ភ្នំពេញៈ អ្នកជំនាញការពិសេសរបស់អង្គការសហប្រជាជាតិទទួលបន្ទុកសាលាក្តីខ្មែរក្រហមលោក ដាវីដ សេហ្វ័រ និង ឧបនាយករដ្ឋមន្ត្រី សុខ អានរដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី និងជាប្រធានក្រុមការងាររបស់រាជរដ្ឋាភិបាលសម្រាប់ដំណើរការសាលាក្តីខ្មែរក្រហមបានជួបប្រជុំគ្នា ដើម្បីរិះរកដំណោះស្រាយជុំវិញបញ្ហាកង្វះថវិកា។
Wednesday, 20 March 2013
លាង ផាន់ណារ៉ា
ភ្នំពេញ ប៉ុស្តិ៍
សវនាការ សាលាក្តីខ្មែរក្រហម។ រូបថត AFP
កិច្ចពិភាក្សាដែលបានធ្វើឡើងនៅថ្ងៃពុធនេះគឺធ្វើយ៉ាងណាអាចជួយឲ្យអ.វ.ត.ក បំពេញបេសកកម្មរបស់ខ្លួនក្នុងការស្វែងរកយុត្តិធម៌លើបទឧក្រិដ្ឋដែលបានកើតមាននៅក្នុងរបបខ្មែរក្រហម។
ឧបនាយករដ្ឋមន្ត្រី សុខ អាន បានសម្តែងការកោតសរសើរចំពោះ ការប្តេជ្ញារបស់បុគ្គលិកជាតិទាំងអស់ដែលបាន និងកំពុងបន្តបំពេញកាតព្វកិច្ចរបស់ខ្លួនអំឡុងពេលដ៏លំបាកនេះ។
លោកបញ្ជាក់ថា ប្រសិនបើ អ.វ.ត.ក មិនអាចបំពេញបេសកកម្មរបស់់ខ្លួនឲ្យបានពេញលេញទេ នោះវានឹងអាចជាដំណើរត្រឡប់ថយក្រោយមួយដ៏អាក្រក់សម្រាប់ការស្វែងរកយុត្តិធម៌ ហើយក៏អាចបំផ្លាញនូវកិច្ចខិតខំប្រឹងប្រែងដ៏គួរឲ្យកត់សម្គាល់នៅក្នុងរយៈពេលប៉ុន្មានឆ្នាំកន្លងមកនេះនៅក្នុងការផ្តល់នូវយុត្តិធម៌ដែលបានទន្ទឹងរង់ចាំជាយូរណាស់មកហើយដោយប្រជាជនកម្ពុជាចំពោះឧក្រិដ្ឋកម្មដែលបានប្រព្រឹត្តឡើងនៅចន្លោះឆ្នាំ ១៩៧៥ ដល់ឆ្នាំ ១៩៧៩។
អ្នកជំនាញការពិសេស បានទទួលស្គាល់ថា អ.វ.ត.ក បានបំពេញនូវ កិច្ចការដ៏សំខាន់ក្នុងការបញ្ចប់សំណុំរឿង ០០១ ដោយជោគជ័យ ហើយ អ.វ.ត.ក សន្យាផ្តល់ព័ត៌មានថ្មីបន្ថែមទៀតដល់ប្រជាជនកម្ពុជា និងដល់ពិភពលោក។
យោងតាមសេចក្តីប្រកាសព័ត៌មានរួមស្តីពីកិច្ចពិភាក្សា បានឲ្យដឹងថា ការកាត់បន្ថយថវិកាសរុបទាំងអស់ចំនួនជាង ៦.៥ លានដុល្លារអាមេរិកត្រូវបានធ្វើឡើងនៅក្នុងគម្រោងថវិកាឆ្នាំ ២០១៣ សម្រាប់ភាគីជាតិ និងភាគីអន្តរជាតិ។ ឥឡូវនេះ ឧបសគ្គដែលបន្ទាន់បំផុតនោះ គឺត្រូវធានាថវិកាពេញលេញសម្រាប់ភាគីជាតិ និងភាគីអន្តរជាតិ និងធ្វើឲ្យដំណើរការរបស់ អ.វ.ត.ក មានស្ថិរភាព និងដំណើរការឲ្យបានលឿនជាមួយកាលវិភាគដ៏ប្រាកដប្រជាលើការជំនុំជម្រះក្តីសំណុំរឿង០០២។
សូមបញ្ជាក់ថា សំណុំរឿង ០០១ បានបញ្ចប់ដោយជោគជ័យដែលមានជនជាប់ចោទមួយរូប គឺ កាំង ហ្គេកអ៊ាវ ហៅឌុច អតីតប្រធានមនី្ទរគុកទួលស្លែង ដែលត្រូវបានរកឃើញថាមានពិរុទ្ធភាព និងត្រូវបានផ្តន្ទាទោសដាក់ពន្ធនាគារអស់មួយជីវិតចំពោះឧក្រិដក្ឋកម្មប្រឆាំងនឹងមនុស្សជាតិ និងឧក្រិដ្ឋកម្មសង្គ្រាម។
សំណុំរឿង ០០២ ដែលមានជនជាប់ចោទ នួន ជា និងខៀវ សំផន ដែលត្រូវបានជំនុំជម្រះលើបទឧក្រិដ្ឋដ៏យង់ឃ្នង់នៅក្នុង របបខ្មែរក្រហមកំពុងដំណើរការទៅមុខដ៏គួរឲ្យកត់សម្គាល់។
បើចង់ពិភាក្សារកដំណោះស្រាយអោយបានឆាប់គួរតែទៅ ពិភាក្សារជាមួយកន្តួយម៉ែអាចិននិងអាយួនទៅវាប្រសើរជាង
ព្រោះវាជាមេខ្លោងរបស់ពួកខ្មែរក្រហមស្រាប់ !