ដោយ៖​ ណាត​ សុភាព​
ថ្ងៃចន្ទ ទី17 ខែមិនា ឆ្នាំ2014
http://vodhotnews.com

លោក លី ស្រៀងខេង ផ្តល់បទសម្ភាសន៍ដល់ VOD (រូបថត៖ ណាត សុភាព)

​ពលរដ្ឋ​១គ្រួសារ ក្នុងចំណោម៤​គ្រួសារ​រស់នៅ​សង្កាត់​បឹងកក់​១ ខណ្ឌ​ទួលគោក ដែល​មាន​ជម្លោះ​ដីធ្លី​ជាមួយ​ក្រុមហ៊ុន ឃុន សៀ កំពុង​បារម្ភ​ពី​សុវត្ថិភាព ខណៈ​សន្តិសុខ​ក្រុមហ៊ុន​នេះ ដុត​ផ្ទះ​របស់​គាត់ ប៉ុនប៉ង​សម្លាប់។​

ម្ចាស់ផ្ទះ លោក លី ស្រៀ​ខេង ថ្លែង​ក្នុង​សន្និសីទ​នៅ​រសៀល​ថ្ងៃ​ចន្ទ​នេះ​ថា ក្រុម​សន្តិសុខ ២​ទៅ​៣​នាក់ របស់​ក្រុមហ៊ុន ឃុន សៀ បាន​ចូល​ដុត​ទ្វារ​មុខ​បន្ទប់​របស់​គាត់ ប៉ុនប៉ង​សម្លាប់​១​គ្រួសារ តែសំណាងល្អ​មិន​មាន​អ្នកណា​រងរបួស ឬ​ខូចខាត​ធ្ងន់ធ្ងរ​ឡើយ ដោយសារ​មាន​អ្នកដំណើរ​ពី​នាក់ ចុះ​ពី​លើ​រថយន្ត​ជួយ​ពន្លត់​ទាន់ពេល កាលពី​ម៉ោង​២:៣០​នាទី​ជិត​ភ្លឺ​ថ្ងៃ​ចន្ទ​នេះ​។​

​លោក លី ស្រៀ​ខេង បន្តថា ចាប់​ពី​គាត់​មាន​ជម្លោះ​ជាមួយនឹង​ក្រុមហ៊ុន ឃុន សៀ ជិត​៦​ខែហើយ សន្តិសុខ​ក្រុមហ៊ុន​មួយ​នេះ តែងតែ​បង្ក​ការភ័យខ្លាច គំរាមកំហែង​គ្រប់​រូបភាព​ដល់​ពួកគាត់។

​គ្រួសារ​លោក​ លី ស្រៀ​ខេង ធ្លាប់​បាន​ចោទ​ក្រុមហ៊ុន ឃុន សៀ​ ថា​បាន​ព្រលែង​ពស់វែក​ចំនួន​៤​ក្បាល ចូល​ផ្ទះ​គាត់ កាលពី​យប់​ថ្ងៃ​ទី​៣០​ខែតុលា ឆ្នាំ​២០១៣ និង​ធ្លាប់​គំរាម​បោក​គ្រាប់បែក​ចូល​ផ្ទះ​គាត់​ផងដែរ​។​

VOD មិនអាច​សុំ​ការបំភ្លឺ​ពី​ភាគី​ក្រុមហ៊ុន ឃុន សៀ បាន​នៅឡើយ​ទេ នៅ​រសៀល​ថ្ងៃ​ចន្ទ​នេះ​។​

​ប្រធាន​ក្រុមការងារ​ពិសេស​សិទ្ធិ​លំនៅឋាន លោក សៀ ភារម្យ បញ្ជាក់ថា រដ្ឋាភិបាល និង​តុលាការ ត្រូវ​ចាត់វិធានការ​វែកមុខ​អ្នក​ដែល​ប្រព្រឹត្ត​បទល្មើស​មក​ផ្តន្ទាទោស​តាមច្បាប់ ដើម្បី​ឲ្យស្រប​តាម​គោលន​យោបា​យ កែទម្រង់​ស៊ីជម្រៅ​របស់​រដ្ឋាភិបាល លើ​បញ្ហា​ជម្លោះ​ដីធ្លី​។

​ទំនាស់​ដីធ្លី​រវាង​ពលរដ្ឋ​៤​គ្រួសារ​នៅ​តំបន់​បឹង​កក់​១ ជាមួយនឹង​ក្រុមហ៊ុន ឃុន សៀ កើតឡើង​ចាប់ពី​ខែ​មេសា ឆ្នាំ​២០១៣​ដោយ​ពលរដ្ឋ​អះអាងថា ក្រុមហ៊ុន​មួយ​នេះ​បាន​ព្យាយាម​ទិញយក​ដី​ពលរដ្ឋ​នៅ​ទី​នោះ​ចំនួន​៣​គ្រួសារ ដោយ​ឲ្យ​តម្លៃ​១៥០០០​ដុល្លារ​ក្នុង​មួយ​គ្រួសារ​។ ប៉ុន្តែ ប្រជាពលរដ្ឋ​មិន​ព្រម​លក់​ ហើយ​ក្រោយ​មក​ក្រុមហ៊ុន​ក៏​ព្យាយាម​រក​គ្រប់​មធ្យោបាយ​ដើម្បី​រំខាន​ដល់​ពួកគាត់​៕​

សូមសរសេរមកលោក ណាត សុភាព​ តាមរយៈ sopheap@vodhotnews.com