Monday, 18 March 2013
សេត គឹមសឿន
ភ្នំពេញ ប៉ុស្តិ៍
តារាចម្រៀងជើងចាស់អ្នកសី្រ ហ៊ឹម ស៊ីវន នៅលើឆាក។ រូបថត សហការី
ភ្នំពេញៈ កាលពីដំបូងឡើយតារាចម្រៀងអ្នកស្រី ហ៊ឹម ស៊ីវន មិនមែនជាអ្នកមានទ្រព្យសម្បត្តិស្តុកស្តម្ភឡើយ អ្នកស្រីជាកូនកសិកររស់នៅខេត្តព្រៃវែងម្នាក់ ប៉ុន្តែនៅពេលនេះ ជីវិតរបស់អ្នកស្រីបានផ្លាស់ប្តូរ១៨០ដឺក្រេ ក្រោយពេលអ្នកស្រីបានក្លាយជាតារាចម្រៀងមានឈ្មោះបោះសំឡេងម្នាក់ ហើយបានរៀបការជាមួយមន្ត្រីរដ្ឋាភិបាលមានឋានៈខ្ពង់ខ្ពស់ម្នាក់នោះ។
តារាចម្រៀង ហ៊ឹម ស៊ីវន ជាកូនច្បងនៅក្នុងចំណោមបងប្អូនចំនួន៥នាក់ដែលមានប្រុសម្នាក់ និងស្រី៤នាក់។ អ្នកស្រី ហ៊ឹម ស៊ីវន ជាកូនកសិករក្រីក្រមួយនៅក្នុងឃុំ គោកសណ្តែក ស្រុកបាភ្នំ ខេត្តព្រៃវែង។ អ្នកស្រីជាក្មេងកំព្រាឪពុកដែលមានឈ្មោះ ហ៊ឹម លន់ បានទទួលមរណភាពក្នុងរបប ប៉ុល ពត ហើយក្រោយចប់របបប្រល័យពូជសាសន៍អ្នកស្រីរស់នៅជាមួយម្តាយឈ្មោះ ស ហ៊ន សព្វថ្ងៃវ័យ៦៣ឆ្នាំហើយ។
ដំណើរដើមទងដែលនាំឲ្យអ្នកស្រី ហ៊ឹម ស៊ីវន មានថ្ងៃនេះ ត្រូវបានលាតត្រដាងថា បន្ទាប់ពីសម័យប៉ុល ពត ដួលរលំនៅក្នុងឆ្នាំ១៩៧៩ គ្រួសាររបស់អ្នកស្រីក៏បានវិលទៅកាន់ស្រុកកំណើតវិញ តែកាលនោះក្រសួងវប្បធម៌ និងវិចិត្រសិល្បៈបានស្រាវជ្រាវរកអ្នកចេះដឹងផ្នែកខាងសិល្បៈដែលសល់ពីរបបប្រល័យពូជសាសន៍នោះ ដូច្នេះដោយសារគ្រួសារអ្នកស្រីមានឈាមជ័រជាអ្នកសិល្បៈតាំងពីដើមនោះ ទើបក្រសួងវប្បធម៌ នាំមកចូលរួមក្រុមនៅរាជធានីភ្នំពេញ។ នោះហើយជាឱកាសផ្ដល់ឲ្យអ្នកស្រី ហ៊ឹម ស៊ីវន បានចូលរៀនផ្នែកតន្ត្រីបុរាណ។
ក្រោយមកអ្នកស្រីក៏បានចូលបម្រើការងារនៅក្នុងក្រុមតន្ត្រីក្រសួងមហាផ្ទៃ នៅអំឡុងឆ្នាំ១៩៨៨ ពេលនោះហើយដែលអ្នកស្រីបានសាងកេរ្តិ៍ឈ្មោះល្បីរន្ទឺនៅក្នុងវិស័យសិល្បៈ និងផ្តើមអាជីពជាតារាចម្រៀងម្នាក់ដោយទទួលបានការហៅច្រៀងពីផលិតកម្មទាំងក្នុង និងក្រៅប្រទេសជាច្រើន។ ផលិតកម្មទាំងនោះមានដូចជា ផលិតកម្ម រស្មីពានមាស បុប្ផា នាគហោះ កម្មករ ឥន្ទធនូ ឆ្លងដែន សាន់ដេ និងរស្មីហង្សមាសជាដើម។
វ័យចេះតែចម្រើនឡើង មិនបង្អង់យូរ អ្នកស្រី ហ៊ឹម ស៊ីវន ក៏បានរៀបអាពាហ៍ពិពាហ៍ជាមួយឯកឧត្ដម ពៅ ម៉ាលី ជាអគ្គនាយករងនៃអគ្គនាយកដ្ឋានក្រសួងសាធារណការ និងដឹកជញ្ជូន និងជាទីប្រឹក្សារបស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីកម្ពុជាកាលពីខែកុម្ភៈ ឆ្នាំ១៩៩២។ ពេលនេះ អ្នកស្រី និងស្វាមីបង្កើតបានកូនពីរនាក់ប្រុសម្នាក់ និងស្រីម្នាក់។ កូនប្រុសច្បងឈ្មោះ ពៅ ពេជ្រមេត្តា មានអាយុ១៨ឆ្នាំ និងកូនស្រីពៅឈ្មោះ ពៅ ពេជ្រករុណា អាយុ១៦ឆ្នាំ។ សព្វថ្ងៃគ្រួសារអ្នកស្រីរស់នៅយ៉ាងរីករាយក្នុងវីឡាដ៏ទំនើបស្ថិតនៅទួលសង្កែ ខណ្ឌ ឫស្សីកែវ រាជធានីភ្នំពេញ។
ការរៀបចំជីវិតរហូតបានសុខដុមទ្រនំខ្ពស់នៅលើវិថីសិល្បៈនេះ អ្នកស្រី ហ៊ឹម ស៊ីវន ធ្លាប់ឆ្លងទ្វីបទៅច្រៀងនៅតាមបណ្តាប្រទេសជាច្រើនលើពិភពលោកមានដូចជា បារាំង សហរដ្ឋអាមេរិក ស្វ៊ីស ហូឡង់ អាល្លឺម៉ង់ អ៊ីតាលី និងបែលហ្ស៊ិកជាដើម៕
ការតស៊ូនឹងព្យាយាមគង់បានសម្រេច ទោះតិចក្ដី ច្រើនក្ដី ឲ្យតែការតស៊ូនោះដើរលើផ្លូវល្អ…