ភ្នំពេញ: កាលពី ទសវត្សរ៍៧០ មានកុមារាម្នាក់ត្រូវបានគេចាប់ជីកដីកប់ត្រឹមក ហើយត្រៀមនឹងស្រោចទឹកក្តៅពីលើដើម្បីសម្លាប់ចោលទៅហើយ តែសំណាងល្អបានរស់រានមានជីវិតមកវិញ។ កុមារាម្នាក់នេះ មហាជនធ្លាប់តែស្គាល់គាត់ថា ឈ្មោះ នាយ “ចាប ចៀន” ជាតារាកំប្លែងមួយរូបមានឈ្មោះបោះសំឡេងប្រចាំនៅកម្ពុជា។
ថ្ងៃទី 9 មករា 2013, ម៉ោង 02:17:PM
ដោយ: វឿន សាវុធ
CEN
ចាបចៀនស្ថិតនៅក្នុងចំណោមតារាកំប្លែងវ័យចំណាស់ម្នាក់ដោយបានកសាងកេរ្ត៍ឈ្មោះចាប់តាំងពីទស្សវត្សរ៍១៩៨០។ ប៉ុន្តែលោក នៅតែរក្សាកេរ្ត៍ឈ្មោះរបស់លោកបាននៅក្នុងពិភពសិល្បះ។
ជីវិតកុមារភាពដ៏កម្សត់របស់ចាមចៀន
លោក “អ៊ុក សុវណ្ណារិទ្ធ” បានឆ្លងកាត់របបខ្មែរក្រហម ដោយពេលនោះ គេបានជម្លៀសគាត់ទៅកាន់ឃុំដូង ស្រុកឈូក ខេត្តកំពត។ លោក បានរាប់រៀបប្រាប់ថា នៅសម័យនោះគាត់នៅជាកុមារនៅឡើយ ដែលមានអាយុទើបតែ១២ ទៅ១៣ឆ្នាំ។ ខ្មែរក្រហមបានឲ្យរូបគាត់ ឃ្វាលគោ-ក្របីលុះក្រោយមករស់នៅទីនោះអស់រយៈពេល២ ទៅ៣ឆ្នាំ គេបានចាប់លោកឲ្យរែកដី ជីកប្រឡាយ លើកទំនប់ទឹក ថែមទាំងបានគម្រាមគំហែងដល់គាត់ទៀតផង។ ណាមួយគាត់ត្រូវបរិភោគអាហាររួមគា្នជាមួយសហករដូចជនរងគ្រោះដទៃទៀតដែរ។ ចំពោះជីវិតជូរចត់ ដែលលោក បានចាំរហូតមកដល់សព្វថ្ងៃនេះ គាត់បាននិយាយថា “ដោយកាលណោះខ្ញុំនៅក្មេងមិនទាន់ដឹងអ្វីនៅឡើយ ហើយមានគេមកបបួលខ្ញុំទៅលួចដកដំឡូង និងបេះផ្លែដូងមកស៊ី ព្រោះខ្មែរក្រហមបង្អត់បាយយូរថ្ងៃហើយ។ ខណៈពេលនោះដែរ ត្រូវខ្មែរក្រហមចាប់ខ្ញុំបាន ដោយជីកដីកប់ត្រឹមក ដែលមានគ្នា៤ ទៅ៥នាក់ ហើយគេបានដាំទឹកក្តៅពុះត្រៀមនឹងយកមកស្រោចពីលើខ្ញុំដោយចោទខ្ញុំថាជា “ខ្មាំង” ត្រូវកំទេចចោលនៅចំពោះមុខមហាជន តែត្រូវបានម្តាយឪពុករបស់ខ្ញុំជួយទាន់ពេលវេលាក៏មានជីវិតរស់មកដល់សព្វថ្ងៃនេះទៅ ”។
