ភ្នំពេញ : តើអ្នកឆ្ងល់ទេថា គូស្នេហ៍ស្រីស្រឡាញ់ស្រីភេទដូចគ្នាដែលប្រាសចាកពីក្រឹត្យក្រមធម្មជាតិនោះអាចរួមរស់នៅជាមួយគ្នាបែបណាដែរ។
Friday, 15 February 2013
ជូលៀស ធីម៉ាន
ភ្នំពេញ ប៉ុស្តិ៍
ផលិតករខ្សែភាពយន្តឯកសារពីជីវិតរបស់គូស្នេហ៍ស្រីស្រឡាញ់ស្រី។ រូបថត ហេង ជីវ័ន
ចម្ងល់នេះអាចត្រូវបានបំភ្លឺតាមរយៈខ្សែភាពយន្តឯកសាររបស់ផលិតករ សៅ សុភ័ក្រ ដែលបានចំណាយពេល២ថ្ងៃផ្តិតយកនូវសកម្មភាពរបស់គូស្នេហ៍វ័យកណ្ដាលស្រីស្រឡាញ់ស្រីគឺអ្នកស្រី សូត យន់ អាយុ៥៧ឆ្នាំ និងដៃគូឈ្មោះ សែម អៀង អាយុ៥៨ឆ្នាំ។
ជាលទ្ធផលខ្សែភាពយន្តឯកសារខ្នាតខ្លីរយៈពេល១១ នាទីដែលមានចំណងជើងថា «នារីពីរនាក់ឆ្លងកាត់ភ្លៀង» ឬ Two Girls against the Rain ត្រូវបានចាក់បញ្ចាំងនៅមហោស្រពខ្សែភាពយន្តប៊ើលីណាល (Berlinale) ឯប្រទេសអាល្លឺម៉ង់ ចាប់ពីថ្ងៃទី ៧ រហូតដល់ថ្ងៃទី១៧ ខែកុម្ភៈខាងមុខនេះ។
ផលិតករភាពយន្តវ័យ៣០ឆ្នាំ សៅ សុភ័ក្រ គឺជាជនទីមួយដែលមានវត្តមានក្នុងមហោស្រពភាពយន្តនេះ។ មុនពេលដែលឡើងយន្តហោះទៅបង្ហាញស្នាដៃ សុភ័ក្រក៏បានជួបសំណេះសំណាលជាមួយលោក ជូលៀស ធីម៉ាន អ្នកយកព័ត៌មានរបស់ទស្សនាវដ្ដី 7D។
តើហេតុអ្វីបានជាអ្នកចាប់អារម្មណ៍ពីសហគមន៍ស្រីស្រឡាញ់ស្រីដូច្នេះ?
ខ្ញុំធំធាត់នៅប្រទេសកម្ពុជា ហើយខ្ញុំមិនដឹងទេថាជីវិតជាស្រីខ្ទើយ ឬស្រីស្រឡាញ់ភេទដូចគ្នានោះវាយ៉ាងណាទេ។ ប្រុសខ្ទើយ ប្រុសស្រឡាញ់ប្រុស និងប្រុសកែភេទជាស្រី គឺជាក្រុមដែលសកម្មនិងចេញមុខចេញមាត់ច្រើនជាងគេនៅប្រទេសកម្ពុជា ប៉ុន្តែស្រីស្រឡាញ់ស្រីហាក់ដូចជាសម្ងំលាក់ខ្លួនពីមហាជនតែម្ដង។ដូច្នេះខ្ញុំចង់ស្វែងយល់ពីពួកគេ ពីជីវិត ពីការរើសអើង និងសម្ព័ន្ធស្នេហារបស់ពួកគេ។ តាមប្រពៃណីខ្មែរ ស្រីត្រូវតែរៀបការជាមួយប្រុស ប៉ុន្តែវាក៏គ្មានអ្វីខុសឆ្គងដែរ ប្រសិនបើមនុស្សស្រឡាញ់ភេទដូចគ្នា។ ម្នាក់ៗសុទ្ធតែស្រេកទឹក គ្រាន់តែអ្នកខ្លះគេផឹកស្រាបៀរ ឯខ្លះទៀតផឹកទឹកក្រូចតែប៉ុណ្ណោះ។
តើអ្នកបានថតភាពយន្តឯកសារដែលមានសាច់រឿងដូចម្ដេចដែរ?
