កំពង់ចាម: ករណីអាជ្ញាធរស្រុកតំបែរ បានបញ្ចុះបញ្ចូលអ្នកភូមិស្រែប្រាំង ឃុំត្រពាំងព្រីង ឲ្យលក់ដីព្រៃសហគមន៍ទំហំជាង ៩០ ហិកតា ទៅឲ្យមន្ត្រីយោធាខេត្តកំពង់ចាមម្នាក់ បានលុយចំនួនប្រាំបីម៉ឺនដុល្លារ ដើម្បីយកមកសង់ព្រះវិហារប្រចាំភូមិនោះ បែរជាលេចឮថា ដីនោះមានទំហំជាង ១៥០ហិកតា និងបានប្រាក់ពីការលក់ដីសរុបប្រមាណ ២០ម៉ឺន ដុល្លារអាមេរិកឯណោះ។
ថ្ងៃទី 18 ឧសភា 2013
ដោយ: កងមាស
CEN
ប្រភពព័ត៌មានពីអ្នកភូមិស្រែប្រាំង បានប្រាប់គេហទំព័រ CEN កាលពីថ្ងៃទី១៦ ខែឧសភា ឆ្នាំ២០១៣ ថា ប្រការដែលនាំឲ្យមានរឿងលក់ដីព្រៃខាងលើបង្កឲ្យមានភាពមិនប្រក្រតីនោះ មុនដំបូង គណៈកម្មការ ពុទ្ធបរិស័ទចំណុះជើងវត្តស្រែប្រាំង បានឯកភាពគ្នារៃបច្ច័យដើម្បីសង់ព្រះវិហារមួយខ្នង ជំនួសព្រះវិហារសង់អំពីឈើ ដែលចាស់ទ្រុឌទ្រោមនោះ។ ប៉ុន្តែការរៃបច្ច័យអត់បាន ក៏ងាកមកធ្វើការអំពាវនាវរកជំនួយពីសប្បុរសជន។ កាលនោះ គណៈកម្មការវត្ត បានសុំឲ្យស្រុកតំបែរជួយដោះស្រាយ។
ប្រភពដដែលបានឲ្យដឹងទៀតថា ប៉ុន្តែអាជ្ញាធរស្រុកនេះ មិនបានកៀរគររកម្ចាស់ជំនួយជាសប្បុរសជនទេ គឺនៅក្នុងអំឡុងដើមឆ្នាំ ២០១៣ កន្លងទៅ បានកោះហៅប្រជាពលរដ្ឋក្នុងភូមិស្រែប្រាំងជាង ២០០គ្រួសារ ប្រជុំក្នុងវត្តដោយសុំការឯកភាព។ ក្នុងនោះបើនរណាមានគំនិតចង់លក់ដីព្រៃសហគមន៍ខាងក្រោយភូមិ យកលុយសង់ព្រះវិហារ សូមទះដៃជាសញ្ញាយល់ព្រម ហើយបើនរណាមានគំនិតចង់ទុកដីចែកគ្នា ក៏ទះដៃជាសញ្ញាដែរ។ ប៉ុន្តែបន្ទាប់ពីលោក ប៉ែន អៀន ជាជំនួយការលោក ឆឹង ពិសិដ្ឋ អភិបាលស្រុកនេះប្រកាសហើយ កាលនោះអត់មាននរណាម្នាក់ក្នុងភូមិគាំទ្រគំនិតទាំងពីរនោះឡើយ។
ដោយមិនបានសម្រេចរឿងលក់ដីព្រៃនោះ លោក មុំ អេង ជាប្រធានគណៈកម្មការវត្តស្រែប្រាំង និងអតីតសមាជិកក្រុមប្រឹក្សាឃុំត្រពាំងព្រីង បានដើរតាមផ្ទះបញ្ចុះបញ្ចូលប្រជាពលរដ្ឋក្នុងភូមិស្រែប្រាំង ឲ្យផ្តិតមេដៃគាំទ្ររឿងលក់ដីទំហំជាង ៩០ ហិកតានោះ។ ក្រោយមក កាលពីជាងមួយខែមុន ក៏បានឃើញឈ្មួញដឹកគ្រឿងចក្រចូលទៅឈូសឆាយដីព្រៃរបស់សហគមន៍នោះ។ ដោយមានមន្ត្រីយោធាខេត្តកំពង់ចាមម្នាក់ឈ្មោះ ម៉ែន ចាន់ធឿន ជាអ្នកទិញក្នុងតម្លៃ ៨០.០០០ ដុល្លារអាមេរិក។
