ភ្នំពេញៈ ពិធីការិនីវ័យក្មេងកាន់តែលេចធ្លោរះកណ្តាលទូរទស្សន៍ស៊ីធីអិន នាង ជីជី ដែលធ្លាប់រងព័ត៌មានពាក់ព័ន្ធនឹងស្នេហាជាមួយឧកញ៉ា និងប្រុសក្មេង តែត្រូវបាននាងច្រានចោលជាបន្តបន្ទាប់នោះ នៅពេលថ្មីៗនេះ នាងក៏បានបង្ហើបប្រាប់ថា ស្ថិតនៅក្នុងវ័យនេះនាងកំពុងឈ្លក់វង្វេងនឹងរឿងដ៏ធំមួយ ដូច្នេះនៅក្នុងអំឡុងពេលនេះ នាងមិនទាន់អាចគិតពីរឿងស្នេហាបានទេ។
Friday, 10 May 2013
សេត គឹមសឿន
ភ្នំពេញ ប៉ុស្តិ៍
ពិធីការិនីនាង ជីជី និង ពេជ្រ សេរីរ័ត្ន ជាបងស្រីបង្កើត។ រូបថត សេត គឹមសឿន
នៅខណៈពេលដែលការងារកាន់តែរីកចម្រើនទាំងនៅក្នុងស្ថានីយទូរទស្សន៍ស៊ីធីអិន និងខាងក្រៅនោះ នាង ជីជី ដែលមានឈ្មោះពិតថា ពេជ្រ សូលីដា ត្រូវបានមហាជនលើកសរសើរពីនាងថា ជាតារាវ័យក្មេងម្នាក់តែពោរពេញដោយសមត្ថភាព ទោះបីជានាងនិយាយនៅក្នុងកម្មវិធីបែបផ្លូវការក៏នាងនិយាយបាន ( ដូចជាកម្មវិធី រាត្រីកម្សាន្ត) និងការនិយាយបែបលេងកំប្លុកកំប្លែងក៏នាងនិយាយបាន(ដូចជាកម្មវិធី សែលកាត នៅ ម៉ាយធីវី)។ លើសពីនេះទៅទៀត ទស្សនិកជនក៏បានលើកសរសើរពីរូបសម្ផស្សរបស់នាងដែលកាន់តែផូរផង់ទៅៗផងដែរ។ ដូច្នេះហើយដែលនោះជាបន្ទុកក្នុងនាមជាស្រីស្អាតដែលគេតែងគិតថា នាងមិនខ្វះអ្នកស្រឡាញ់ឡើយឲ្យតែឆ្លើយអូខេ មួយម៉ាត់នាងនឹងអាចមានទ្រព្យធនស្តុកស្តម្ភភ្លាម។
កន្លងទៅថ្មីៗនេះទៀតពិធីការិនី ជីជី ត្រូវបានគេសង្ស័យថា នាងមានសង្សារជាប្រុសវ័យក្មេងម្នាក់អាយុជាង២០ឆ្នាំដោយសារព័ត៌មានបានផ្សាយថា គេបានប្រទះឃើញនាងបានកៀកកិតស្និទ្ធស្នាល ផ្អែមល្ហែមជាមួយគ្នានៅក្នុងក្លិបកម្សាន្តមួយក្នុងរាជធានីភ្នំពេញ ហើយបុរសវ័យក្មេងម្នាក់នេះ ត្រូវគេដឹងថា ជាកូនអ្នកមានទ្រព្យធនម្នាក់នៅភ្នំពេញ។
ប៉ុន្តែ ព័ត៌មានចចាមអារ៉ាមទាំងប៉ុន្មាននោះ ក៏ត្រូវកញ្ញាជីជី តែងធ្វើការបដិសេធជាបន្តបន្ទាប់ ដោយនាងថែមទាំងអះអាងថា នេះមិនមែនជាការពិតឡើយព្រោះថាគ្រាន់តែជាពាក្យចចាមអារ៉ាមតែប៉ុណ្ណោះ ការពិតនាងមិនបានប្រព្រឹត្តបែបនោះឡើយ។ យ៉ាងណាមិញការលេចឮព័ត៌មានរឿងអាស្រូវបែបនោះ នាងបានបញ្ជាក់ថា អ្នកសិល្បៈ តែងជួបជំពប់ព័ត៌មាននេះ គេចមិនផុតឡើយ។
ជាមួយបទសម្ភាសជាមួយនឹងសារព័ត៌មានសិល្បៈនៅក្នុងស្រុក នាង ជីជី ដែលអាក់អន់ស្រពន់ចិត្តរឿងគេលើកដាក់ស្នេហ៍នាងម្តងជាមួយអ្នកនេះ ម្តងជាមួយនឹងអ្នកនោះ បានបញ្ជាក់ថា៖«សព្វថ្ងៃនេះបើទោះបីជាខ្ញុំ ប្រាប់គេថា ខ្ញុំគ្មានសង្សារ គ្មានអ្នកស្រឡាញ់ ក៏គេមិនជឿនោះដែរ។ ខ្ញុំក៏សូមប្រាប់ថា សព្វថ្ងៃនេះ ខ្ញុំមិនខ្វះទេអ្នកដែលស្រឡាញ់ខ្ញុំនោះ តែខ្ញុំមិនបានទទួលយកស្នេហ៍ពីបុរសណាមួយនោះឡើយ។ សព្វថ្ងៃ ខ្ញុំនៅក្មេង កំពុងតែឈ្លក់វង្វេងនឹងការងារសិល្បៈ នឹងអាជីពរបស់ខ្ញុំ មិនទាន់គិតដល់រឿងស្នេហា ឬគូអនាគតទេ»។
ទន្ទឹមនឹងនេះនាងបានប្រាប់ថា៖« សព្វថ្ងៃនេះ ខ្ញុំក៏មានការធុញថប់នឹងព័ត៌មានចចាមអារ៉ាមដែលតែងតែមានមកលើរូបខ្ញុំនោះ តែខ្ញុំក៏មិនអាចហាមឃាត់មាត់គេមិនឲ្យនិយាយបានដែរ»៕
មានអីអាមួយអាវសមុខមានមុនស្នេហតើ បងរង់ចាំអូនទាល់តែអូនឆ្លើយថាអូខេ
មើលក្មេងគួរអោយស្រលាញ់ ស្អាត់ទាំងអស់រួមទាំងរបស់ផ្សេងៗផង។
អូនជីអើយ ! កុំរវល់ខ្លាំងពេក ប្រយត្ន័ចាស់ខ្លួន ខាតអស់ណាអូន បងឯនេះ មានពេលទំនេរច្រើនណាស់
ចាំបងនាំអូនដើរលេង Ok !