ចាបចៀន មានឈ្មោះ ពិតប្រាកដថា “អ៊ុក សុវណ្ណារិទ្ធ” ។លោក កើតនៅថ្ងៃទី០៤ ខែឧសភា ឆ្នាំ១៩៦៤ នៅសង្កាត់លេខ៣ ខ័ណ្ឌទួលគោក រាជធានីភ្នំពេញ (កើតនៅមន្ទីរពេទ្យកាល់ម៉ែត)។ លោក មានបងប្អូនបង្កើតចំនួន៤នាក់ ប្រុស៣នាក់ និងស្រី១នាក់ ហើយគាត់ជាកូនបងគេក្នុងចំណោមកូនទាំង៤នាក់នោះ។
ម្យ៉ាង លោក “អ៊ុក សុវណ្ណារិទ្ធ” ហៅនាយ “ចាប ចៀន” នេះ មានកម្ពស់១,៦៣ម៉ែត្រ និងមានទម្ងន់៥៦គីឡូក្រាម។ លោក មានឪពុកឈ្មោះ “អ៊ុក ហុកស្រេង” ហៅ “អ៊ុក នាង” អតីតគ្រូបង្រៀននៅសម័យ ព្រះមហាវីរក្សត្រសម្តេច សីហនុ ចំណែកឯម្តាយឈ្មោះ “កែវ វ៉ាន់ថា” ជាមេផ្ទះ តែបច្ចុប្បន្នលោកទាំងពីរនាក់នេះទទួលអនិច្ចកម្មហើយ។
ចំពោះលំនៅដ្ឋានរបស់លោក “អ៊ុក សុវណ្ណារិទ្ធ” នាពេលបច្ចុចប្បន្ន នៅបុរីពិភពថ្មី ស្ថិតក្នុងសង្កាត់ភ្នំពេញថ្មី ខ័ណ្ឌសែនសុខ រាជធានីភ្នំពេញ។
ជីវិតនៅក្នុងការសិក្សា
ចាប់តាំងពីឆ្នាំ១៩៧៩មក លោកបានរៀននៅសាលាផ្សារដើមថ្កូវ បន្ទាប់មករៀនសាលាចតុមុខ ក្រោយមកទៀតទៅរៀនសាលាស៊ីសុវត្ថី និងសាលាបាក់ទូក និងជាចុងក្រោយបានចូលរៀននៅសាកលវិទ្យាល័យភូមិន្ទភ្នំពេញវិចិត្រសិល្បៈ (១៩៨២-១៩៨៣) ដែលបានរៀនទៅទីនេះអស់រយៈពេលជិត១០ឆ្នាំ រហូតមកដល់ឆ្នាំ១៩៩១-១៩៩២ ក៏ឈប់។
ជីវិតស្នេហារបស់ចាបចៀន
យើងងាកមកមើលពីជីវិតអាពាហ៍ពិពាហ៍របស់លោក “អ៊ុក សុវណ្ណារិទ្ធ” វិញម្តង ដោយលោក “អ៊ុក សុវណ្ណារិទ្ធ” បានរៀបមង្គលការ ជាមួយអ្នកស្រី “សែន សុវណ្ណធី” នៅឆ្នាំ១៩៩៦-១៩៩៧ ដែលពេលនេះ គាត់ទទួលបានកូនចំនួន៣នាក់ហើយ ក្នុងចំណោមកូនទាំង៣នោះ មានស្រី២នាក់ និងប្រុស១នាក់។ ចំពោះកូនស្រីបងឈ្មោះ “អ៊ុក រិទ្ធីនាថ” មានអាយុជាង១០ឆ្នាំហើយ និងបានរៀនថា្នក់ទី៦-៧ នៅសាលាឯកជនមួយកន្លែងនៅទីក្រុងភ្នំពេញ។ រីឯកូនប្រុសទី២ ឈ្មោះ “អ៊ុក រិទ្ធរ៉ូឡិនឌូ” និងកូនស្រីម្នាក់ទៀត ឈ្មោះ “អ៊ុក រិទ្ធីរីហាណា” ទើបមានអាយុ១ខួបជាងប៉ុណ្ណោះ។
ដំណើរផ្លូវឆ្ពោះមកកាន់តារាកំប្លែង
