មន្ត្រីជំនាញវេជ្ជសាស្ត្រ របស់ក្រសួងសុខាភិបាល បានសម្តែងក្តីបារម្ភយ៉ាងខ្លាំង ចំពោះការផ្ទុះរាលដាល នៃជំងឺផ្តាសាយបក្សី H5N1 ក្នុងអំឡុងពេលដើមឆ្នាំនេះ។ ក្នុងរយៈពេលជាងមួយខែ មកនេះ ជំងឺផ្តាសាយបក្សី ដែលឆ្លងពីបក្សី មាន់ទា បានសម្លាប់ពលរដ្ឋកម្ពុជា ៦ នាក់។ កាលពីថ្ងៃ៧កុម្ភៈម្សិលមិញ ជំងឺផ្តាសាយបក្សី បានសម្លាប់កុមារីម្នាក់ អាយុ ៥ ឆ្នាំ មកពីខេត្តតាកែវ។
ថ្ងៃ សុក្រ 08 កុម្ភៈ 2013
ដោយ លី ម៉េងហួរ
RFI
ការរៀបចំខ្វៃទា ដើម្បីលក់ពេលចូលឆ្នាំចិន © Reuters
ក្នុងអំឡុងបុណ្យចូលឆ្នាំចិន ជាពិសេសរយៈពេលជាង១ខែ ដើមឆ្នាំនេះ ជំងឺផ្តាសាយបក្សី ដែលកើតលើបក្សី មាន់ទា បានរាលដាលឆ្លងមកសម្លាប់ប្រជាពលរដ្ឋកម្ពុជា ៦ នាក់ហើយ។ នេះជាក្តីបារម្ភរបស់អ្នកជំនាញវេជ្ជសាស្ត្រ ចំពោះការរាលដាលជំងឺផ្តាសាយបក្សី។
លោកវេជ្ជបណ្ឌិត សុខ ទូច ប្រធាននាយកដ្ឋានជំងឺឆ្លង របស់ក្រសួងសុខាភិបាល បានបង្ហាញក្តីបារម្ភ ចំពោះការរីករាលដាលនៃជំងឺផ្តាសាយបក្សី ក្នុងរយៈពេលដើមឆ្នាំនេះ ដែលបានឆ្លង ពីសត្វបក្សីទៅមនុស្ស។ ក្នុងនោះលោកវេជ្ជបណ្ឌិត ក៏បារម្ភ លើការឆ្លងរាលដាលពីមនុស្ស ទៅមនុស្សផងដែរ។
លោកវេជ្ជបណ្ឌិត សុខ ទូច បានមានប្រសាសន៍ថា "ក្រសួងមានការព្រួយបារម្ភខ្លាំងណាស់។ ទី១-យើងមិនដែលឃើញអីចឹងទេ ក្នុងរយៈពេលតែមួយខែ យើងមានចំនួនរហូតដល់ ៦ ករណី អ្នកស្លាប់។ ទី២-នៅក្នុងតំបន់ ពិសេសប្រទេសជិតខាង មិនមានសភាពការណ៍ជំងឺផ្តាសាយបក្សី កើតឡើងទេ ព្រោះជំងឺនេះ មិនមែនមានតែយើងទេ ប្រទេសជិតខាងក៏មានដែរ។ ប៉ុន្តែខាងគេ មិនមានឃើញមានការកើនឡើងទេ"។
លោកវេជ្ជបណ្ឌិត សុខ ទូច បានបន្ថែមថា រាជរដ្ឋាភិបាលកម្ពុជា តាមរយៈក្រសួងសុខាភិបាល បានស្នើសុំអ្នកជំនាញ មកពីទីក្រុងម៉ានីល របស់អង្គការសុខភាពពិភពលោក ដើម្បីតាមដានជំងឺផ្តាសាយបក្សី នៅកម្ពុជា។
ក្តីបារម្ភរបស់គ្រូពេទ្យជំនាញខាងលើ បានធ្វើឡើង នៅពេលដែលកុមារីអាយុ ៥ ឆ្នាំ ម្នាក់ទៀត នៅខេត្តតាកែវ ដែលចាប់ផ្តើមឈឺគ្រុនក្តៅ ក្អក និងក្អួត ចាប់តាំងពីថ្ងៃទី២៥ ខែមករា បានស្លាប់ កាលពីថ្ងៃទី៧ ខែកុម្ភៈ ឆ្នាំ២០១៣។ មន្ទីរពិសោធន៍បង្ហាញថា កុមារីរងគ្រោះ មានផ្ទុកជំងឺផ្តាសាយបក្សី។
ចាប់តាំងពីឆ្នាំ២០០៣ ជំងឺផ្តាសាយបក្សី បានឆ្លងមកមនុស្ស ចំនួន ២៧ ករណី និងបានសម្លាប់មនុស្ស ២៤ នាក់ នៅកម្ពុជា។ ចំណែកនៅជុំវិញពិភពលោក កើតមានសរុប ៦១៦ ករណី ដែលបញ្ជាក់ដោយមន្ទីរពិសោធន៍ ក្នុងនោះ មាន ៣៦៥ នាក់ ស្លាប់។
សេចក្តីប្រកាសរួមរបស់ក្រសួងសុខាភិបាល និងអង្គការសុខភាពិភពលោក ចេញផ្សាយនៅថ្ងៃ៨កុម្ភៈនេះ បង្ហាញថា ក្រុមគ្រូពេទ្យ កំពុងអង្កេតស្រាវជ្រាវដល់ទីកន្លែងកើតហេតុ នៅឯមូលដ្ឋាន និងមន្ទីរពេទ្យ ដើម្បីស្វែងរកអ្នកប៉ះពាល់ជិតស្និទ្ធនឹងអ្នកជំងឺ។ ក្នុងនោះគ្រូពេទ្យ ក៏ចាប់ផ្តើមផ្តល់ឱសថបង្ការ ដែលចាំបាច់។ យុទ្ធនាការអប់រំសុខភាពសាធារណៈ កំពុងត្រូវបានដំណើរការអនុវត្តនៅភូមិ។ សារអប់រំរបស់រាជរដ្ឋាភិបាល ក៏ត្រូវបានផ្សព្វផ្សាយ រួមមាន៖ លាងដៃ ឲ្យបានញឹកញាប់ ដាក់កុមារនៅឆ្ងាយពីសត្វបក្សី ដាក់សត្វបក្សីនៅឲ្យឆ្ងាយពីកន្លែងរស់នៅ កុំបរិភោគ សត្វបក្សីឈឺ ឬងាប់ និងរាល់សត្វបក្សី ដែលធ្វើសម្រាប់បរិភោគ ត្រូវចំអិនឲ្យឆ្អិតល្អ៕
—————————————-
