ចង្រិត​ដែក​ដ៏​សម្បូរ​ប្រូតេអ៊ីន​នឹង​ទៅ​ដល់​ទីផ្សារ​ចិន បារាំង និង​អាមេរិក

Friday, 27 December 2013
Miranda Glasser
ភ្នំពេញ ប៉ុស្តិ៍

131227_20a

លោក ជេរ៉ាត ថេវ៉ង់ណិត និង​​ ហ្វីលីព ឡឺណាំង ស្ថាបនិក​ក្រុមហ៊ុន​ចង្រិត​ដែក​ខ្មែរ​​។

ភ្នំពេញ : តារាភាពយន្ត​ហូលីវូដ​ដ៏​ល្បីល្បាញ​នាង អេនជេលីណា ជោលី បាន​និយាយ​ថា កូនៗ​របស់​នាង​ជក់​ចិត្ត​ញ៉ាំ​ចង្រិត​បំពង​ដូច​នំស្រួយ​កញ្ចប់​អ៊ីចឹង។ ខណៈ​ដែល​ប្រជាជន​កម្ពុជា​ចូលចិត្ត​ទទួលទាន​ចង្រិត​បំពង តើ​សត្វល្អិត​ដ៏​សម្បូរ​ប្រូតេអ៊ីន​នេះ​អាច​នឹង​ទទួល​បាន​ប្រជាប្រិយភាព​លើ​ទីផ្សារ​បរទេស​ដែរ​ឬ​ទេ?

ក្រុមហ៊ុន ចង្រិត​ដែក​ខ្មែរ (Khmer Iron Cricket) គិត​ថា​វា​ពិតជា​អាច​ទៅ​រួច ព្រោះ​ចង្រិត​ផ្ទុក​ទៅ​ដោយ​ប្រូតេអ៊ីន​ខ្ពស់ ហើយ​វា​អាច​កែច្នៃ​ទៅ​ជា​នំ​ដុត ម្សៅ​ប្រូតេអ៊ីន​ម៉ដ្ឋ និង​ជា​ចង្រិត​សម្ងួត​ប្រឡាក់​គ្រឿង​ដ៏​ឆ្ងាញ់​ពិសា​សមស្រប​នឹង​ទីផ្សារ បរទេស​។ ក្រុមហ៊ុន​មួយ​នេះ​ក៏​យល់​ឃើញ​ទៀត​ថា ចង្រិត​ជា​ប្រភព​ប្រូតេអ៊ីន​ដ៏​ល្អ​សម្រាប់​ប្រជាជន​កម្ពុជា​ដែរ​។



ក្រោយពី​សម្ពោធ​ប្រតិបត្តិការ​នៅ​ខេត្ត​កែប និង​រាជធានី​ភ្នំពេញ​កាលពី​ខែ​មុន ជនជាតិ​បារាំង ជេរ៉ាត ថេវ៉ង់ណិត និង​លោក ហ្វីលីព ឡឺណាំង បាន​ក្លាយ​ទៅ​ជា​អាជីវករ​លក់​អាហារ​ចម្អិន​ពី​សត្វ​ចង្រិត​នៅ​តំបន់​អង្គរ តាមរយៈ​សណ្ឋាគារ​នានា​ដូចជា វិចតូរៀ អង្គរ សណ្ឋាគារបុប្ផាអង្គរ និង​ភោជនីយដ្ឋាន កាស្យា​ជាដើម។

លោក ហ្វីលីព ឡឺណាំង បាន​ឲ្យ​ដឹង​ថា៖ «បច្ចុប្បន្ន​យើង​មាន​ទីតាំង​លក់​២៥ កន្លែង​នៅ​សៀមរាប»។

លោក ជេរ៉ាត ថេវ៉ង់ណិត និង​លោក ហ្វីលីព ឡឺណាំង មាន​បទពិសោធ​រស់នៅ​ប្រទេស​កម្ពុជា​ជាច្រើន​ឆ្នាំ​មក​ហើយ។ អ្នក​ទាំង​ពីរ​ស្វែង​យល់​ថា ទឹកដី​នេះ​មិន​ត្រឹម​តែ​សម្បូរ​ចង្រិត​ទេ សូម្បី​តែ​ការ​បើក​កសិដ្ឋាន​ចិញ្ចឹម​សត្វល្អិត​នេះ​ក៏​មិន​សូវ​ចំណាយ​អស់ច្រើន​ដែរ។ អ្វី​ដែល​សំខាន់​គឺ​សត្វចង្រិត​ផ្ទុក​នូវ​ប្រូតេអ៊ីន​ខ្ពស់​បំផុត​រហូត​ដល់​ទៅ​៥៩​ភាគរយ​ឯណោះ។

