ស្ថានទូតអង់គ្លេស ប្រចាំកម្ពុជា នៅថ្ងៃទី១៩ ខែកុម្ភៈ សហការជាមួយប៉ូលិសកម្ពុជា សាលាអន្តរជាតិ អាយខេន (I Can) រួមទាំងអង្គការពាក់ព័ន្ធ ដើម្បីការពារកុមារកម្ពុជា មិនឲ្យមានការកេងប្រវ័ញ្ច និងរំលោភសេពសន្ថវៈ ដែលធ្វើឡើងដោយជនជាតិអង់គ្លេស។
ដោយ ខែ សុណង
2013-02-19
វិទ្យុអាស៊ីសេរី
ការការពារកុមារកម្ពុជា ជាលក្ខណៈអន្តរជាតិ ដោយសហការជាមួយអាជ្ញាធរខ្មែរនេះ ដោយសារគេសង្កេតឃើញថា ក្នុងរយៈពេលប៉ុន្មានឆ្នាំនេះចំនួនអ្នកទេសចរ និងអ្នកធ្វើការនៅកម្ពុជា ជាជនជាតិអង់គ្លេស មានការកើនឡើង។
ស្ថានទូតអង់គ្លេស ប្រចាំកម្ពុជា បានបង្កើតគម្រោងមួយដែលមានគោលដៅផ្ដួចផ្ដើមគំនិតថ្មី ក្នុងការការពារកុមារកម្ពុជា ជាលក្ខណៈអន្តរជាតិ កុំឲ្យមានការកេងប្រវ័ញ្ច និងប្រព្រឹត្តអំពើអនាចារ ដែលធ្វើឡើងដោយជនជាតិអង់គ្លេស ផ្ទាល់។
ស្ថានទូតអង់គ្លេស បានបើកសម្ពោធគម្រោងសម្រាប់វិញ្ញាបនបត្រការពារកុមារអន្តរជាតិ ពីការបំពានផ្លូវភេទ នៅថ្ងៃទី១៩ កុម្ភៈ ក្នុងសាលាអន្តរជាតិអង់គ្លេស អាយខេន។ វិញ្ញាបនបត្រការពារកុមារអន្តរជាតិ គឺជាលិខិតបញ្ជាក់អំពីប្រវត្តិទោស ស្រដៀងនឹងលិខិតថ្កោលទោសដែលចេញពីប្រទេសអង់គ្លេស សម្រាប់ជនជាតិអង់គ្លេស ដែលចង់មកបម្រើការងារ ស្ម័គ្រចិត្តធ្វើការ ឬមកទេសចរណ៍ក្នុងប្រទេសកម្ពុជា ត្រូវស្ថិតនៅក្រោមការឃ្លាំមើល ឬចុះបញ្ជីវិញ្ញាបនបត្រស្ដីពីកិច្ចការពារកុមារអន្តរជាតិនេះ។
ឯកអគ្គរាជទូតអង់គ្លេស ប្រចាំកម្ពុជា លោក ម៉ាក ហ្គូតឌីង (MARK GOODING) មានប្រសាសន៍ថា នេះជាការទទួលខុសត្រូវផ្ទាល់របស់អង់គ្លេស ក្នុងការការពារកុមារនៅកម្ពុជា និងប្រទេសផ្សេងទៀត ពីព្រោះថាអ្នកទេសចរអង់គ្លេស និងជនជាតិអង់គ្លេស មករស់នៅកម្ពុជា មានការកើនឡើង ហើយការធ្វើដូច្នេះ ដើម្បីជួយដល់ការអភិវឌ្ឍសេដ្ឋកិច្ចកម្ពុជា។ លោកបញ្ជាក់ថា គំនិតផ្ដួចផ្ដើមជាលក្ខណៈអន្តរជាតិ ក្នុងការការពារកុមារនេះ វាមានសារៈសំខាន់ណាស់ គឺជាវិធានការការពារសម្រាប់អ្នកគ្រប់គ្នាមកពីប្រទេសអង់គ្លេស មិនឲ្យប្រព្រឹត្តខុស។
