Thursday, 14 February 2013
ស៊ូ វុទ្ធី
ភ្នំពេញ ប៉ុស្តិ៍
ពិធីការិនី ហេង ម៉ារ៉ាឌី ពេលចូលរួមកម្មវិធីសម្ពោធភោជនីយដ្ឋានកន្លងមក។ រូបថត ឈឹម ស្រីនាង
ភ្នំពេញ : ទោះជាបានឆ្លងផុតពីការសង្គ្រោះដោយមិនត្រូវបានវះកាត់ក្តីពិធីការិនីដើមទ្រូងធំសិចស៊ីរបស់កម្មវិធីរ៉េវឡន និងជាថៅកែហាងកែសម្ផស្សវ័យក្មេង កញ្ញា ហេង ម៉ារ៉ាឌី មិនទាន់បានជ្រះស្រឡះចិត្តពីជំងឺស្អិតពោះវៀនទាំងស្រុងនៅឡើយទេ ដោយនាងអះអាងថា៖ «ពេលនេះខ្ញុំត្រូវគេងញ៉ាំថ្នាំនៅផ្ទះសិនខណៈគ្រូពេទ្យវៀតណាមកំណត់ឲ្យខ្ញុំលេបដល់ទៅរាប់ខែឯណោះ»។
អតីតអ្នកដើរស៊ីឈ្នូលផាត់មុខ ក្លាយជាកញ្ញាឯកសាប៊ូលុច្ស ដែលមានយីអ៊ុនដាក់នៅក្នុងសង្វៀនសិល្បៈសម្តែងដោយចរិតកាច ឆ្នាស ស្រីស្រស់ ហេង ម៉ារ៉ាឌី បានធ្វើឲ្យក្រុមគ្រួសាររបស់នាងផ្អើលឆោឡោទាំងសើងមម៉ើង និងដឹកភ្លាមៗទៅកាន់មន្ទីរពេទ្យប្រទេសវៀតណាមទាំងយប់កាលពីរាត្រីថ្ងៃទី៣ ខែធ្នូ ឆ្នាំ២០១២ខណៈ អាការជំងឺស្អិតពោះវៀនរបស់នាងមានសភាពធ្ងន់ធ្ងរលើសពីសព្វមួយដង។
តែបន្ទាប់ពីគ្រូពេទ្យប្រទេសវៀតណាមសង្គ្រោះព្យាបាលអស់១០ថ្ងៃមកនាងត្រូវបានក្រុមគ្រួសារបញ្ជូនត្រឡប់មកសម្រាកនៅផ្ទះវិញ។
ក្នុងសំនៀងមិនសូវលះ បែបថ្នមសុខភាពថៅកែហាងកែសម្ផស្សវ័យខ្ទង់៣០ឆ្នាំរូបនេះបានឲ្យដឹងថា៖ «មកដល់ពេលនេះ ដ្បិតថាខ្ញុំវិលមកសម្រាកញ៉ាំថ្នាំនៅផ្ទះប៉ុន្តែជំងឺរបស់ខ្ញុំ នៅមិនទាន់អាចសះជាដូចដើមនៅឡើយទេ»។
នាងពោលត្អូញត្អែរទៀតថា៖ «ពេលខ្លះអាការក្នុងខ្លួនខ្ញុំនៅតែវិលមុខអស់កម្លាំងបើទោះជាខ្ញុំព្យាយាមញ៉ាំថ្នាំតាមវេជ្ជបញ្ជាដែលគ្រូពេទ្យវៀតណាមឲ្យបានទៀងទាត់ហើយក្ដី»។
ហេង ម៉ារ៉ាឌី ក៏បានអះអាងទៀតថា៖ «ពេលនេះខ្ញុំប្រហែលជាចៀសផុតមិនទទួលរងនូវស្នាមមុខកាំបិតដ៏មុតរបស់គ្រូពេទ្យវៀតណាមនោះទេមើលទៅ ខណៈដែលភ្លាមៗ ពេលទៅដល់ពេទ្យភ្លាមពេទ្យបានប្រាប់ថាជំងឺខ្ញុំទាល់តែវះកាត់ទើបអាចព្យាបាលមិនត្រឹមតែលេបថ្នាំ ឬចាក់ធម្មតាៗនោះទេ»។
នាងបានរំឭកទៀតថា៖ «ពេលឮគ្រូពេទ្យប្រាប់ថាពោះវៀនខ្ញុំនេះមានសភាពធ្ងន់ធ្ងរខ្លាំងខាងក្នុងនោះវាស្អិតជាប់ដូច្នេះបានជាបណ្តាលឲ្យធ្វើទុក្ខចុកយ៉ាងនេះទំនងទាល់តែវះកាត់ទើបបានអាចល្អប្រសើរឡើងវិញ។ពេលនោះខ្ញុំមានអារម្មណ៍ខ្លាចមុខកាំបិតខ្លាំងណាស់ស្ទើរតែអង្វរពេទ្យទៅហើយ» ។
យ៉ាងណាក៏ដោយ ហេង ម៉ារ៉ាឌី មិនអាចសន្និដ្ឋានពីកាលកំណត់សះស្បើយនៃជំងឺ និងពេលវេលាបានប្រឡូកក្នុងសិល្បៈវិញទេ ដោយនាងនិយាយថា៖ «ខ្ញុំនៅមិនដឹងថាអាការជំងឺរបស់ខ្ញុំជាសះពេលណានោះទេប៉ុន្តែសព្វថ្ងៃនេះខ្ញុំខំញ៉ាំថ្នាំ និងប្រតិបត្តិតាមវេជ្ជបញ្ជាពេទ្យយ៉ាងយកចិត្តទុកដាក់ ហើយក៏ប្រឹងញ៉ាំអាហារប៉ូវច្រើនណាស់ដែរព្រោះខ្ញុំក៏ខ្វះឈាមក្រហមនោះ ហើយម៉្យាងខ្ញុំចង់ឆាប់ជានឹងអាចបានចូលប្រឡូកក្នុងការងារព្រោះថាមួយរយៈនេះខ្ញុំនៅមានការងារច្រើនណាស់ដែលខ្ញុំត្រូវធ្វើ »៕