ក្រុមហ៊ុន​ចង្រិត​ដែក​ខ្មែរ​របស់​លោក​មាន​លក់​នូវ ចង្រិត​សម្ងួត​ប្រឡាក់​គ្រឿង​ខ្ទឹមស ដែល​គេ​ប្រើ​រយៈពេល​ដុត​ចម្អិន​១៤​ម៉ោង ម្សៅ​ប្រូតេអ៊ីន​បាន​មកពី​ការ​កិន​សត្វចង្រិត​ម៉ដ្ឋ និង​នំ​ដុត​រសជាតិ​កាហ្វេ ដូង និង​ទុរេន​ដែល​មាន​ញាត់​សត្វចង្រិត​ក្នុង​នោះ។

អាហារ របស់​ក្រុមហ៊ុន​លោក​ត្រូវ​បាន​វេចខ្ចប់​យ៉ាង​មាន​សណ្ដាប់ធ្នាប់ ជាមួយ​នឹង​គម្រប​ប្លាស្ទិក​ថ្លា ស័ក្ដិសម​ទៅ​នឹង​ពាក្យ​ស្លោក​ថា ជា«​អាហារ​ឆ្ងាញ់​ពោរពេញ​ដោយ​ថាមពល»។

ទាក់ទិន​នឹង​ពាក្យ​ស្លោក​នេះ លោក ហ្វីលីព ឡឺណាំង បាន​ពន្យល់​ថា៖ «យើង​សាកសួរ​អ្នក​ដែល​បាន​ញ៉ាំ​ចង្រិត​នេះ ពួកគេ​គិត​ថា​ញ៉ាំ​ចង្រិត​ធ្វើឲ្យ​ពួកគេ​មាន​កម្លាំង​ខ្លាំងក្លា»។

លោក បាន​រៀបរាប់​ទៀត​ថា៖ «យើង​ក៏​មាន​លក់​ម្សៅ​ប្រូតេអ៊ីន​បាន​មកពី​ការ​កិន​ចង្រិត​ឲ្យ​ម៉ដ្ឋ។ ម្សៅ​នេះ​អាច​យក​ទៅ​ចម្អិន​លាយ​ជាមួយ​អាហារ​ដូច​ម្សៅស៊ុប​ដែរ ដើម្បី​បន្ថែម​ជីវជាតិ។ នេះ​គឺជា​គោលដៅ​មួយ​របស់​យើង​ក្នុង​ការ​ជួយ​ទប់ស្កាត់​បញ្ហា​កង្វះ​ជីវជាតិ​សម្រាប់​កុមារ​នៅ​កម្ពុជា»។

លោក បាន​ទាក់ទង​បណ្ដា​អង្គការ​ជាច្រើន ក៏​ដូចជា កម្មវិធី​ចំណី​អាហារ​ពិភពលោក​ដើម្បី​រួម​ចំណែក​កាត់​បន្ថយ​បញ្ហា​ជំងឺ​ខ្វះ ជីវជាតិ​ផង​ដែរ។

ក្រៅពី​តួនាទី​ក្នុង​ការ​ផ្ដល់​ប្រូតេអ៊ីន​ដល់​មនុស្ស សត្វល្អិត​នេះ​ក៏​ត្រូវ​បាន​ភ្ញៀវទេសចរ​មួយ​ចំនួន​ជាប់ចិត្ត​នឹង​រសជាតិ របស់​វា​ផង​ដែរ។

ស្ថាបនិក​ក្រុមហ៊ុន​ទាំង​ពីរ​បាន​រំឭក​ថា៖ «ដើម​ឡើយ​យើង​មិន​គិត​ថា​ភ្ញៀវទេសចរ​អាច​ចាប់​អារម្មណ៍​អាហារ​នេះ​ទេ ប៉ុន្តែ​នៅ​ខេត្ត​កែប ជនបរទេស​ណា​ដែល​បាន​ភ្លក្ស​ចង្រិត​នេះ ស្រាប់តែ​ជាប់​ចិត្ត​នឹង​រសជាតិ​របស់​វា»។

