ភ្នំពេញ : ទន្ទឹមនឹងស្នាមញញឹមបិទមាត់មិនជិតក្រោយវិលពីកើបប្រាក់ពីការសម្តែងនៅអូស្រ្តាលីមិនទាន់បានប៉ុន្មានថ្ងៃផងតារាសម្តែងពៅ លីដា បានសម្តែងអារម្មណ៍ក្តៅឆេវនឹងព័ត៌មានដែលថានាងត្រូវបានឪពុកបង្ខំឲ្យចូលរោងការក្នុងពេលឆាប់ៗនេះ។
Tuesday, 19 February 2013
ស៊ូ វុទ្ធី
ភ្នំពេញ ប៉ុស្តិ៍
តារាសម្ដែង ពៅ លីដា នាពេលចូលរួមកម្មវិធីមុនៗ ។ រូបថត សហការី
មានពាក្យខ្សឹមខ្សៀវតៗគ្នាពីមួយទៅមួយថា ភាពរីករាយរបស់តារាសម្តែងដែលទើបជោគជ័យមកពីនាយប្រទេសនោះហាក់ប្រែជាស្រពោនមួយរំពេចខណៈដែលនាងត្រូវឪពុកដែលទើបជួបជុំគ្នាក្រោយនាងធំពេញវ័យនោះ ស្រាប់តែចង់បានកូនប្រសា និងបង្ខំឲ្យនាងចូលរោងការឆាប់ទៀតផង។
នាងបានបញ្ជាក់ថា៖ «ឪពុកខ្ញុំគាត់មិនដែលបង្ខំឲ្យកូនស្រីសំណព្វចិត្តខ្ញុំនេះចូលរោងការម្តងណាឡើយគឺគាត់យល់ពីអារម្មណ៍កូនណាស់»។
ប្រភពដែលបញ្ចេញពាក្យខ្សឹបខ្សៀវនោះបានឲ្យដឹងថា កាលពីថ្ងៃទី១៤ ខែកុម្ភៈ កន្លងទៅនេះខាងទូរទស្សន៍អប្សរា បានទៅថតកម្មវិធីមួយនៅគេហដ្ឋាននាង ពៅ លីដា នៅម្ដុំភូមិគោកឃ្លៀង ជិតវត្តសំរោងអណ្ដែត។ ខណៈពិធីការិនី កំពុងសម្ភាសនាងក៏ស្រាប់តែទូរស័ព្ទនាងរោទ៍។ រំពេចនោះនាងក៏លើកនិយាយពីរបីម៉ាត់រួចដាក់ទូរស័ព្វចុះជាមួយការប្រែប្រួលទឹកមុខបែបជាស្ងួតដោយនាងបានប្រាប់ទៅម្តាយនាងថា៖ «គឺប៉ាទូរស័ព្ទមក»។
ប្រភពដដែលបន្តទៀតថា ក្រោយពីកម្មវិធីទូរទស្សន៍នោះថតចប់ពៅ លីដា បានធ្លោយមាត់ខ្លួនឯងថា៖ «ខ្ញុំត្រូវប៉ា បង្ខំឲ្យរៀបការ ក្នុងពេលដែលខ្ញុំទើបនឹងបានចុះពីលើយន្តហោះវិលមកពីការសម្ដែងនៅអូស្ត្រាលីភ្លាម»។
ប៉ុន្តែព័ត៌មាននេះមិនត្រូវបានស្រីស្រស់វ័យ២៣ឆ្នាំទទួលស្គាល់ទាំងស្រុងនោះទេ។
នាងគ្រាន់តែបញ្ជាក់នូវហេតុផលដែលនាំឲ្យចំហាយព័ត៌មានដ៏រសើបនោះសាយភាយ ដោយបកស្រាយថា៖ «មុននេះខ្ញុំពិតជាត្រូវប៉ាសួរខ្ញុំមែនទាក់ទិនទៅនឹងដំណើរជីវិតទៅថ្ងៃមុខ។ តែសំណួរគាត់សួរនោះក្នុងលក្ខណៈឪពុកចង់សាកល្បងថាកូនហ្នឹងផ្តល់ចម្លើយឲ្យអ្នកមានគុណស្តីពីដំណើរខ្លួនឯងហ្នឹងយ៉ាងណាតែប៉ុណ្ណឹងទេ មិនមែនគាត់បង្ខំឲ្យកូនយកប្តីនោះទេ»។