លោក “អ៊ុក សុវណ្ណារិទ្ធ” បានធ្លាប់ជាជានិស្សិតនៃសាកលវិទ្យាល័យភូមិន្ទភ្នំពេញវិចត្រសិល្បៈ ហើយសិក្សាផ្នែកសៀក នៃមហាវិទ្យាល័យ នាដសាស្ត្រ។ លោក បានប្រាប់ថា ក្រោយមកក៏មានផ្នែកខ្សែវីដេអូខ្មែរនៅទសវត្សរ៍ទី៨០ក្រាស់ គាត់បានចូលរួមថតជាខ្សែវីដេអូដំបូង ដែលមាន លោក “ណុប សុវត្ថិ” ជាអ្នកដឹកនាំរឿង ព្រោះគាត់ធ្លាប់ធ្វើការជាមួយលោកនៅនាយកដ្ឋានសិល្បៈ ពីមុនមក។
លោក បានបន្តថា បន្ទាប់មកបានថតរឿង “យំ១ពាន់ដង” ជាលោក “ជាតិ វណ្ណៈ” និងមានតួអង្គច្រើនទៀតតែគាត់មិនចាំទេ ដែលក្នុងរឿងនេះ លោក ដើរតួជាអ្នកវាយតប់ ហក់លោត ឆ្វែកឆ្វាច ប៉ុណ្ណោះ។ លុះក្រោយមក គាត់បានថតជាមួយលោក “ណុប សុវត្ថិ” ដែលលោក “អ៊ុក សុវណ្ណារិទ្ធ” ដើរតួជាអ្នកកំប្លែង ឈ្មោះនាយ “ចាប ចៀន” ក្នុងរឿង “កាត់បេះដូងដើម្បីបង”។ តាំងពីពេលនោះមក មហាជន ឬទស្សនិជនចាប់ផ្តើមស្គាល់លោកកាន់តែខ្លាំង ថាជាតួឈ្មោះ នាយ “ចាប ចៀន” រហូតមកដល់បច្ចុប្បន្ននេះ ក្នុងស្នាដៃរបស់លោក “គង់ ប៊ុនឈឿន” ក្នុងរឿង “នាងរំសាយសក់” ដែលបានដើរតួជាអ្នកកំប្លែងតាំងពីពេលនោះមក។
លោក បន្ថែមថា ចាប់ទាំងពីបានចូលរួមសម្តែងសិល្បៈតាំងពីឆ្នាំ១៩៨៣មកដល់ឆ្នាំ២០១៣នេះ មានរយៈពេល៣០ឆ្នាំ។ ដោយរៀន អស់រយៈពេល ៣ឆ្នាំ សាលាបានអនុញ្ញាតឲ្យចេញសម្តែងហើយ ប្រហែលជានៅឆ្នាំ១៩៨៥គឺចាប់ផ្តើមចេញសម្តែងជាប់រហូតមក។
គាត់ បានប្រាប់ទៀតថា លោកមិនមានបងប្អូនណាម្នាក់ជាអ្នកសិល្បៈទេ មានតែគាត់ម្នាក់ប៉ុណ្ណោះក្នុងចំណោមបងប្អូនទាំងបួននាក់។ តែដោយឡែកវិញ មានជីដូនខាងឪពុកម្នាក់ ឈ្មោះ “ម៉ម កាឡុង” ជាគ្រូបង្ហាត់ផ្នែកល្ខោននៅព្រះរាជបរមរាជវាំង។
ស្នាដៃដែលទទួលបាន
នាយ ចាប ចៀន មានស្នាដៃជាច្រើន ដូចជាទទួលបានគ្រឿងឥស្សរយស និងព្រះរាជ្យក្រឹតពីព្រះមហាវីរក្សត្រ សម្តេច សីហនុ ។ លោកក៏បានទទួលមេដាយមាស និងលិខិតសរសើរ ពីអង្គការមួយចំនួនដូចជា អង្គការអាលីកាដូ ដោយលោក បានចូលរួមក្នុងយុទ្ធនាការប្រឆាំងនឹងអំពើទារុណកម្មលើកុមារ ដែលជាកុមារអនីតិជនត្រូវបានគេធ្វើបាប។ លោក បានបន្តថា ក្នុងចំណោមអ្នកសិល្បៈទាំងអស់មានតែលោកម្នាក់ប៉ុណ្ណោះដែលបានធ្វើការខាងនេះបានច្រើន និងទទួលបានប័ណ្ណសរសើរពីយុទ្ធនាការនេះ។ លោក បានចូលរួមកិច្ចការជាមួយក្រសួងអភិវឌ្ឍន៍ជនបទស្តីពីអនាម័យ ដែលមានធនាគារពិភពលោក បានចូលរួមដែរ ហើយបានតែងតាំងគាត់ជាអ្នកនាំសារ។
