Wednesday, 09 January 2013
ឆាយ ច័ន្ទនីដា
ភ្នំពេញ ប៉ុស្តិ៍
លោកស្រី ជូ ប៊ុនអេង រដ្ឋលេខាធិការក្រសួងមហាផ្ទៃ និងជាប្រធានក្រុមការងារទេសន្តរប្រវេសន៍ បានសរសេរនៅក្នុងរបាយការណ៍ ១២ ទំព័រ បន្ទាប់ពីដំណើរទស្សនកិច្ចរយៈពេល ២ ថ្ងៃ របស់ក្រុមការងារលោកស្រី ទៅកាន់ប្រទេសម៉ាឡេស៊ី កាលពីដើមខែធ្នូ ឆ្នាំ ២០១២ ដើម្បីស្វែងយល់ពីស្ថានភាពនៃពលករធ្វើការតាមផ្ទះនៅទីនោះ។ គណៈកម្មាធិការ នៃក្រុមការងារទេសន្តរប្រវេសន៍កម្ពុជា មានសមាជិក២១ នាក់ រួមមន្ត្រីអង្គការសហប្រជាជាតិ និងអង្គការក្នុងស្រុកផងដែរ បានជួបជាមួយក្រុមមន្ត្រី និងអង្គការក្រៅរដ្ឋាភិបាលនៅប្រទេសម៉ាឡេស៊ី និងស្ថានទូតកម្ពុជានៅទីនោះ ព្រមទាំងជួបជាមួយពលការិនីចំនួន ១៣ នាក់ដែលកំពុងស្នាក់នៅផ្ទះសុវត្ថិភាព នៃប្រទេសម៉ាឡេស៊ី។ របាយការណ៍សរសេរថា ការជួបជាមួយស្ត្រីទាំង ១៣ នាក់ បានបង្ហាញពីទំរង់នៃការរំលោភបំពាន គឺ មានការរំលោភបំពានផ្លូវភេទ ការជួញដូរជនទេសន្តរប្រវេសន៍ ការលក់ទៅផ្ទះបន ការរំលោភលើការងារ ដោយមិនឲ្យប្រាក់កម្រៃ ក៏ដូចជាបង្ខិតបង្ខំឲ្យធ្វើការងារហួសកម្លាំង។
ក្នុងករណី រំលោភបំពានធ្ងន់ធ្ងរមួយ «មានកុមារីអាយុទើប ១៧ ឆ្នាំ ធ្វើការជាងពីរឆ្នាំមិនទទួលប្រាក់កម្រៃទាល់តែសោះ និងមានម្នាក់រងគ្រោះ ដោយហិង្សាចាក់នឹងកន្រៃ្តជាច្រើនកន្លែងលើខ្លួន និងម្នាក់ ត្រូវគេវាយបាក់ថ្គាម ពិបាកហាមាត់ ហើយម្នាក់ត្រូវគេកាត់ស្លឹកត្រចៀក ខណៈម្នាក់ទៀតត្រូវគេមួលស្លឹកត្រចៀកក្រពឹតខ្ទេចខ្ទី»។
របាយការណ៍នេះ ផ្តល់នូវស្ថានការណ៍ពិតដ៏កម្រនៃការរំលោភបំពានដ៏ធ្ងន់ធ្ងរមួយ ក្នុងស្ថានភាពដែលការផ្អាកបញ្ជូនពលករទៅម៉ាឡេស៊ីនៅតែមិន ទាន់លើកលែង តាំងពីខែតុលា ឆ្នាំ២០១១មក ដោយហេតុតែមានការរាយការណ៍ពីការបង្ខំឲ្យធ្វើការលើសកម្លាំង និងការរំលោភបំពានយ៉ាងធ្ងន់ធ្ងរ រហូតដល់ធ្វើឲ្យពលករកម្ពុជាជាច្រើនស្លាប់ និងខ្លះទៀតពិការ ឬក្លាយជាវិកលចរិត។
ក្នុងជំនួបជាមួយមន្ត្រីម៉ាឡេស៊ី ភាគីកម្ពុជា បានស្នើសុំឲ្យមានការកែទម្រង់ខ្លះនៃប្រព័ន្ធតាមដានត្រួតពិនិត្យ ពលករកម្ពុជា ដោយពង្រឹងកិច្ចសហការជាមួយគ្នា។
របាយការណ៍នេះ សរសេរថា៖ «លោកស្រី Syuhaida Binti Abdul Wabhab Zen អនុរដ្ឋលេខាធិការទី២ក្រសួងមហាផ្ទៃម៉ាឡេស៊ីទទួលស្គាល់បញ្ហាថា ពិតជាមានការរំលោភបំពាន និងកេងប្រវ័ញ្ចលើពលការិនីកម្ពុជា តែចំនួននៃករណីរំលោភបំពាន មានតិចតួច បើធៀបនឹងចំនួនពលករដែលបានទទួលផលប្រយោជន៍ពីការងារនេះ។ ប៉ុន្តែប្រព័ន្ធផ្សព្វផ្សាយនិងអង្គការក្រៅរដ្ឋាភិបាល មានជំហរប្រឆាំងរដ្ឋាភិបាលជាអ្នកបំប៉ោងបញ្ហា ទើបសភាពការណ៍ទៅជាបែបនេះ»។
