តំណាង​រាស្ត្រ​បក្ស​ប្រឆាំង​គ្រោង​ទៅ​ជួប​ពលរដ្ឋ​២៣​នាក់​ជាប់​ឃុំ​នៅ​កំពង់ចាម​ថ្ងៃ​ទី​៤

បេក្ខជន​ជាប់​ឆ្នោត​ជា​តំណាង​រាស្ត្រ​មក​ពី​គណបក្ស​សង្គ្រោះ​ជាតិ គ្រោង​ធ្វើ​ដំណើរ​ទៅ​សួរ​សុខ​ទុក្ខ​ពលរដ្ឋ ២៣​នាក់ ដែល​កំពុង​ជាប់​ឃុំ​ក្នុង​ពន្ធនាគារ​ខេត្ត​កំពង់ចាម នៅ​ថ្ងៃ​ទី​៤ ខែ​កុម្ភៈ ខាង​មុខ។ ការ​ព្យាយាម​ទៅ​សួរ​សុខ​ទុក្ខ​នេះ បន្ទាប់​សហជីព​កម្មករ និង​អ្នក​ការពារ​សិទ្ធិ​មនុស្ស​នៃ​អង្គការ​មិន​មែន​រដ្ឋាភិបាល​មួយ​ចំនួន ត្រូវ​បាន​អគ្គនាយកដ្ឋាន​ពន្ធនាគារ​បដិសេធ​សំណើ​សុំ​ចូល​ជួប​អ្នក​ទាំង ២៣​នាក់​នោះ។

ដោយ សេក បណ្ឌិត
2014-02-01
RFA

ស្ដាប់ ឬ ទាញ​យក​សំឡេង
ស្តាប់សំឡេង ថតសំឡេង

សុន ឆ័យ ៦១០
លោក សុន ឆ័យ ក្នុង​កិច្ច​ពិភាក្សា​របស់​វិទ្យុ​អាស៊ីសេរី កាល​ពី​យប់​ថ្ងៃ​ទី​៤ សីហា ឆ្នាំ​២០១៣។ Photo: RFA

គណបក្ស​ប្រឆាំង​កំពុង​រង់ចាំ​ការ​ឆ្លើយ​តប​ពី​សាលា​ដំបូង​រាជធានី​ភ្នំពេញ ចំពោះ​សំណើ​សុំ​ចូល​ជួប​ជន​ជាប់​ចោទ ២៣​នាក់ ដែល​សមត្ថកិច្ច​ចាប់​ខ្លួន​កាល​ពី​ដើម​ខែ​មករា។

អ្នក​ទាំង ២៣​នាក់​នោះ រួម​មាន កម្មករ និង​សកម្មជន​សិទ្ធិ​មនុស្ស​ដែល​ត្រូវ​ចាប់​ខ្លួន​ក្នុង​ព្រឹត្តិការណ៍​សមត្ថកិច្ច​ប្រដាប់​អាវុធ បង្ក្រាប​បាតុកម្ម​របស់​កម្មករ​ដែល​ទាមទារ​ដំឡើង​ប្រាក់​ខែ​គោល ១៦០​ដុល្លារ។

ប្រធាន​ក្រុម​បេក្ខជន​តំណាង​រាស្ត្រ​នៃ​គណបក្ស​សង្គ្រោះ​ជាតិ លោក សុន ឆ័យ មាន​ប្រសាសន៍​ថា លោក​បាន​ដាក់​សំណើ​សុំ​ចូល​ជួប​អ្នក​ទាំ​នោះ តាំង​ពី​ថ្ងៃ​ទី​២៨ ខែ​មករា ទៅ​សាលា​ដំបូង​រាជធានី​ភ្នំពេញ ប៉ុន្តែ​រហូត​មក​ដល់​ពេល​នេះ​ពុំ​ទាន់​មាន​ចម្លើយ​យ៉ាង​ណា​នៅ​ឡើយ។

យ៉ាង​ណា​ក៏ដោយ លោក សុន ឆ័យ បញ្ជាក់​ថា បើ​ទោះ​ជា​មាន​ការ​អនុញ្ញាត ឬ​មិន​មាន​ក្តី ក៏​កម្មវិធី​នោះ​អត់​មាន​ការ​ប្រែប្រួល​ដែរ៖ «ខ្ញុំ​មាន​គម្រោង​ដោយសារ​មាន​ជំនួយ​ឧបត្ថម្ភ​ពី​ប្រទេស​អូស្ត្រាលី ទីក្រុង​ម៉ែលប៊ន ដើម្បី​ជួយ​ទៅ​ដល់​គ្រួសារ​អ្នក​ដែល​ស្លាប់ របួស រួម​និង​អ្នក​ដែល​ជាប់​ពន្ធនាគារ​ហ្នឹង ខ្ញុំ​យល់​ថា វា​ជា​គោលការណ៍​យើង​ជា​អ្នក​តំណាង​ឲ្យ​ពលរដ្ឋ​ហ្នឹង យើង​មាន​សិទ្ធិ​ហើយ​មាន​កាតព្វកិច្ច​ទៅ​ទៀត ដើម្បី​ទៅ​ជួប​សួរ​សុខ​ទុក្ខ​គាត់»

