ដោយ៖​ កែវ រតនៈ​
ថ្ងៃចន្ទ ទី28 ខែតុលា ឆ្នាំ2013
http://vodhotnews.com

លោក ខៀវ សំផន (រូបភាពដោយ eccc.org.kh)

​សាលាក្តី​ខ្មែរក្រហម នៅ​ព្រឹក​ថ្ងៃ​ចន្ទ​នេះ បន្ត​សវនាការ​ធ្វើ​សេចក្តីសន្និដ្ឋាន​បិទ​បញ្ចប់​កិច្ចពិភាក្សា​ដេញដោល​ក្នុង​សំណុំរឿង​០០២/០១ ដោយ​​មាន​មេធាវី​ការពារ​ឲ្យ​ជនជាប់ចោទ​ ខៀវ សំផន ឡើង​បកស្រាយ​។​

​នៅក្នុង​បន្ទប់​សវនាការ ជនជាប់ចោទ​ខៀវ សំផន កំពុង​អង្គុយ​ស្តាប់ ដោយ​សហ​មេធាវី​ជាតិ​ការពារ​ក្តី លោក គង់ សំអុន និង សហ​មេធាវី​អន្តរជាតិ​ការពារ​ក្តី​លោក អា​ថឺ វែ​រកិន​(Arthur Vercken) ឡើង​បកស្រាយ​នៅ​ខាង​មុខ​ចៅក្រម​។​​

កាលពី​ថ្ងៃ​ទី​២១ ខែតុលា នៅ​ពេល​បញ្ចប់​ការធ្វើ​សេចក្តីសន្និដ្ឋាន សហ​ព្រះរាជអាជ្ញា​ជាតិ លោកស្រី ជា លាង បាន​ស្នើសុំ​អង្គជំនុំជម្រះ​សាលាដំបូង ដាក់​ទោសទណ្ឌ​ចំពោះ​ជនជាប់ចោទ ខៀវ សំផន និង នួន ជា ចំពោះ​ការចោទប្រកាន់​ពី​ឧក្រិដ្ឋកម្ម​ប្រឆាំង​នឹង​មនុស្សជាតិ និង​ផ្តន្ទាទោស​ដាក់​ពន្ធនាគារ​អស់​មួយ​ជីវិត​។​

​អង្គជំនុំជម្រះ​វិសាមញ្ញ​ក្នុង​តុលាការ​កម្ពុជា កាលពី​ថ្ងៃ​ទី​១៦ ខែតុលា បាន​បើក​សវនាការ​ធ្វើ​សេចក្តីសន្និដ្ឋាន​បញ្ចប់​កិច្ច​ពិភាក្សា​ដេញដោល លើ​សំណុំរឿង ០០២/០១ ពាក់ព័ន្ធ​នឹង​ជនជាប់ចោទ នួន ជា និង​ខៀវ សំផន​។​សវនាការ​នេះ នឹង​បន្ត​រហូត​ដល់​ថ្ងៃ​ព្រហស្បតិ៍ ទី​៣១​ខែតុលា ឆ្នាំ​២០១៣​។​

​ជនជាប់ចោទ​នៅ​ក្នុង​សំណុំរឿង ០០២/០១ រួមមាន នួន ជា អតីត​អនុ​លេខា​នៃ​បក្សកុម្មុយនិស្ត​កម្ពុជា ហើយ​ខៀវ សំផន គឺ​ជា​អតីត​ប្រមុខរដ្ឋ​នៃ​របប​កម្ពុជា​ប្រជាធិបតេយ្យ​។ បទ​ចោទ​នៅ​ក្នុង​សំណុំរឿង ០០២/០១ ផ្តោត​ទៅ​លើ​ការចោទប្រកាន់​លើ​ឧក្រិដ្ឋកម្ម​ប្រឆាំង​នឹង​មនុស្សជាតិ ទាក់ទង​អង្គហេតុ​នៃ​ការជម្លៀស​ប្រជាជន​ដោយ​បង្ខំ​ពី​ទីក្រុង​ភ្នំពេញ​នៅ​ខែ មេសា ឆ្នាំ​១៩៧៥ និង​ការជម្លៀស​ប្រជាជន​ពី​តំបន់​ផ្សេងៗ​ទៀត (​ដំណាក់កាល​ទី​១ និង​ទី​២) ហើយ​នឹង​ការចោទប្រកាន់​ពី​ការសម្លាប់​រង្គាល​ទៅលើ​ទាហាន លន់ នល់ នៅ​ទួល​ពោធិ៍​ជ្រៃ នៅក្នុង​ទឹកដី​ខេត្ត​ពោធិ៍សាត់​៕

​សូម​សរសេរ​មកកាន់ លោក កែវ រតនៈ តាមរយៈ ratanah@vodhotnews.com