តុលាការក្រុង​ភ្នំពេញ នឹង​បើក​សវនាការ កាត់ទោស​ស្ត្រី​បឹងកក់ និង​បុរី​កីឡា នៅ​រសៀល​នេះ​

ភ្នំពេញ: ​តុលាការ​សាលាដំបូងរាជធានី​ភ្នំពេញ គ្រោង​នឹង​បើកសវនាការ ដាច់ដោយឡែក​ពីគ្នា នៅ​រសៀល​ថ្ងៃ​ទី​២៦ ខែ​ធ្នូ ឆ្នាំ​២០១២ ដើម្បី​ជំនុំជម្រះ លើ​ករណី​ស្ត្រី​អ្នក​ភូមិ​បឹងកក់ អ្នកស្រី យ៉ោម បុប្ផា និង​អ្នកស្រី ទឹម សាក់​មុនី អ្នក​រស់នៅ​សហគមន៍​បុរី​កីឡា ដែល​មាន​ជម្លោះ​ដីធ្លី ។ ស្ត្រី​សកម្មជន​តវ៉ាដីធ្លី​ទាំង​ពីរ​នាក់ ត្រូវបាន​ចោទប្រកាន់ និង​ចាប់ខ្លួន ក្នុង​បទល្មើស​ព្រហ្មទណ្ឌដាច់ដោយឡែក​ពីគ្នា ដែល​អង្គការ​សិទ្ធិមនុស្ស អះអាងថា កើតចេញ​ពី​ការតវ៉ា​ដីធ្លី និង​ការពារ​ផ្ទះសម្បែង​របស់​ពួកគេនៅ​បឹង​កក់ និង​នៅ​បុរី​កីឡា​។​

ថ្ងៃទី 26 ធ្នូ 2012
ដោយ: លី សិលា
CEN

អ្នកស្រី យ៉ោម បុប្ផា និង​អ្នកស្រី ទឹម សាក់​មុន្នី ត្រូវបាន​ផ្តល់​នាមជា​អ្នកទោស​មនសិការ ដោយ​អង្គការ​លើកលែងទោស​អន្តរជាតិ​។ ស្ត្រី​ទាំង​ពីរ ប្រឈមមុខ​នឹង​ទោស​ជាប់ពន្ធនាគារ ពី ៦ ខែ ទៅ ៥ ឆ្នាំ​។​

ជា​បន្តបន្ទាប់ អង្គការ​សង្គម​ស៊ីវិល និង​អង្គការ​សិទ្ធិមនុស្ស​ជាច្រើន បានចេញ​សេចក្ដីថ្លែងការណ៍​ដាច់ដោយឡែក​ពីគ្នា ដោយ​ថ្កោលទោស​ចំពោះ​ការចាប់ខ្លួន​ស្ត្រី​អ្នកភូមិ​បឹងកក់ និង​បុរី​កីឡា​ទាំង​ពីរ​នាក់ ហើយ​បាន​ទាមទារ​ឲ្យ​ដោះលែង​ស្ត្រី​ទាំង​ពីរ​នាក់​ជា​បន្ទាន់ និង​គ្មាន​លក្ខខណ្ឌ​។

ចំណែក​ក្រុម​អ្នកភូមិ​បុរី​កីឡា និង​អ្នក​បឹងកក់ ក៏​បាន​ប្រមូលផ្តុំ​តវ៉ា និង​ដាក់​ញត្តិ​ទៅ​កាន់​ស្ថានទូត​នានា ព្រមទាំង​ស្ថាប័ន​រដ្ឋាភិបាល និង​រដ្ឋសភា ជាដើម ដើម្បី​ឲ្យ​អន្តរាគមន៍​ដោះ​លែង​ស្ត្រី​ទាំង​ពីរ​នាក់ចេញពី​ពន្ធនាគារ​ព្រៃ​ស​។ អន្តរាគមន៍​ពី​ប្រមុខ​ការទូត និង​ប្រធានាធិបតី​ប្រទេស​មហាអំណាច ដូចជា អាមេរិក សហភាព​អឺរ៉ុប ជាដើម ក៏​ត្រូវបាន​អ្នកភូមិ​ដាក់​ញត្តិស្នើសុំ​ផងដែរ​។​