សេចក្តី​ប្រកាស​ព័ត៌មាន​របស់​គណបក្ស​សង្គ្រោះ​ជាតិ ចេញ​ផ្សាយ​កាល​ពី​ថ្ងៃ​ទី​៣១ មករា បាន​ឲ្យ​ដឹង​ថា ក្រុម​គ្រួសារ​ជន​ជាប់​ចោទ​ទាំង ២៣​នាក់​នោះ ក៏​នឹង​រួម​ដំណើរ​ទៅ​ជាមួយ​ក្រុម​បេក្ខជន​តំណាង​រាស្ត្រ​ជាប់​ឆ្នោត​របស់​គណបក្ស​សង្គ្រោះ​ជាតិ នោះ​ដែរ។

ទាក់ទង​នឹង​គម្រោង​ទៅ​សួរ​សុខ​ទុក្ខ​អ្នក​ទាំង ២៣​នាក់​នេះ​ដែរ ប្រធាន​ពន្ធនាគារ​ត្រពាំងផ្លុង លោក គា សុវណ្ណ មាន​ប្រសាសន៍​នៅ​ថ្ងៃ​ទី​០១ កុម្ភៈ ថា ក្រៅ​ពី​ក្រុម​គ្រួសារ​អ្នក​ដែល​ត្រូវ​ឃុំ​ខ្លួន គឺ​មិន​អនុញ្ញាត​ឲ្យ​ចូល​សួរ​សុខ​ទុក្ខ​ឡើយ បើ​ពុំ​មាន​លិខិត​អនុញ្ញាត​ពី​តុលាការ​នោះ​ទេ ពីព្រោះ​សំណុំ​រឿង​របស់​អ្នក​ទាំង ២៣​នាក់​នោះ កំពុង​ស្ថិត​ក្នុង​នីតិវិធី​របស់​តុលាការ ដែល​ចៅក្រម​ស៊ើប​សួរ​ធ្វើ​ការងារ​នេះ​ពុំ​ទាន់​ចប់​សព្វគ្រប់​នៅ​ឡើយ៖ «ម៉ែ​ឪ​របស់​គេ​អាច​អនុញ្ញាត​ឲ្យ​ចូល​ជួប ប៉ុន្តែ​បើ​គណបក្ស​សង្គ្រោះ​ជាតិ ទាល់​តែ​មាន​ការ​អនុញ្ញាត​ពី​តុលាការ​មក»

ទាក់ទង​ករណី​នេះ​ដែរ សហជីព​កម្មករ និង​អ្នក​ការពារ​សិទ្ធិ​មនុស្ស​នៃ​អង្គការ​មិន​មែន​រដ្ឋាភិបាល​មួយ​ចំនួន បាន​ខក​ចិត្ត​ម្តង​រួច​ទៅ​ហើយ​នៅ​ពេល​ដែល​អគ្គនាយកដ្ឋាន​ពន្ធនាគារ​នៃ​ក្រសួង​មហាផ្ទៃ សម្រេច​បដិសេធ​សំណើ​របស់​ពួក​គេ​កាល​ពី​ថ្ងៃ​ទី​២៤ មករា ដែល​សុំ​ចូល​ទៅ​សួរ​សុខ​ទុក្ខ លោក វន់ ពៅ និង​មនុស្ស ៧​នាក់ ក្នុង​ចំណោម​ពលរដ្ឋ ៣​នាក់​ដែល​កំពុង​ជាប់​ឃុំ​ក្នុង​ពន្ធនាគារ​ក្នុង​ខេត្ត​កំពង់ចាម នោះ។ ក្នុង​គោល​បំណង​ដដែល​នេះ ពួក​គេ​បាន​ដាក់​សំណើ​មួយ​ទៅ​រដ្ឋមន្ត្រី​ក្រសួង​មហាផ្ទៃ បន្ត​ទៀត ប៉ុន្តែ​ពុំ​ទាន់​មាន​ការ​ឆ្លើយ​តប​នៅ​ឡើយ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។



អត្ថបទ​ដែល​ទាក់ទង


What Next?

Recent Articles

2 Responses to "តំណាង​រាស្ត្រ​បក្ស​ប្រឆាំង​គ្រោង​ទៅ​ជួប​ពលរដ្ឋ​២៣​នាក់​ជាប់​ឃុំ​នៅ​កំពង់ចាម​ថ្ងៃ​ទី​៤"

  1. Maharaja Lowell says:

    Er tov dék kuk JEA muy knea tov Pouk ar mork min kroub tirk ey!

  2. CHEA says:

    DO any one think this is the right way for democracy country doing to their protester that demanding political change in Cambodia. this is another mistaken that this government just doing recently .are these the way that democracy doing to their detainee? are these the way that their curt order to treat to their prisoners .?all of these wrong doing that showing in front of your face . you should see clearly what is right and wrong in the ware of word. peace to all Cambodian