ទោះ​យ៉ាង​ណា ស្ថាបនិក​ក្រុមហ៊ុន​បារាំង​នេះ​ក៏​បាន​ឆ្លងកាត់​នូវ​បញ្ហា​ជាច្រើន​ដែរ ទំរាំ​តែ​ចម្រាញ់​បាន​អាហារ​ធ្វើ​ពី​ចង្រិត​មាន​រសជាតិ​ដូច​ថ្ងៃ​នេះ។

បច្ចុប្បន្ន​ចង្រិត​ជាង​១,៥​លាន​ក្បាល​ត្រូវ​បាន​ពួកគេ​ចិញ្ចឹម​នៅក្នុង​ផ្ទៃដី​៣០០​ម៉ែត្រការ៉េ តាមរយៈ​ការ​ផ្ដល់​អាហារ បន្លែ ល្ពៅ និង​ត្រប់។ ការ​ប្រមូលផល​ត្រូវ​ធ្វើ​ឡើង​រៀងរាល់​៦​សប្ដាហ៍។ ចង្រិត​ទាំងនោះ​ត្រូវ​បាន​ចម្អិន​តាមរូបមន្ត​របស់​ចុងភៅ​ជំនាញ​លោក ជេរ៉ាត ថេវ៉ង់ណិត​។

នៅ​ថ្ងៃ​អនាគត​ឆាប់ៗ​នេះ ក្រុមហ៊ុន​របស់​លោក​គ្រោង​នឹង​នាំ​អាហារ​សត្វល្អិត​នេះ​ទៅ​បរទេស​ថែម​ទៀត​ផង។

លោក ហ្វីលីព ឡឺណាំង បាន​ថ្លែង​ថា៖ «យើង​កំពុង​តែ​ស្រាវជ្រាវ​ផលិត​អាហារ​ប្រូតេអ៊ីន​ពិសេស​សម្រាប់​អ្នក​ហាត់ កីឡា។ យើង​កំពុង​តែ​ពិភាក្សា​គ្នា​ជាមួយ​បណ្ដា​ក្រុមហ៊ុន​នៅ​បារាំង អាមរិក និង​ចិន។ យើង​ត្រៀម​ខ្លួន​ជា​ស្រេច​ក្នុង​ការ​ពង្រីក​ទៅ​បរទេស»។

លោក​សង្កត់ធ្ងន់​ថា​៖ «មនុស្ស​គ្រប់​រូប​ចេះ​ញ៉ាំ​សត្វល្អិត លើកលែង​តែ​ជនបរទេស​លោក​ខាង​លិច​ទេ»។

លោក បញ្ជាក់​ថា៖ «សាច់​គោ​មាន​ប្រូតេអ៊ីន​២៨​ភាគរយ សាច់មាន់​២០-២៥​ភាគរយ ត្រី​១០-១៣​ភាគរយ រីឯ​សត្វចង្រិត​វិញ​ផ្ទុក​ប្រូតេអ៊ីន​ដល់​ទៅ​៥៩​ភាគរយ គឺ​វា​ច្រើន​ណាស់»៕


What Next?

Recent Articles

4 Responses to "ចង្រិត​ដែក​ដ៏​សម្បូរ​ប្រូតេអ៊ីន​នឹង​ទៅ​ដល់​ទីផ្សារ​ចិន បារាំង និង​អាមេរិក"

  1. Next Generation says:

    ខ្ញុំចង់សួរថាចង្រិតដែកឬចង្រិតដូង ព្រោះបើតាមខ្ញុំដឹងចង្រិតដែកគេមិនដែលញ៉ាំទេគេញ៉ាំតែចង្រិតដួង ។

  2. អ្នកតាដោះក្រមុំ says:

    សាកម្តងមើល ទើបដឹងថាចង្រឹតដែកឆ្ញាញ់! ខ្ញុំមិនដែលសាកផលិតផលក្រុមហ្នឹងធ្វើ តែខ្ញុំចាប់បានតាមដីអាចម៌នង្គ័ល ហើយលីងដាក់គ្រឿង ឆ្ញាញ់ចាប់មាត់មែន។

  3. Terminator III says:

    Many different varieties of insects are high in proteine and edibled by lots of people around the world, except some picky westerners who considered insects as gross and disgusting. I am one of the insects consumers, some how they are good for snack if properly cooked. For the best tasty result, they get along well with beer or home made rice wine.

  4. vuth says:

    I am interesting with cricket feed . Can you share experience ?
    Thank you