នៅសម័យខ្មែរក្រហម គូស្នេហ៍ស្រីស្រឡាញ់ស្រីនេះគាត់ធ្វើការក្នុងកងជាមួយគ្នាហើយក៏កើតចិត្តស្រឡាញ់គ្នា។ ប៉ុន្តែមេកងបានបំបែកពួកគេ ដោយសារតែសង្ស័យពីសម្ព័ន្ធភាពស្រីស្រឡាញ់ស្រីខុសប្រក្រតី។
ក្រោយនេះដួលរលំ ស្ត្រីទាំងពីរនាក់ក៏បានរស់នៅជួបជុំគ្នា និងបង្ហាញក្ដីស្រឡាញ់ចំពោះគ្នាយ៉ាងបើកចំហ ប៉ុន្តែស្នេហានេះត្រូវជួបឧបសគ្គម្ដងទៀត ដោយសារតែ សែម អៀង ត្រូវបានគ្រួសារបំបែកពី សូត យន់ ដើម្បីឲ្យគាត់បានរៀបការជាមួយមនុស្សប្រុសដូចគេឯង។ កាលណោះ សែម អៀង សុខចិត្តអត់បាយក្រហាយទឹកជាច្រើនថ្ងៃ រហូតដល់ធ្លាក់ខ្លួនឈឺ ហើយថែមទាំងគំរាមគ្រួសារគាត់ថា បើមិនបាននៅជាមួយ សូត យន់ ទេនឹងសម្លាប់ខ្លួនហើយ។
ក្រោយមក សូត យន់ ក៏ត្រូវបានក្រុមគ្រួសារ សែម អៀង អនុញ្ញាតឲ្យមើលថែគាត់រហូតដល់ជាសះស្បើយ។
សព្វថ្ងៃ គូស្នេហ៍វ័យកណ្ដាលដែលជាស្រីស្រឡាញ់ស្រីដូចគ្នានេះ កំពុងប្រកបរបរជាកសិករ និងលក់ដូរបន្លែផ្លែឈើបន្តិចបន្តួចនៅមុខផ្ទះឈើ ឯខេត្តតាកែវ។ ក្រុមគ្រួសារ និងសហគមន៍ដែលពួកគាត់រស់នៅព្រមទទួលស្គាល់ពីសម្ព័ន្ធស្នេហាខុសតម្រាធម្មជាតិនេះហើយ។
តើពួកគេឈឺចាប់ទេ ដែលស្រឡាញ់គ្នាដោយមិនបានរៀបការអ៊ីចឹង?
ពួកគេអាចរៀបការតាមប្រពៃណីបាន ព្រោះពុទ្ធសាសនាមិនមានចែងថា ការស្រឡាញ់ភេទដូចគ្នាជាកម្មពៀរអ្វីនោះទេ។ ប៉ុន្តែពួកគេមិនអាចក្លាយជាប្ដីប្រពន្ធតាមផ្លូវច្បាប់ឡើយ។ ក្នុងកុនរបស់ខ្ញុំ ស្ត្រីទាំងពីរបាននិយាយពីរឿងរៀបការនេះដែរ ហើយពួកគាត់ចង់តស៊ូដើម្បីឲ្យក្មេងជំនាន់ក្រោយទទួលបានសិទ្ធិរៀបការភេទដូចគ្នាដោយស្របច្បាប់ដែរ។
អ្នកនិយាយថា ស្រីស្រឡាញ់ស្រីដូចគ្នាគឺពិបាកសម្គាល់ណាស់។តើអ្នកធ្វើម៉េចបានស្គាល់គូស្នេហ៍ខាងលើនេះ?
ខ្ញុំស្គាល់ពួកគាត់តាមរយៈអង្គការសហគមន៍ Little Rock ដែលធ្វើកិច្ចការគាំទ្រក្រុមស្រឡាញ់ភេទដូចគ្នា ប្រុសខ្ទើយ ស្រីខ្ទើយ និងអ្នកកែភេទ នៅប្រទេសកម្ពុជា។ ខ្ញុំនិយាយជាមួយពួកគាត់ចុះសម្រុងគ្នាណាស់ ប៉ុន្តែពេលសុំពួកគាត់ថតពីខ្សែជីវិតនោះ ខ្ញុំត្រូវពន្យល់គាត់និងស្វែងរកការជឿទុកចិត្តពីគាត់។
តើភាពយន្តឯកសារនេះមានចំណុចពិសេសអ្វីខ្លះដែលអាចធ្វើឲ្យទស្សនិកជននៅប៊ែរឡាំងចាប់អារម្មណ៍?
ក្រុមប្រុសស្រឡាញ់ប្រុស ស្រីស្រឡាញ់ស្រី និងអ្នកកែភេទ គឺមាននៅគ្រប់ទិសទីក្នុងពិភពលោក។ ប៉ុន្តែគូស្នេហ៍ដែលនៅក្នុងភាពយន្តឯកសាររបស់ខ្ញុំនេះគឺមានភាពស្មោះស្ម័គ្រចំពោះគ្នាណាស់។ គ្មានអ្វីអាចបំបែកស្នេហាពួកគាត់បានឡើយ។ វាគឺជាសាច់រឿងស្នេហាដ៏អស្ចារ្យ និងគួរឲ្យចាប់អារម្មណ៍ ជាពិសេសពេលដែលពួកគាត់លួងលោមគ្នាទៅវិញទៅមក ពេលរៀបរាប់រឿងរ៉ាវស្នេហាដ៏ជូរចត់។
តើអ្នកគិតថា រឿងនេះនឹងធ្វើឲ្យជនបរទេសចាប់អារម្មណ៍ទស្សនាទេ?