ប៉ុន្តែនាងក៏បានទទួលស្គាល់ផងដែរថា៖ «នៅថ្ងៃដែលកម្មវិធីទូរទស្សន៍អប្សរាទៅសម្ភាសខ្ញុំក្នុងកម្មវិធីប្រស្នាតារា ខ្ញុំពិតជាបាននិយាយបង្ហើរលេងមែនថា អម្បាញ់មិញប៉ាខលមកខ្ញុំគាត់និយាយថាចង់ឲ្យខ្ញុំហ្នឹងយកប្តីឆាប់ៗ។ តែដឹងអីសម្ដីដែលខ្ញុំនិយាយលេងនោះគេយកទៅធ្វើជាប្រធានបទថា ខ្ញុំនេះត្រូវប៉ាបង្ខំឲ្យយកប្តីមែនសោះ»។
ស្រីស្រស់ដែលមុននេះល្បីភ្ជាប់ចំណងស្នេហ៍ជាមួយតារាសម្តែងភ្នែកតឹងលោក យូ ឌីស្កូនាង ពៅ លីដា បានបញ្ជាក់យ៉ាងម៉ាត់ៗថា៖ «ខ្ញុំដឹងចិត្តប៉ាខ្ញុំច្បាស់ណាស់ថា គាត់មិនចេះបង្ខំកូនឲ្យយកប្តីនោះទេ។ គាត់មានតែណែនាំកូនចៅឲ្យចេះគិតពីអនាគតទៅថ្ងៃមុនគិតអ្វីល្អចាំធ្វើ។ នេះប៉ាម៉ាក់បានត្រឹមតែបង្កើតកូនចិញ្ចឹមឲ្យធំតែប៉ុណ្ណឹង អ្វីៗលើវាសនាខ្លួនឯងជាអ្នកសម្រេច»។
បើទោះជាស្រីស្រស់ ពៅ លីដា បានបញ្ជាក់យ៉ាងនេះក្តីតែនាងមិនបានអះអាងពីការសម្រេចចិត្តដោយឯកឯងលើផ្លូវអនាគតនោះឡើយ ដោយនាងនិយាយថា៖ «ដ្បិតថា ប៉ាម៉ាក់ខ្ញុំគាត់មិនបានបិទសិទ្ធិពីការសម្រេចចិត្តលើអ្វីមួយដែលខ្ញុំត្រូវជ្រើសរើសទៅថ្ងៃមុខក៏ដោយតែខ្ញុំមិនដែលមោទនភាពខ្លួនឯងឡើយ។ ខ្ញុំនៅតែប្រគល់ការសម្រេចចិត្តទៅឲ្យអ្នកមានគុណទាំងពីរដដែលហ្នឹងពិសេសរឿងគូស្រករតែម្តង។ ខ្ញុំទុកឲ្យពួកគាត់ជាអ្នកមើលឲ្យ»។
ប៉ុន្តែនាងក៏បានបញ្ជាក់ផងដែរថា៖ «យ៉ាងណាការសម្រេចយកប្តីតាមការបង្គាប់បញ្ជាតាមអ្នកមានគុណដែលខ្ញុំឲ្យពួកគាត់ជាអ្នកសម្រេចឲ្យនោះក៏មិនមែនក្នុងពេលខ្លីឬ១ឆ្នាំ២ឆ្នាំទៀតនោះដែរ យ៉ាងហោចណាស់ក៏៣ទៅ៤ឆ្នាំទៀតដែរ។ គឺខ្ញុំចង់ទុកឱកាសឲ្យខ្លួនខ្ញុំបានប្រឡូកក្នុងវិស័យសិល្បៈបានយូរបន្តិចទៀតសិន»៕
ប្តីមិនយកទៅយកអ្វី? គួរអោយឆ្ងល់មែន