ក្រសួងមហាផ្ទៃកម្ពុជាបានឲ្យដឹងតាមរយៈសេចក្ដីប្រកាសមួយនៅថ្ងៃទី២១មីនានេះ ថា ផ្អែកតាមសន្និបាតបូកសរុបលទ្ធផលការងារ ប្រចាំឆ្នាំ២០១២ -២០១៣ របស់អគ្គនាយកដ្ឋានពន្ធនាគារ ក្រសួងមហាផ្ទៃ បានបង្ហាញថា គិតត្រឹមថ្ងៃទី១៥ ខែវិច្ឆិកា ឆ្នាំ២០១២ មានអ្នកជាប់ឃុំ ក្នុងពន្ធនាគារ ទូទាំងប្រទេស មានចំនួន ១៥.៣៩៧ នាក់ ក្នុងនោះមានស្រី្ត ១.២៦១ នាក់។
Thursday 21 March 2013
The Free Press Magazine
យោងតាមរបាយការណ៏បូកសរុបលទ្ធផលការងារប្រចាំឆ្នាំ២០១២ និងទិសដៅភារកិច្ចឆ្នាំ២០១៣ របស់អគ្គនាយកដ្ឋានពន្ធនាគារដែលគេរកឃើញនៅលើគេហទំព័រ ស្នងការនគរបាលជាតិ នៅថ្ងៃទី២១ ខែមីនា ឆ្នាំ២០១៣ បានឲ្យដឹងថាក្នុងចំណោមអ្នកជាប់ឃុំឃាំងក្នុងពន្ធនាគារ សរុបចំនួន ១៥.៣៩៧ នាក់ គឺមានពិរុទ្ធជន ( អ្នកមិនទាន់កាត់ទោស ) ចំនួន ៣.៥៩១ នាក់ ( ស្រី ៣៥៨ នាក់ )។ ទណ្ឌិតចំនួន ១១.៨០៦ នាក់ ( ស្រី ៩០៣ នាក់ ) និងជនបរទេសចំនួន ៦៦៥ នាក់ ( ស្រី ១៨៩ នាក់ )។ រីឯកូនតាមម្តាយ ចំនួន ៨១ នាក់ ( ស្រី ៣៩ នាក់ ) និងស្រីមានផ្ទៃពោះ ចំនួន ១៣ នាក់។ អំឡុងឆ្នាំ២០១១ មានជនជាប់ឃុំក្នុងពន្ធនាគារ ចំនួន ១៥.៤០៤ នាក់ ( ស្រីចំនួន ១.២៥៧ នាក់ )។
របាយការណ៍ ដែលត្រូវបានបង្ហាញក្នុងសន្និបាត នៅព្រឹកថ្ងៃទី២១ ខែមីនា ឆ្នាំ២០១៣ បព្ជាក់ថា គិតពីថ្ងៃទី១៥ ខែវិច្ឆិកា ឆ្នាំ២០១១ ដល់ថ្ងៃទី១៥ ខែវិច្ឆិកា ឆ្នាំ២០១២ មានជនជាប់ឃុំ ចូលថ្មីចំនួន ៧.៦៤៨ នាក់ ( ស្រី ៧៨១ នាក់ )។ កាលពីឆ្នាំកន្លងមក ក៏មានអ្នកជាប់ឃុំក្នុងពន្ធនាគារ ស្លាប់ ចំនួន ៤៦ នាក់ ( ស្រីម្នាក់ )។
របាយការណ៍របស់អគ្គនាយកដ្ឋានពន្ធនាគារ ក៏បានលើកឡើងពីការងារមន្ទីរឃុំឃាំងបណ្តោះអាសន្ន នៃអង្គជំនុំជម្រះវិសាមញ្ញ ក្នុងតុលាការកម្ពុជា ឬតុលាការខ្មែរក្រហម ដោយកំពុងឃុំឃាំងជនជាប់ចោទ ចំនួន ៥នាក់ ក្នុងនោះ ទណ្ឌិត ១នាក់ ជនជាប់ចោទ ៤នាក់ (ស្រី ១នាក់) រួមមាន៖ ទណ្ឌិត កាំង ហ្គេចអ៊ាវ ហៅ ឌុច កំណត់ទោសមួយជីវិត។ ជនជាប់ចោទ នួន ជា ខៀវ សំផន អៀងសារី (ស្លាប់) និងអ្នកស្រី អៀង ធីរិទ្ធ ( ត្រូវបានតុលាការដោះលែងក្រៅឃុំ ដោយមានលក្ខខណ្ឌ )។
តាមសេចក្ដីប្រកាសនោះឲ្យដឹងថា សម្រាប់ឆ្នាំ២១៣គឺអនុវត្តច្បាប់ស្តីពីពន្ធនាគារឲ្យមានប្រសិទ្ធភាព ពង្រឹងកិច្ចសហប្រតិបត្តិការជាមួយស្ថាប័ននានា អង្គការជាតិ និងអន្តរជាតិជា ដៃគូ ដើម្បីកែលម្អ និងដោះស្រាយភាពចង្អៀតណែននៅពន្ធនាគារ និងការអប់រំបណ្តុះបណ្តាលវិជ្ជាជីវៈ និងស្តារនីតិសម្បទាជនជាប់ឃុំ នៅតាមមណ្ឌលអប់រំកែប្រែ និងពន្ធនាគាររាជធានី ខេត្ត ឲ្យមានភាពកាន់តែប្រសើរឡើង៕