ទោះ យ៉ាងណា លោកស្រីជូ ប៊ុនអេង បានថ្លែងតបវិញថា ៖ «ទោះបីចំនួននៃភាពរងគ្រោះ មិនមានច្រើនករណីក្តី បើប្រៀបធៀបនឹងចំនួនពលករមកធ្វើការនៅម៉ាឡេស៊ីជាងបីម៉ឺននាក់ តែក៏មិនគួរឲ្យមានតទៅទៀតដែរ»។ លោកស្រីបន្តថា៖«ជាការអនុវត្ត(ចំពោះម៉ាឡេស៊ី) ជាក់ស្តែង នៅតែមានចំណុចខ្វះខាត ទើបបានជានៅតែមានការរំលោភបំពាន។ ភាគីកម្ពុជា សូមស្នើឲ្យរដ្ឋាភិបាលម៉ាឡេស៊ី ជួយសង្គ្រោះ និងការពារពលករកម្ពុជាដែលរងនូវការបំពានផ្លូវកាយ ផ្លូវភេទ ស្មារតី និងការកេងប្រវ័ញ្ចប្រាក់បៀវត្សរ៍»។
ស្របជាមួយគ្នានេះ ក្រុមហ៊ុននិយោជក របស់ម៉ាឡេស៊ី បានស្តីបន្ទោស ដល់ប្រព័ន្ធផ្សព្វផ្សាយ និងអង្គការដែលផ្តល់ព័ត៌មានធ្វើឲ្យ មានការយល់ច្រឡំ។ អ្នកតំណាងក្រុមហ៊ុននិយោជក ប្រាប់លោកស្រី ជូ ប៊ុនអេង ក្នុងទស្សនកិច្ចនេះថា ពួកគេបានខាតបង់ប្រាក់អស់ប្រមាណ៤០លានរីងហ្គីត ស្មើ៧លានដុល្លារអាមេរិក ក្នុងពេលដែលរដ្ឋាភិបាលកម្ពុជា បានផ្អាកបញ្ជូនពលករ ទៅម៉ាឡេស៊ី ហើយស្នើឲ្យមានការលើកលែងឲ្យបានឆាប់រហ័ស។
លោកស្រី ជូ ប៊ុនអេង ថ្លែងថា៖ «រដ្ឋាភិបាលកម្ពុជា មិនមែនជឿតែលើរបាយការណ៍របស់អង្គការនិងប្រព័ន្ធផ្សព្វផ្សាយទេ តែយើងបានទទួលពាក្យបណ្តឹងជាច្រើន ពីពលការិនីរងគ្រោះ។ ក្នុងនាមរដ្ឋាភិបាលត្រូវបង្ខំចិត្តដោះស្រាយ ដោយផ្អាកការបញ្ជូន រហូតដល់មានដំណោះស្រាយសមស្រប ចំពោះបញ្ហានេះ»។ កិច្ចប្រជុំនៅម៉ាឡេស៊ី ក៏មានការស្នើសុំ ឲ្យមានការបង្កើតគណនីផ្ទាល់ខ្លួន សម្រាប់ដាក់ប្រាក់ពលករ ប្រព័ន្ធសមស្របមួយសម្រាប់គ្រប់គ្រងចំនួនពលករ ពីក្រសួងការងារ អាសយដ្ឋាន ឬទីកន្លែងធ្វើការ។
លោក សំលៀង សិលា នាយកអង្គការសកម្មភាពដើម្បើកុមារ ដែលចូលរួមក្នុងដំណើរទស្សកិច្ចនេះ ថ្លែងថា ទស្សនកិច្ចនេះក៏មាននិយាយពីការខ្វះខាត នូវធនធានបុគ្គលិកសម្រាប់បម្រើការងារទេសន្តរប្រវេសន៍ដែលមានករណី ច្រើនត្រូវដោះស្រាយផងដែរ។
មន្ត្រីសម្របសម្រួលកម្មវិធីជាតិ នៃអង្គការ UN Women លោក រស់ វ៉ា បានថ្លែងថា ទស្សនកិច្ចនេះ ជាការបង្ហាញឲ្យឃើញ ពីកិច្ចខិតខំប្រឹងប្រែងរបស់រដ្ឋាភិបាល ក្នុងការដោះស្រាយបញ្ហាទេសន្តរប្រវេសន៍ ដើម្បីឲ្យមានភាពប្រសើរឡើងវិញ បន្ទាប់ពីរដ្ឋាភិបាលបានប្រកាសផ្អាក៕
រាយការណ៍បន្ថែម Abby Seiff
មិនចាំបាច់ផ្អាកទេ យកល្អបិទតែម្តងទៅ ព្រោះពួកម៉ាឡេស៊ីនេះចាត់ទុកស្រ្តី ជាទាសករផ្លូវភេទដាច់ថ្លៃ