មណ្ឌលគិរីៈ ទៅខេត្តបាត់ដំបង កុំភ្លេចភ្លក្សរសជាតិណែមទៅខេត្តក្រចេះកុំភ្លេចក្រឡានហើយបើទៅលេងខេត្តមណ្ឌលគិរីក៏កុំភ្លេចភ្លក្សផ្លែប៊័ររបស់បងប្អូនជនជាតិភាគតិច។នេះជាបណ្តាំចេញពីអ្នកដែលមានបងប្អូនសាច់ញាតិចេញដើរកម្សាន្តតាមខេត្តនោះ។
Friday, 15 February 2013
ស៊ូ វុទ្ធី
ភ្នំពេញ ប៉ុស្តិ៍
ផ្លែប៊័រលក់នៅតាមផ្លូវចំណតរថយន្តក្រុង ឯខេត្តមណ្ឌលគិរី គឺជាអាហារដ៏ពេញនិយមសម្រាប់បរិភោគ និងទិញផ្ញើសាច់ញាតិពេលត្រឡប់ទៅផ្ទះវិញ។ រូបថត ហេង ជីវ័ន
ស្រ្តីវ័យចំណាស់ម្នាក់មកពីភ្នំពេញគ្រាន់តែធ្វើដំណើរទៅដល់ទីរួមខេត្តមណ្ឌលគិរីនោះភ្លាម គាត់ក៏បានដើរសំដៅទៅរកតូបលក់ផ្លែប៊័រភ្លេត។
ក្នុងសម្លៀកបំពាក់ស៊ីវិល័យ ជាមួយទឹកមុខញញឹមរីករាយដៃចាប់កាន់ផ្លែប៊័របណ្ដើរតថ្លៃបណ្តើរនោះគាត់បានប្រាប់ឲ្យដឹងថា៖ «ខ្ញុំឈ្មោះចន្ធូ។ខ្ញុំមកពីភ្នំពេញមកខេត្តមណ្ឌលគិរីមកដើរលេងជាមួយកូនៗ។ នេះមិនទាន់ដឹងថាគេនាំទៅដើរលេងឯណាខ្លះទេ»។
អ្នកស្រី ចន្ធូ បាននិយាយថា៖ «ល្បីតែគេនិយាយថា នៅមណ្ឌលគិរីមានផ្លែប៊័រស្រស់ៗហើយរសជាតិឆ្ងាញ់ពេលនេះបំណាច់ជាមកដល់ខេត្តមណ្ឌលគិរីភ្លាមខ្ញុំមិនទាន់ចង់ទទួលទានអាហារណាក្រៅពីផ្លែប៊័រនេះទេ» ។
អ្នកភ្នំពេញដែលជិះរថយន្តជាង៥០០គីឡូម៉ែត្រ ដើម្បីទៅភ្លក្សជាតិផ្លែប៊័រនៅខេត្តមណ្ឌលគិរីនៅរូបនេះបានបញ្ជាក់ថា៖ «ពេលនេះខ្ញុំបានភ្លក្សរសជាផ្លែប៊័រនៅខេត្តមណ្ឌលគិរីនេះហើយហើយពិតជាគិតថាវាមានរសជាតិផ្អែមត្រជាក់ដូចដែលគេនិយាយមែន»។
ទាំងមាត់ជាប់ទំពាផ្លែប៊័រនោះអ្នកស្រី ចន្ធូ ក៏បានឲ្យដឹងបន្តថា៖ «ឲ្យតែផ្អែមឆ្ងាញ់អ៊ីចឹងនៅថ្ងៃត្រូវត្រឡប់ទៅវិញនោះខ្ញុំនិងទិញយកទៅផ្ញើបងប្អូននៅភ្នំពេញឲ្យបាន២-៣គីឡូទៀត»។