ជុំវិញការកាត់ដីព្រៃលក់នោះ កាលពីថ្ងៃទី ៤ ខែឧសភា ឆ្នាំ២០១៣ អ្នកសារព័ត៌មានច្រើនអង្គភាព បានធ្វើដំណើរទៅកាន់កន្លែងដីព្រៃដែលឈ្មួញកំពុងឈូសឆាយ បានជួបជាមួយមេការប្រចាំការឈូសដីព្រៃនោះឈ្មោះ លោក ម៉ម សាវឿន បានបញ្ជាក់ថា ដីដែលគ្រឿងចក្រកំពុងឈូសឆាយយកព្រៃចេញនោះជារបស់លោក ម៉ែន ចាន់ធឿន ជាមន្ត្រីយោធាខេត្តកំពង់ចាម បានទិញយកដីធ្វើជាចម្ការកៅស៊ូ។ ចំណែកបញ្ហារឿងលក់ដូរដីនេះយ៉ាងណា លោកអត់ដឹងទេ គឺសួរទៅលោក ប៉ែន អៀន ជាជំនួយការអភិបាលស្រុកនេះ នឹងដឹងច្បាស់ហើយ។
លោក ប៉ែន អៀន បានឆ្លើយប្រាប់ CEN កាលពីថ្ងៃទី ១០ ខែឧសភា ឆ្នាំ២០១៣ថា ” ពិតជាមានការលក់ដីរេចរឹល ជាអាករភូមិទៅឲ្យលោក ម៉ែន ចាន់ធឿន មែន។ បន្ទាប់ពីមានសំណើរបស់អ្នកភូមិស្រែប្រាំងសុំលក់យកលុយធ្វើព្រះវិហារឡើងមកអាជ្ញាធរស្រុក និង ខេត្ត “។ ប៉ុន្តែលោក ប៉ែន អៀន មិនបានបញ្ជាក់អំពីទំហំដីប៉ុនណា និងចំនួនទឹកប្រាក់ដែលលក់បាន ដើម្បីដោះដូរយកលុយសង់ព្រះវិហារចំនួនប៉ុន្មានដែរ?
ប៉ុន្តែប្រភពព័ត៌មានពីអ្នកភូមិស្រែប្រាំងដដែល បានឲ្យដឹងទៀតថា ព័ត៌មានរឿងលក់ដីព្រៃដោះដូរយកលុយសង់ព្រះវិហារភូមិស្រែប្រាំង ខាងអាជ្ញាធរបានប្រកាសប្រាប់គណៈកម្មការចំណុះជើងវត្ត និងអ្នកភូមិថា ដីនោះមានទំហំជាង ៩០ ហិកតា លក់បានលុយសរុបចំនួន ប្រាំបីម៉ឺនដុល្លារអាមេរិក ហើយបច្ចុប្បន្ន គណៈកម្មការវត្ត បានទទួលលុយចំនួន បីម៉ឺនដុល្លារ ដើម្បីយកទៅចាត់ចែងទិញសម្ភារៈសំណង់ដែលកំពុងដំណើរការសាងសង់ព្រះវិហារនោះ។
តែព័ត៌មានច្បាស់ការមួយទៀត បានឲ្យដឹងថា តាមឯកសារដីដែលបានលក់នោះ មានទំហំសរុបចំនួន ១៥៥ ហិកតា លក់បានប្រាក់សរុបប្រមាណ ម្ភៃម៉ឺនដុល្លារឯណោះ។ មានន័យថា ការដោះដូរដីសង់ព្រះវិហារនោះ បានបាត់ដីអស់ជាង ៥០ ហិកតា និងលុយជាងដប់ម៉ឺនដុល្លារ។