ឆ្លើយតបបញ្ហានេះ អនុប្រធាននាយកដ្ឋានប្រឆាំងការជួញដូរមនុស្ស និងការពារអនីតិជន ក្រសួងមហាផ្ទៃ លោក សុខ រស្មី បានថ្លែងថា តាមគម្រោងចង់ឲ្យរាល់ជនជាតិអង់គ្លេស ដែលចង់មកបម្រើការងារ ឬមកទេសចរណ៍ក្នុងប្រទេសកម្ពុជា ត្រូវចុះបញ្ជីវិញ្ញាបនបត្រស្ដីពីកិច្ចការពារកុមារអន្តរជាតិ នោះវាជាគោលដៅមួយល្អ។ លោកថា នេះជាគម្រោងថ្មីដែលខាងប៉ូលិសកម្ពុជា នៅពុំទាន់ដឹងថា តើស្ថានទូតអង់គ្លេស និងប៉ូលិសកម្ពុជា ត្រូវធ្វើកិច្ចការរួមគ្នាលើបញ្ហាអ្វីខ្លះនៅឡើយ។
លោក សុខ រស្មី៖ «ទាល់តែមានការស្នើសុំ ឧបមាថាពីស្ថាប័នកុមារកំព្រាធ្វើការនៅប្រទេសកម្ពុជា អ៊ីចឹងជនជាតិអង់គ្លេស ហ្នឹង គេចង់មកធ្វើការជាមួយមណ្ឌលកុមារកំព្រាហ្នឹង។ លុះត្រាតែមានការស្នើសុំពីប្រធានមណ្ឌល ប្រធានអ៊ីចឹង ដើម្បីបញ្ជាក់។ ខ្ញុំគិតថា បើវាមានអាហ្នឹង វាក៏ជាប្រយោជន៍មួយដែរ ដើម្បីការពារសុវត្ថិភាពកុមារកុំឲ្យមានបញ្ហាកេងប្រវ័ញ្ចផ្លូវភេទ ឬក៏អ្នកទេសចរស្វែងរកការរួមភេទជាមួយកុមារ។ ប៉ុន្តែខ្លាចអាចមានផលប៉ះពាល់ខ្លះដែរ។ បើសិនជាអ្នកគ្រប់គ្នាមកត្រូវតែធ្វើដូច្នេះទាំងអស់គ្នា ជួនកាលត្រូវចំណាយពេលវេលា ជួនកាលទៅបែបបទវាសាំញ៉ាំស្មុគស្មាញ គេមិនចង់មកវិញ»។
សេចក្ដីប្រកាសព័ត៌មានរបស់ស្ថានទូតអង់គ្លេស បានសរសេរថា វិញ្ញាបនបត្រការពារកុមារអន្តរជាតិ (The initiative is the international Child Protection Certificate) គឺជាប៉ូលិសថ្មីមួយសម្រាប់ត្រួតពិនិត្យជនជាតិអង់គ្លេស ដែលធ្វើដំណើរ និងកំពុងធ្វើការនៅក្រៅប្រទេស ដើម្បីបញ្ជាក់ពីអត្តសញ្ញាណរបស់គេ ដែលប្រព្រឹត្តខុសទាំងនោះដែលកំពុងធ្វើការជាមួយកុមារ។
ចំណែកមជ្ឈមណ្ឌលការពារការកេងប្រវ័ញ្ចកុមារ បានរកឃើញថា សាលាអន្តរជាតិខ្លះជាភ្នាក់ងារបរិច្ចាគទាន (សប្បុរសធម៌) និងភ្នាក់ងារបរទេសផ្សេងៗទៀត មិនបានធ្វើទៅតាមកម្រិតកំណត់របស់ប៉ូលិស និងស្ថាប័នរបស់អង់គ្លេស ទេ ពេលខ្លះពួកគេអាចប្រព្រឹត្តអំពើអនាចារផ្លូវភេទ តាមរយៈការធ្វើឲ្យមានទំនុកចិត្តដោយសារតួនាទីរបស់ពួកគេក្នុងការកេងប្រវ័ញ្ចកុមារ។
ក្នុងរយៈពេល ៩ខែ ដើមឆ្នាំ២០១២ មានជនជាតិអង់គ្លេស មកកម្ពុជា ជាង ៨ម៉ឺននាក់ ប្រៀបធៀបឆ្នាំ២០១១ កើនឡើងជាង ៤ពាន់នាក់ ក្នុងនោះអ្នកទេសចរជាង ៧ម៉ឺននាក់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។