ពេលដែលឮភ្ញៀវនិយាយសរសើរពីរស់ជាតិផ្លែប៊័រយ៉ាងដូច្នេះ កញ្ញា ទាវ សុជាតា ដែលជាម្ចាស់តូបលក់ផ្លែប៊័រជាប់នឹងរង្វង់មូលរូបគោនៅទីរួមខេត្តមណ្ឌលគិរីនោះ បានញញឹមបិតមាត់មិនជិត ហើយនិយាយថា៖ «ផ្លែប៊័រមណ្ឌលគិរីនេះសព្វថ្ងៃនេះលក់ដាច់មែនទែន។ ភ្ញៀវដែលបានមកលេងកម្សាន្តខេត្តនេះ ក្រៅពីដើរលេងពួកគេម្នាក់ៗមិនដែលរំលងរសជាតិផ្លែប៊័រនេះហើយមិនត្រឹមតែទិញហូបនៅទីនេះទេ ពួកគេក៏មិនដែលខកខានច្រកយកទៅផ្ញើសាច់ញាតិគេនៅផ្ទះនោះដែរ»។
អ្នកលក់ផ្លែប៊័រវ័យ២០ឆ្នាំរូបនេះក៏បានឲ្យដឹងពីតម្លៃផងដែរថា៖ «ផ្លែប៊័រនៅខេត្តមណ្ឌលគិរីនេះ អត់មានលក់តែ២ខែទេគឺខែ១១ និងខែ១២។ ក្រៅពីពីរខែនោះយើងមានលក់រហូតពិសេសគឺកន្លែងខ្ញុំ ហើយខ្ញុំលក់សព្វថ្ងៃមានបីប្រភេទអាលេខ៣ មួយគីឡូក្រាមតម្លៃ៨ពាន់រៀល អាលេខ២ មួយគីឡូក្រាម១ម៉ឺនរៀល និងអាលេខ១ មួយគីឡូក្រាម១២០០០រៀល»។
អ្នកលក់វ័យក្មេងរូបនេះក៏បង្ហាញឲ្យដឹងពីចំណូលចិត្តរបស់ភ្ញៀវផងដែរថា៖ «ផ្លែប៊័រនេះមិនសូវជាមានការនិយមចូលចិត្តពីភ្ញៀវបរទេសនោះទេអ្នកដែលនិយមចូលចិត្តសព្វថ្ងៃនេះគឺភ្ញៀវខ្មែរតែម្តងភ្ញៀវមកពីខាងភ្នំពេញភ្ញៀវខ្លះគាត់ទិញហូបនៅ ទីនេះហើយហើយគាត់ទិញយកទៅផ្ញើក្រុមគ្រួសារគាត់មានដល់ទៅ២-៣គីឡូទៀតឯណោះ»។
កញ្ញាអះអាងទៀតថា៖ «ការលក់ផ្លែប៊័រនៅតូបខ្ញុំនេះមិនបានទិញមកពីណាឬប្រទេសជិតខាងណាទេគឺបេះមកពីចម្ការខ្លួនឯងសុទ្ធដាំដោយធម្មជាតិមួយថ្ងៃខ្ញុំលក់ដាច់អស់ដល់ទៅ៥០០គីឡូក្រាមក៏មានដែរកន្លងមក»។
កញ្ញា សុជាតា ក៏បានលើកពីគុណប្រយោជន៍ផ្លែនេះផងដែរថា៖ «បានជាភ្ញៀវនិយមច្រើនយ៉ាងនេះ ព្រោះផ្លែប៊័រមិនត្រឹមមានឱជារសឆ្ងាញ់ទេ វាក៏ជាផ្លែឈើសម្បូរទៅដោយជាតិប៉ូតាស្យូម។
វាមានគុណប្រយោជន៍ក្នុងការជួយសម្រួលប្រព័ន្ធតម្រងនោម និងកាត់បន្ថយភាពតានតឹង។ លើសពីនេះនៅក្នុងផ្លែប៊័រមានវីតាមីន E និង វីតាមីន C ច្រើនថែមទៀតផង»៕
Avocado in Cambodia real good taste. I want to eat ,too.