ប្រភពនោះ បានបន្តថា បច្ចុប្បន្ន ដីដែលបានដោះដូរធ្វើព្រះវិហារនោះ ខាងក្រុមនិស្សិត និងខាងក្រុមបច្ចេកទេសសុរិយោដី បានចុះទៅវាស់វែងរួចហើយ កាលពីសប្តាហ៍មុន បានបែកចែកជាដប់ក្បាលដី ឲ្យទៅមន្ត្រីយោធាឈ្មោះ ម៉ែន ចាន់ធឿន ហើយនៅថ្ងៃទី ២៣ ខែឧសភា ឆ្នាំ២០១៣ ខាងមុខនេះ ម្ចាស់ដីនឹងចុះទៅទូទាត់លុយជាមួយគណៈកម្មការវត្តស្រែប្រាំងដែលនៅសល់នោះ។
ទាក់ទិននឹងការដោះដូរដីព្រៃសហគមន៍ដើម្បីយកលុយសង់ព្រះវិហារ បង្កឲ្យមានការលេចឮភាពមិនប្រក្រតីនេះ កាលពីថ្ងៃទី ១៦ ខែឧសភា ឆ្នាំ២០១៣ CEN បានធ្វើការទំនាក់ទំនងតាមទូរស័ព្ទតាមប្រព័ន្ធ ០៩៧ ទៅលោក ម៉ែន ចាន់ធឿន ដើម្បីបំភ្លឺពីទំហំដីពិតប្រាកដដែលលោកបានទិញ និងពីតម្លៃឲ្យបានច្បាស់លាស់នោះ គឺបានហៅចូលច្រើនដងហើយ តែគ្មានអ្នកទទួល៕ S
និទណ្ឌភាពនៃរបបតេជោសែន បានធ្វើឲ្យពួកជ្រកក្រោមក្លៀកតេជោប្រព្រឹត្តអំពើទុច្ចរិតឥតមានខ្មាស គ្មានមនសិការ កេងប្រវញ្ច័ ជញ្ជក់ឈាមរាស្ត្រស្រេច តែនឹងចិត្ត តើពេលណាទើបពួកនេះរលាយ រឺត្រូវរហូតដល់ទឹកដីខ្មែរ រាស្រ្តខ្មែររលាយទៅទើបអស់ពួកនេះរឺ ?
សម័យសម្ដេចតេចោរគឺមនុស្សមិនត្រឹមតែដណ្ដើមគ្នារស់ទេ គឺដណ្ដើមគ្នាធ្វើមាន អាធំជាន់កអាតូចតៗគ្នា អាធំមានជាងគេ បន្ទាប់មកអាតូចបន្ទាប់និងតៗគ្នាជាហូរហែរ ខ្មែរម្នាក់ៗបាត់បង់ប្រាសចាកអស់នូវសមធម៌,សិលធម៌,និងគុណធម៌រួមទាំងសង្ឃមួយចំនួន
ផង ដោយម្នាក់ៗគិតតែពីស្វែងរកលាពសក្ការះផ្ទាល់ៗខ្លួន គិតតែពីបូមជញ្ជក់ឈាមជាតិឯងនិងពលរដ្ឋតូចតាចដូចសត្វឈ្លើង គ្មានខ្វល់ពីប្រទេសជាតិនិងពលរដ្ឋរបស់ខ្លួនឡើយ គឺជានយោបាយដេញពលរដ្ឋខ្មែរក្រីក្រឲ្យរត់ចោលស្រុកឲ្យអស់ ដើម្បីបញ្ចូលជាតិសាសន៍យួន
ដែលជានយោបាយបែបសម័យថ្មីដោយមិនបាច់ធ្វើសង្គ្រាម មិនបាច់ចំណាយធនធានលុយនិងជីវិតមនុស្សដើម្បីប្លន់ទឹកដីខ្មែរ។