ភ្នំពេញៈ ទន្ទឹមនឹងការងារសិល្បៈរកច្រកឡើងឆាកកាច់រាងបញ្ចេញសាច់សិចស៊ីនៅលើឆាកតន្រ្តីចុងសប្តាហ៍តាមទូរទស្សន៍នានាមិនបាននោះបែរជាលេចដំណឹងថា កំពូលតារាចម្រៀងខ្មែរយ៉េៗ សិចស៊ីឆ្លងទ្វីបនាង ឆៃ លីដាឡែន កំពុងសម្ងំលាបឡេម្សៅក្រែមក្រមួន បន្ទុំស្បែកនិងត្រៀមខ្លួនធ្វើជាកូនក្រមុំ ក្រាបផ្ទឹមជាមួយកូនកំលោះដែលគេស្គាល់ថាជាអ្នកជំនួញមានទ្រព្យសម្បតិ្តយ៉ាងស្តុកស្តម្ភ នៅក្នុងស្រុកម្នាក់។
Tuesday, 19 March 2013
ស៊ូ វុទ្ធី
ភ្នំពេញ ប៉ុស្តិ៍
តារាចម្រៀងសិចស៊ីនាង ឆៃលី ដាឡែន។ រូបថត សេត គឹមសឿន
ថ្មីៗនេះមានដំណឹងដែលកំពុងសាយភាយក្នុងសង្គមសិល្បៈនិងកំពុងផ្សាយបន្តពីមាត់មួយទៅមាត់មួយថាតារាចម្រៀង និងសម្តែងខ្មែរ ដែលសិចស៊ីកក្រើកពិភពសិល្បៈ នាង ឆៃ លីដាឡែន នឹងត្រូវរៀបការជាមួយនឹងបុរសម្នាក់ដែលជាអ្នកជំនួញ ហើយនាងនឹងបញ្ចប់ជីវិតសិល្បៈនាងទៀតផង។
ប្រភពព័ត៌មានពីក្នុងសិល្បៈបាននិយាយថាតារាចម្រៀងរូបស្រស់សិចស៊ីយ៉េៗសម្បូរសាច់ដើមទ្រូង នាង ឆៃ លីដាឡែន បានសម្រេចចិត្តបញ្ចប់ភាពនៅលីវដ៏ស៊ីវិល័យរបស់នាងនៅពេលខាងមុខឆាប់ៗនេះហើយ។ ប្រភពដដែលបន្តថា កូនកំលោះដែលមានសំណាងគ្រងបេះដូងកំពូលតារាចម្រៀងសិចស៊ីយ៉េៗនេះ មានអាយុប្រហាក់ប្រហែលជាមួយនឹងនាង ហើយថែមទាំងជាអ្នកជំនួញផងនោះមិនត្រឹមតែប៉ុណ្ណោះ ដាឡែននឹងត្រូវបញ្ឈប់អាជីពពីការងារសិល្បៈរបស់នាងផងដែរ។
ប្រភពក្រោមដំបូលសិល្បៈដូចគ្នានោះបានបញ្ជាក់ឲ្យដឹងដែរថា ស្វាមីនាងមិនចង់ឲ្យនាងចាប់យកអាជីពជាអ្នកសិល្បៈនោះទេហើយម្យ៉ាងវិញទៀតគឺគេអាចមានលទ្ធភាពគ្រប់គ្រាន់សម្រាប់ចិញ្ចឹមនិងឲ្យនាងសប្បាយហ៊ឺហាមិនចាញ់កាលពីជីវិតនាងនៅជាសិល្បៈនោះឡើយ។
ការសម្រេចចិត្តចូលរោងការយ៉ាងតក់ក្រហល់យ៉ាងដូច្នេះនោះក៏មានការលើកឡើងមិនដាច់សូរផងដែរថាមូលហេតុដែលនាងសម្រេចចិត្តរៀបការព្រោះតែនាងគិតថាអស់សង្ឃឹមនឹងមិនអាចសាងកេរ្តិ៍ឈ្មោះសាជាថ្មីនៅក្នុងសង្គមសិល្បៈបានទៀត។ ដោយសារតែនាងបានសាងកំហុសដោយអចេតនាមួយយ៉ាងធំមហាសាលចំពោះខ្លួនឯង និងប្រពៃណីខ្មែរកាលពីពេលដែលនាងទៅសម្តែងនៅសហរដ្ឋអាមេរិក។