ខ្ញុំចង់បង្ហាញពីធាតុពិតនៅខាងក្នុងប្រទេសកម្ពុជា។ ខ្ញុំអាចធ្វើការស្រាវជ្រាវ និងចូលទៅជិតអ្នកទាំងនោះ ដើម្បីរុករកសាច់រឿងដែលគួរឲ្យចាប់អារម្មណ៍ ជាងជនបរទេសទាំងនោះ។ ក្នុងនាមជាស្ត្រីម្នាក់ ខ្ញុំក៏គាំទ្រស្ត្រីដូចគ្នា ហើយខ្ញុំជឿថាគណៈកម្មការក្នុងកម្មវិធីមហោស្រពភាពយន្ត ក៏មានចំណាប់អារម្មណ៍ចំពោះសាច់រឿងរបស់ខ្ញុំដែរ។
តើអ្នករំពឹងថានឹងបានអ្វីត្រឡប់មកវិញ ក្រោយពីចូលរួមមហោស្រពនេះ?
ខ្ញុំពិតជាទន្ទឹងរង់ចាំឲ្យទស្សនិកជនទាំងក្នុង និងក្រៅស្រុកបានទស្សនាភាពយន្តឯកសាររបស់ខ្ញុំ។ ខ្ញុំសង្ឃឹមថា នឹងមានមនុស្សជាច្រើនចោទសំណួរសួរខ្ញុំទាក់ទិននឹងខ្សែភាពយន្តនេះ ក៏ដូចជាអំពីប្រទេសកម្ពុជាផងដែរ។ មនុស្សជាច្រើនគេស្គាល់ ថៃ វៀតណាម ឡាវ ប៉ុន្តែបែរជារំលងកម្ពុជា។
ខ្ញុំក៏រំពឹងថានឹងបានជួបផលិតករភាពយន្តល្បីៗ ហើយអាចចែករំលែកបទពិសោធជាមួយគេផងដែរ៕
Too short to watch. Make the youtube is better. … Ha.ha. vagina movie !!!!!
ពួកនេះ បើកាលជំនាន់ចាស់ពីដើមមិនដែលមានទេ ទើបតែសម័យនេះមិនដឹងឆ្កួតស្អីវា? និយាយតាមត្រង់ទៅចុះ ចំពោះរឿងណឹងមួយខ្ញុំមានការស្អប់ខ្ពើមណាស់ ហើយសូម ប្រសិទ្ធនាមអោយពួកនេះថា (ពួកក្អែលសង្គមដ៏ស្មោគគ្រោក)។ បើចង់ដឹងការពិត សាកល្បងយក ស្រីតាំងខ្លួនជាប្រុសនោះ ទៅដាក់ចោលលើកោះដ៏ស្ងាត់មួយជាមួយនឹងប្រុសស្អាតម្នាក់ទៅមើល តើវានៅធ្វើប្រុសទៀតអត់? ធានាថា តែ១ខែក្រោយ ច្បាស់ជារកស្វាយខ្វីជ្រលក់អំបិលបុកម្ទេស ជាក់ជាមិនខាន។
បើនិយាយគេថារើសអើងបើមិននិយាយគេថាមិនមែនជាមនុស្ស។យើងដឹងហើយថាធម្មជាតិបង្កើតមកឬអ្នកមានជំនឿលើសាសនាគេថាព្រះបង្កើតមកគឺឱ្យប្រុសគូនឹងស្រី។រាល់វត្ថុទាំងឡាយមានគូរបស់វាទាំងអស់។ឯរឿងដែលធ្វើឱ្យខុសពីធម្មជាតិគឺមនុស្សជាអ្នកបង្កើត។ជួនកាលបង្កើតល្អគួរឱ្យប្រតិបត្តតាមជួនកាលទៀតបង្កើតរបៀបថោកទាបដែលគេគិតថាមិនមែនជាមនុស្សគឺជាសត្វទៅវិញ។មិនថាអ្នកជាខ្ទើយប្រុសឬខ្ទើយស្រីទេលើកលែងតែអ្នកដែលកាត់លិង្គចោល។គឺរៀបការគូផ្ទុយភេទដើម្បីបន្តពូជមនុស្សនៅលើផែនដី។មិនមែមនសម្រាប់ការស្រួលស្រណុកដោយវិធីរួមដំណេកទេ។រួមដំណេកបែបណាជាមួយអ្នកណាក៏បានដែរ។តែមិនអាចបន្តកូនពូនជាចៅបានទេ។ហេតុនេះហើយបានជាមានពាក្យគេថាឆ្កួត។ខ្ញុំក៏ទើបនឹងឃើញសម័យនេះដែរហើយដែលខ្ញុំច្រើនចាត់ទុកថាជាសម៏យទុបញ្ញា។
សូមគាំទ្រ chakrey !