ​គ្រប់យ៉ាង ត្រូវបាន​ដកហូត​ដោយ​ជំនាន់ ប៉ុល ពត​។

​ក្រោយ​ឆ្នាំ​១៩៧៩ ប្រជាពលរដ្ឋ​រួម​កម្លាំង​គ្នា ធ្វើការ​បង្កបង្កើនផល​នៅលើ​ដីធ្លី​ដើម្បី​ចែកគ្នា​រស់​ទៅតាម​លទ្ធភាព និង​ទីកន្លែង​ជាក់ស្តែងដែល​អាច​ធ្វើបាន ​ព្រោះ​ទឹកដី នៃ​ប្រទេសជាតិនាពេលនោះ ពោរពេញ​គ្រាប់មីន និង​យុទ្ធភណ្ឌ​មិនទាន់​ផ្ទុះ​។

​លោក​នៃ ប៉េ​ណា បន្តទៀតថា ក្រោយមក​ដោយ​ចង់ឱ្យ​ប្រជាពលរដ្ឋពង្រីក​ដីធ្លីដាំ​ដុះ ថ្នាក់ដឹកនាំ​ឈានដល់​ដំណាក់កាល​មួយ គឺ​ខិតខំ​ដោះមីន និង​ផ្តល់​លុយកាក់ ឱ្យ​ប្រជាពលរដ្ឋ​ថែមទៀត ដើម្បី​ពួកគាត់​ទៅ​រុករាន​ដី​ថ្មី​។ រហូតដល់ទសវត្ស​ឆ្នាំ​១៩៨០ ថ្នាក់ដឹកនាំ​បាន​ប្រឹងប្រែង​ពង្រឹងកម្មសិទ្ធិ​ដីធ្លី ដោយ​ចេញ​លិខិតស្នាម​រដ្ឋបាល និង​ប័ណ្ណ ភោគៈ​ជូន​ប្រជាពលរដ្ឋ​។​

​យ៉ាងណាមិញ ជាមួយនឹង​ការប្រគល់​ជូន​ប័ណ្ណកម្មសិទ្ធិ​ដីធ្លីនាពេលនេះ ពិតជា​នឹងធ្វើ​ឱ្យ​ដីធ្លី​ក្លាយជា​ទ្រព្យ​ដ៏​មានតម្លៃ សម្រាប់​ប្រើប្រាស់ ដើម្បី​ទទួលបាន​នូវ​ទុន​យកមក​អភិវឌ្ឍន៍​ដីធ្លី និង​ផលប្រយោជន៍ខាង​ផ្លូវច្បាប់​ជាច្រើន​ផ្នែក​ទៀត​។ ដោយ​ឆ្លងកាត់ ដំណាក់កាល​ប្រវត្តិសាស្ត្រ​ដ៏​លំបាកលំបិន​នេះ ទើប​រាជរដ្ឋាភិបាល​ដឹកនាំ​ដោយ​គណបក្ស​ប្រជាជន​កម្ពុជា ដែល​តែងតែ​យល់​សុខទុក្ខ​ប្រជាជន ​កំណត់ថា ដរាបណា​គណបក្ស​ប្រជាជន​កម្ពុជានៅ​ដឹកនាំ​រាជរដ្ឋាភិបាល ដីធ្លី​របស់​ប្រជាកសិករ ដែល​ធ្វើ​អាជីវកម្ម​ក្នុង​លក្ខណៈ​ជា​គ្រួសារ នឹងមិន​ត្រូវបាន​យកពន្ធ​ទេ​។

​លោក​ប្រធាន​គណៈកម្មការ​ទី​៧ ព្រឹទ្ធសភា បញ្ជាក់​បន្ថែមទៀតថា ការប្រគល់​កម្មសិទ្ធិ​ដីធ្លី ដោយ​រាជរដ្ឋាភិបាល​បច្ចុប្បន្ន មិនបាន​រើសអើង​ពី​និន្នាការ​នយោបាយ​ទេ គឺ​ចែកជូន​ទាំងអស់ ហើយ​សូម​ថែរក្សា​ប័ណ្ណ​នេះឲ្យ​បាន​គង់វង្ស ​ដើម្បី​ជា​ប្រយោជន៍ កូនចៅ​តទៅ​អនាគត មិន​ដូច​ការឃោសនា​របស់​ក្រុម​អ្នកប្រឆាំង ដែល​បំផុស​ថា ក្រោយ​បោះឆ្នោត​ឆ្នាំ​២០១៣ គេ​នឹង​ដកហូតយក​វិញ​នោះទេ លោក​សូម​ធានាយ៉ាង​ម៉ឺងម៉ាត់ចំពោះ​បញ្ហា​នេះ​។ សំខាន់​បងប្អូន​ត្រឹមតែ​ចងចាំ នូវ​ពាក្យស្លោក​ដូចចាស់ៗ​និយាយថា “​ផឹកទឹកត្រូវ​នឹក​ដល់​ប្រភព ជ្រក​ម្លប់​ត្រូវ​គិតដល់​អ្នក​ដាំ​” ជាការ​ស្រេច​៕ S

ការប្រគល់កម្មសិទ្ធិដីធ្លី ជាប្រវត្តិសាស្ត្រមួយ សម្រាប់កម្ពុជា

ប្រជាពលរដ្ឋ​ស្រុក​ឈូក​២៣៥​គ្រួសារ​ទទួល​ប័ណ្ណកម្មសិទ្ធិ​ដីធ្លី​ពី​តំណាង​សម្តេចនាយក​រដ្ឋមន្ត្រី​

ការប្រគល់កម្មសិទ្ធិដីធ្លី ជាប្រវត្តិសាស្ត្រមួយ សម្រាប់កម្ពុជា

ប្រជាពលរដ្ឋ​ស្រុក​ឈូក​២៣៥​គ្រួសារ​ទទួល​ប័ណ្ណកម្មសិទ្ធិ​ដីធ្លី​ពី​តំណាង​សម្តេចនាយក​រដ្ឋមន្ត្រី​

ការប្រគល់កម្មសិទ្ធិដីធ្លី ជាប្រវត្តិសាស្ត្រមួយ សម្រាប់កម្ពុជា
ចែក​ប័ណ្ណកម្មសិទ្ធិ​ដីធ្លី ជូន​ប្រជាពលរដ្ឋ

What Next?

Recent Articles

One Response to "ការប្រគល់កម្មសិទ្ធិដីធ្លី ជាប្រវត្តិសាស្ត្រមួយ សម្រាប់កម្ពុជា"

  1. Kon Khmer says:

    នេះមានន័យថា ពលរដ្ឋសព្វថ្ងៃ រស់នៅខុសច្បាប់ហើយមែនទេ ?​