ពួកគេបានបន្ថែមថា នាង ឆៃ លីដាឡែន ទំនងជាគិតថា មានតែសម្រេចចិត្តរៀបការដើម្បីបញ្ចប់ជីវិតនៅលីវនិងខំប្រឹងសាងជីវភាពថ្មីទេទើបបានប្រសើរ។
ដ្បិតថាកំហុសនៃការជ្រុលជ្រួសចំពោះប្រពៃណីវប្បធម៌ខ្មែរគ្រាដែលនាងចេញទៅសម្តែងនៅប្រទេសអាមេរិកកាលពីចុងឆ្នាំ២០១១នោះនាងបានចេញមុខសុំទោសជាបន្តបន្ទាប់ចំពោះមហាជន និងរហូតដល់ក្រសួងយ៉ាងណាក៏ដោយក៏គ្រប់ស្ថានីយទូរទស្សន៍មិនបានចាប់អារម្មណ៍ហៅនាង ឆៃ លីដាឡែន ឡើងច្រៀង ឬក៏ចូលរួមជាភ្ញៀវកិត្តិយសក្នុងកម្មវិធីណាមួយឡើយ ក្រៅពីស្ថានីយទូរទស្សន៍ប៉ុស្តិ៍៩តែមួយគត់ផ្តល់ឱកាសឲ្យនាងឡើងបង្ហាញសមត្ថភាពនិងបានបកស្រាយខ្លះៗពីកំហុសនោះ។
តែយ៉ាងណា ជុំវិញការលើកឡើងទាក់ទិននឹងដំណើរជីវិតរបស់នាង ឆៃ លីដាឡែន ចុងក្រោយនេះ ភ្នំពេញ ប៉ុស្តិ៍ មិនអាចសុំការបំភ្លឺពីតារារូបនេះបានទេខណៈដែលទូរស័ព្ទនាងជាច្រើនខ្សែមិនអាចទទួលការហៅចូលបាន។
ប៉ុន្តែយ៉ាងណាជុំវិញភាពអវិជ្ជមានរបស់នាង ឆៃ លីដាឡែនក្នុងឆាកតន្រ្តីតាមកម្មវិធីទូរទស្សន៍នោះ កន្លងមក លោក សុះ ម៉ាច ប្រធានសមាគមសិល្បករតែងនិយាយថា គ្មានស្ថាប័នពាក់ព័ន្ធសិល្បៈណាគេដាក់កំហុសលើនាងទេហើយកំហុសនោះនាងក៏បានសុំទោសហើយដែរ។
ទាក់ទិនរឿងនេះដែរ ឯកឧត្តម ថៃ នរៈសត្យា រដ្ឋលេខាក្រសួងវប្បធម៌ និងវិចិត្រសិល្បៈ បាននិយាយថា ករណីឆៃលី ដាឡែន នៅអាមេរិកនោះ វាជាការបាចអង្កាមបញ្ជ្រាសខ្យល់ ដូចនេះអង្កាមវាមិនត្រឡប់មកលើខ្លួនយើងវិញ គ្មាននរណាគេធ្វើទណ្ឌកម្មឬដាក់កម្រិតលើនាងទេ។
លោក ថៃ រនៈសត្យា ក៏ធ្លាប់បានបញ្ជាក់យ៉ាងដូច្នេះដែរថាស្ថានីយទូរទស្សន៍គេធ្វើកម្មវិធីគេក៏មិនចង់ហៅតារាឬសិល្បករណាដែលមានរឿងអាស្រូវពាក់ព័ន្ធនឹងវប្បធម៌ដែរ ព្រោះគេខ្លាចប៉ះពាល់កម្មវិធីគេនិងទូរទស្សន៍គេដែរ៕
អោយតែមានរបស់ អូនចង់បានអ្វីក៌បានដែរ ៊៊៊៊៊៊
Big bood and dark skin like chhay lydalen I love !<3!<3! her face is charming love !!!!!
yab merl nas