ភ្នំពេញៈ អ្នកស្រី ផេង គន្ធាបុរី អតីតពិធីការលោក ជា ស៊ីម ប្រធានព្រឹទ្ធសភានិងគូកន នៅព្រឹកថ្ងៃអង្គារនេះ ត្រូវសាលាឧទ្ធរណ៍ តម្កល់សាលក្រមសាលាដំបូងរាជធានីភំ្នពេញ នៅដដែល។
Tuesday, 30 April 2013
លៀង សារិទ្ធ
ភ្នំពេញ ប៉ុស្តិ៍
លោក ជួន ស៊ុនឡេង ចៅក្រមជំនុំជម្រះសាលាឧទ្ធរណ៍ បានថ្លែងថា សាលាឧទ្ធរណ៍ សម្រេចតម្កល់សាលក្រមរបស់សាលាដំបូងរាជធានីភំ្នពេញ ដែលបានផ្តន្ទាទោស ឈ្មោះ ផេង គន្ធាបុរី ពន្លក ហូ ខៀវ បូរ៉ា នៅដដែរ ។ ចំណែក លោក ចាន់ កុសល ត្រូវបានរលត់បណ្តឹងអាជ្ញា ដោយសារមរណៈរបស់គាត់។
លោកបន្តថា៖«បើកសិទ្ធិប្តឹងសារទុក្ខ តាមកំណត់ច្បាប់»។
សូមបញ្ជាក់ថា អ្នកស្រី ផេង គន្ធាបូរី អាយុ៥៧ឆ្នាំ លោក ចាន់ កុសល អាយុ ៦២ឆ្នាំ និង លោក ពន្លក ហូ អាយុ ៥៨ឆ្នាំ ទាំងបីនាក់ត្រូវសាលាដំបូងរាជធានី កាត់ទោសដាក់ពន្ធនាគារម្នាក់ៗ ចំនួន៤ឆ្នាំ ហើយលោក ខៀវ បូរ៉ា អាយុ ៥២ ឆ្នាំ ឲ្យជាប់ពន្ធនាគាររយៈពេល៣ឆ្នាំ។ លោក ចាន់ កុសល ត្រូវបានស្លាប់ដោយសារជំងឺមហារីកសួត នៅឯបន្ទប់ពន្ធនាគារព្រៃស កាលពីថ្ងៃទី១៣ ខែមិថុនា ឆ្នាំ ២០១២។
ពួកគាត់ត្រូវបានចាប់ខ្លួន ដោយកម្លាំងកងរាជអាវុធហត្ថ ក្នុងខែកញ្ញាឆ្នាំ ២០១១ ដោយជាប់សង្ស័យ ពាក់ពន្ធនឹងការក្លែងបន្លំ និងឆបោកប្រាក់ ពីក្រុមហ៊ុនបរទេស រួមមាន ក្រុមហ៊ុនចិន ម៉ាឡេស៊ី វៀតណាម កូរ៉េខាងត្បូង និងក្រុមហ៊ុនមួយចំនួនទៀត ដោយទទួលបានប្រាក់ជាច្រើន តាមរយៈគម្រោងសាងសង់ សាលារៀន ផ្លូវថ្នល់ មន្ទីរពេទ្យ និងសេវាមនុស្សធម៌ផ្សេងៗទៀតជាច្រើននៅកម្ពុជា។