ភ្នំពេញ: តាមប្រវត្តិសាស្ត្រចិន មានជំនឿលើការគោរពបុណ្យចូលឆ្នាំថ្មីយ៉ាងកប់ជ្រៅ។ គេមានត្រណមជាច្រើននៅក្នុងអំឡុងពេលចូលឆ្នាំបីថ្ងៃ ជាពិសេសថ្ងៃទី១ ឬហៅថា “ឈឺអ៊ិច”។ ក្នុងរយៈពេល៣ថ្ងៃនេះ គេចាត់ទុកជាថ្ងៃពិសេសបំផុត ដែលមិនត្រូវធ្វើអ្វីកករល្អក់នាំឲ្យប៉ះពាល់ដល់សិរីមង្គល ឬដល់ឆ្នាំថ្មីនោះឡើយ។ គេត្រួវធ្វើឲ្យសប្បាយ នាំសិរីសួស្តីចូលខ្លួន និងក្រុមគ្រួសារ។
ថ្ងៃទី 9 កុម្ភៈ 2013
ដោយ: វឿន សាវុធ
CEN
ត្រណមមិនយំ
ក្នុងអំឡុងពេលបុណ្យចូលឆ្នាំថ្មី ជនជាតិចិនមានត្រណមមិនឲ្យកើតរឿងយំសោកសៅ ពីព្រោះថាវាអាចនាំមកនូវរឿងអពមង្គលដល់ឆ្នាំថ្មី រហូតពេញមួយឆ្នាំថែមទៀតផង។ ត្រណមនេះសូម្បីតែកូនចៅ ដែលរឹងរូសក៏ឪពុកម្តាយ ឬមនុស្សចាស់មិនវាយប្រៀនប្រដៅដែរ គឺអត់ទ្រាំរហូតចប់បុណ្យចូលឆ្នាំថ្មីសិន។
តែងខ្លួនស្អាត ប៉ុន្តែមិនគួរកក់សក់
ការស្លៀកពាក់ខោអាវថ្មី និងខ្លួនស្អាតបាតជារឿងសំខាន់បំផុតសម្រាប់មនុស្សគ្រប់រូបក្នុងការទទួលឆ្នាំថ្មីនេះ។ ទោះបីជាយ៉ាងណា ក្នុងអំឡុងពេលនេះគេមានត្រណមមួយទៀតគឺហាមកក់សក់ក្បាល ប៉ុន្តែកន្លែងដទៃៗទៀតអាចធ្វើការសម្អាតបានធម្មតា ព្រោះហេតុថាការកក់សក់គេមានជំនឿថាហាក់បីដូចជាការលាងជម្រះជោគសំណាងចេញពីខ្លួនដូច្នេះដែរ។
ចំពោះសម្លៀកបំពាក់ពណ៌ក្រហមជាទីពេញនិយមបំផុត ដែលគេប្រើសម្រាប់ស្លៀកពាក់ក្នុងអំឡុងចូលឆ្នាំចិន។ ពណ៌នេះគេចាត់ទុកជាពណ៌ “ងូវហេង” នាំជោគលាភ និងសិរីសួស្តី។ សម្រាប់ក្មេង ឬមនុស្សនៅលីវ គេតែងឲ្យ អាំងប៉ាវ ដែលជាកញ្ចប់ លុយពណ៌ក្រហម ព្រមទាំងក្រដាសប្រាក់ថ្មីៗ ដើម្បីទទួលជោគលាភ។
ហាមចូលបន្ទប់របស់អ្នកដទៃ
ការចូលទៅរកនរណាម្នាក់ក្នុងបន្ទប់ដេករបស់គេក្នុងថ្ងែបុណ្យចូលឆ្នាំចិន ចាត់ទុកជាជោគសំណាងអាក្រក់។ ដូច្នេះទោះបីអ្នកមានរោគជំងឺ ដែលត្រូវចូលទៅសួរសុខទុក្ខ ក៏ចាំបាច់ត្រូវចេញមកអង្គុយក្នុងបន្ទប់ទទួលភ្ញៀវដែរ។ ម្យ៉ាងទៀត មិនគួរប្រើកាំបិត ឬកន្ត្រៃក្នុងថ្ងៃបុណ្យចូលឆ្នាំថ្មី ព្រោះគេមានជំនឿថា នេះជាការកាត់ជោគលាភ ហើយបើមានមុតដៃជើងផង គឺកាន់តែជួបរឿងអាក្រក់ថែមទៀត។
មិនឲ្យបែកចាន ឬកែវ
ក្នុងថ្ងៃនេះគេមានការប្រយ័ត្នប្រយែងចំពោះការកាន់ចាន ឬកែវ ព្រោះបើមានបង្កឲ្យប្រេះស្រាំ ឬធ្លាក់ បែក ជាការនាំឲ្យបាត់បង់ជោគលាភ ហើយជីវិតក្នុងឆ្នាំនោះនឹងជួបតែរឿងប្រេះឆា ពុំសូវមានសេចក្តីសុខនោះឡើយ៕ S
What does it mean the word “ត្រណម”? (tro norm)
I used to call it: ” Dom norm”, not “Tro norm” like this.
I have seen the Cam News has been using the wrong words or wrong spelling in Khmer langage.