ឱកាសចេញទៅក្រៅប្រទេស តារាកំប្លែងប្រកបដោយភាពក្រមិចក្រមើម និងមានវោហាខ្ពស់ នាយ “ចាប ចៀន” មិនត្រឹមតែបានសម្តែងក្នុងស្រុកតែប៉ុណ្ណោះទេ ថែមទាំងបានចេញទៅសម្តែងនៅឯក្រៅប្រទេសទៀតផង ដូចជាប្រទេស បារាំង(ឆ្នាំ១៩៩៧) កាណាដា អូស្ត្រាលី(ឆ្នាំ២០០០) និងអាមេរិក (គាត់ចេញទៅបាន៤លើកហើយ នៅឆ្នាំ១៩៩៤, ១៩៩៨ និង២០០៥-២០០៦ បានទៅពីរជើងទៀត)។
ការងារពេលបច្ចុប្បន្ន
តារាកំប្លែង ដែលមានឈ្មោះ បោះសំឡេងតាំងពី ទស្សវត្សន៍ទី៨០ នាយ “ចាប ចៀន” មិនទុកខ្លួនឲ្យនៅទំនេរនោះទេ គឺគាត់បានធ្វើជាពិធីករចល័តគ្រប់ប៉ុស្តិ៍ទូរទស្សន៍ទាំងអស់ ដូចជាប៉ុស្តិ៍លេខ៥ អាស៊ីអាគ្នេយ៍ ស៊ីធីអិន និងបាយ័ន ដែលមានមុខញឹកញាប់ជាងគេក្នុងចំណោមទូរទស្សន៍ទាំងប៉ុន្មាននេះ។ លោក បានប្រាប់ឲ្យដឹងបន្ថែមថា គាត់បានធ្វើជាទាហានស័ក្តិ៥ ដែលមានឋានន្តរជាវីរសេនីយឯក នៅកងឯកភាពអង្គរក្សរបស់សម្តេចតេជោ ហ៊ុន សែន ឯបន្ទាយទួលក្រសាំង។ ក្រៅពីនេះ លោក ក៏បានទទួលរៀបចំពិធីកាត់សក់ ខួបកំណើត ខួបអាពាហ៍ពិពាហ៍ និងពិធីជប់លៀងផ្សេងៗទៀតផង។
គោលបំណងទៅថ្ងៃអនាគត
លោក “អ៊ុក សុវណ្ណរិទ្ធ” ហៅនាយ “ចាប ចៀន” បាននិយាយថា “គោលបំណងនាពេលខាងមុខ ខ្ញុំមិនមានអ្វីក្រៅពីការងារសិល្បៈនោះទេ ព្រោះចង់បណ្តុះបណ្តាលកូនក្មួយជំនាន់ក្រោយៗដែលស្រឡាញ់អាជីពដូចជាខ្ញុំអ៊ីចឹង”។
លោកក៏ចង់បង្កើតជាសមាគមន៍រួមគ្នាមួយដើម្បីបានជួយដល់សង្គមយើងខ្លះ ដូចជាពេលមានគ្រោះទឹកជំនន់ មានអាសន្នអន់ក្រ ជាដើម៕
ពិតជាគួរឲ្យសរសើរលោក អ៊ុក សុវណ្ណរិទ្ធ ក្នុងការតស៊ួរហូតមានឈ្មោះបោះសំលេងដល់បច្ចុប្បន្ន និងបានជួយដល់សង្កមតាមរយៈអង្គការជាច្រើន ។
good lok po
Very great…I do support you, please try do good thing more