​យ៉ាងណាក៏ដោយ ក្នុង​រឿង​ចោទប្រកាន់ និង​ឃុំខ្លួន​ស្ត្រី​នៅ​បឹងកក់ និង​នៅ​បុរី​កីឡា​នេះ ត្រូវបាន​មន្ត្រី​តុលាការអះអាងថា មិន​ជាប់​ពាក់ព័ន្ធ​នឹង​ការតវ៉ា​ដីធ្លី​ទេ តែ​ជា​រឿង​ព្រហ្មទណ្ឌ ដែល​ស្ត្រី​ទាំងពីរបាន​ប្រព្រឹត្ត​បទ​ល្មើស​ច្បាប់​ប៉ុណ្ណោះ​។​

​អង្គការ​សិទ្ធិមនុស្ស លីកាដូ កាលពី​ថ្ងៃ​ទី​២១ ខែ​ធ្នូ ឆ្នាំ​២០១២ បាន​ផ្សព្វផ្សាយ​នូវ​ប្រវត្តិ នៃ​ការតស៊ូចូលរួម​តវ៉ា​ដីធ្លី​របស់​ស្ត្រី​បឹងកក់ និង​ស្ត្រី​បុរី​កីឡា ទាំង​ពីរ​រូប ដែល​ត្រូវបាន​តុលាការ​ចោទប្រកាន់ក្នុង​បទល្មើស​ព្រហ្មទណ្ឌ ហើយ​ចាប់​ឃុំឃាំងនៅ​ពន្ធនាគារ​ព្រៃ​ស​។

​ស្ត្រី​ទាំង​ពីរ ត្រូវបាន​គេ​សរសេរ​ផ្សព្វផ្សាយក្នុង​អត្ថបទ​ពីរ ដាច់ដោយឡែក​ពីគ្នា ដែល​មាន​ចំណងជើង​ថា អ្នកការពារ​សិទ្ធិមនុស្ស អ្នកស្រី យ៉ោម បុប្ផា “​ម្តាយ​មួយរូប​ទៀត ពី​សហគមន៍​បឹងកក់ ដែល​ត្រូវបាន​ឃុំខ្លួន​” និង​អត្ថបទ​មួយទៀត មាន​ចំណងជើង​ថា អ្នកការពារ​សិទ្ធិមនុស្ស អ្នកស្រី ទឹម សាក់​មុនី្ន “​ជាប់ពន្ធនាគារ ព្រោះ​ការទាមទារ​សិទ្ធិ​លើ​ផ្ទះសម្បែង​”​។​

​អ្នកស្រី យ៉ោម បុប្ផា មាន​អាយុ ២៩ ឆ្នាំ ត្រូវបាន​ចាប់ខ្លួននៅ​ថ្ងៃ​ទី​៤ ខែ​កញ្ញា ឆ្នាំ​២០១២​។ អ្នកស្រី ត្រូវបាន​តុលាការ​ចោទប្រកាន់​ពីបទប្រើ​អំពើហិង្សាដោយ​ចេតនា តាមរយៈ​ការ​វាយ​លើ​បុរស​អ្នករត់ម៉ូតូឌុប​ពីរ​នាក់​។ អ្នកស្រី យ៉ោម បុប្ផា ត្រូវបាន​ឃុំឃាំង​នៅ​ពន្ធនាគារ​ព្រៃ​ស ( មណ្ឌល​អប់រំ​កែប្រែ​ទី​២ )​។

​ចំណែក​អ្នកស្រី ទឹម សាក់​មុន្នី អាយុ ៦៤ ឆ្នាំ អ្នក​រស់នៅ​សហគមន៍​បុរី​កីឡា ត្រូវបាន​ចាប់ខ្លួនកាលពី​ថ្ងៃ​ទី​៥ ខែ​កញ្ញា ឆ្នាំ​២០១២​។ អ្នកស្រី ត្រូវបាន​តុលាការ​ចោទប្រកាន់​ពីបទ ញុះញង់ឲ្យ​ប្រព្រឹត្ត​បទឧក្រិដ្ឋ តាម​ពាក្យបណ្តឹង​របស់​ក្រុមហ៊ុន ផាន​អ៊ី​ម៉ិច ដែល​ទទួលបាន​សិទ្ធិ​អភិវឌ្ឍន៍​ផ្ទះល្វែងនៅ​បុរី​កីឡា​៕​ S

What Next?

Recent Articles