ដោយ៖ សុទ្ធ គឹមសឿន
ថ្ងៃចន្ទ ទី24 ខែមិនា ឆ្នាំ2014
http://vodhotnews.com
មើលរូបភាពបន្ថែម
សិស្សានុសិស្ស ជួបជុំគ្នានៅមុខមណ្ឌលប្រឡង ក្រោយពេលប្រឡងចប់ (រូបថត៖ ណាត សុភាព)
អង្គការសង្គមស៊ីវិលចំនួន៣ សាទរចំពោះប្រធានអង្គភាពប្រឆាំងអំពើរពុករលួយ ដែលផ្តល់ឱកាសឲ្យអង្គការសង្គមស៊ីវិល និងវិស័យឯកជនចូលរួមសង្កេតមើលភាពមិនប្រក្រតី (អំពើពុករលួយ) ក្នុងពេលប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) ឆ្នាំ២០១៤នេះ។
សេចក្ដីថ្លែងការណ៍របស់អង្គការចំនួន៣ រួមមាន សម្ព័ន្ធគណនេយ្យភាពសង្គម អាស៊ីបូព៌ា និងបាស៊ីហ្វិក (ANSA-EAP) សម្ព័ន្ធដើម្បីសុចរិតភាព និងគណនេយ្យ សង្គម(CISA) និងវិទ្យាស្ថានខ្មែរសំរាប់អភិវឌ្ឍន៍ជាតិ (KIND) នៅថ្ងៃទី២៤ ខែមីនា ឲ្យដឹងថា អង្គការសង្គមស៊ីវិលដែលធ្វើការពាក់ព័ន្ធវិស័យប្រឆាំងអំពើពុករលួយ គាំទ្រ និងចូលរួមជាមួយអង្គភាពប្រឆាំងអំពើពុករលួយ និងក្រសួងអប់រំ យុវជន និងកីឡា ដើម្បីបង្កើននូវតម្លាភាព និងគុណភាពវិស័យអប់រំនៅកម្ពុជា។
សេចក្តីថ្លែងការណ៍ បន្តថា ទោះយ៉ាងណា តាមការសង្កេតនាពេលកន្លងមក ឃើញថា ការចាត់វិធានការទៅលើអំពើពុករលួយ ដែលពាក់ព័ន្ធអ្នកមានអំណាចថ្នាក់ខ្ពស់ និងក្រុមគ្រួសារ ហាក់មិនទាន់មានផ្លែផ្កានៅឡើយទេ។
សេចក្តីថ្លែងការណ៍របស់អង្គការទាំង៣ បានបន្តដោយទទូចដល់អង្គភាពប្រឆាំងអំពើរពុករលួយ មិនត្រឹមតែផ្តោតការយកចិត្តទុកដាក់ទៅលើវិស័យអប់រំតែមួយមុខប៉ុណ្ណោះទេ គឺគួរតែដាក់ចេញនូវគោលការណ៍បន្ថែម ដោយអនុញ្ញាតឲ្យអង្គការសង្គមស៊ីវិលអាចចូលរួមតាមដានការអនុវត្ត គម្រោងនានារបស់រដ្ឋ រួមមាន គម្រោងកសាងហេដ្ឋារចនាសម្ព័ន្ធធំៗ គម្រោងផ្ដល់សេវាសុខភាព ការផ្ដល់សម្បទានធនធានធម្មជាតិ និងការផ្ដល់សេវាសាធារណៈជាដើម ព្រោះថាវត្តមាននៃការតាមដានរបស់អង្គការសង្គមស៊ីវិល អាចរួមចំណែកជាប្រយោជន៍ ដើម្បីជំរុញឲ្យសេវាទាំងនោះ មានតម្លាភាព គណនេយ្យភាព ប្រសិទ្ធិភាព និងលើកកម្ពស់ផលប្រយោជន៍សាធារណៈ និងយុត្តិធម៌សង្គម៕
សរសេរមកកាន់លោក សុទ្ធ គឹមសឿន តាមរយៈ keomsoeunsoth@gmail.com
យើងគាំទ្រសកម្មភាពរបស់អង្គភាពប្រឆាំងអំពើពុករលួយក្នុងការធ្វើសកម្មភាពកន្លងមក ប៉ុន្តែ កុំអនុវត្តបានតែមន្រ្តីតូចតាច គ្មានខ្នងបង្អែក គ្មានបក្សពួក ហើយពុករលួយតិចតួច ។
យុទ្ធសាស្រ្តនេះគ្រាន់តែកំណត់គុណភាពជាមូលដ្ឋានប៉ុណ្ណោះថា ប្រសិនជាសិស្សានុសិស្សប្រលងដោយគ្មានការលួចចំលង តើសិស្សប៉ុន្មានភាគរយទទួលលទ្ធផល ជាប់ឬធ្លាក់ និទ្ទេសយ៉ាងម៉េច ។ តែមិនមែនជាយុទ្ធសាស្រ្តចំបងក្នុងការលើកកំពស់គុណភាពធនធានមនុស្សជាទូទៅនោះទេ ពីព្រោះថា សិស្សមានចំណេះដឹងពិតបា្រកដ ត្រូវឆ្លងកាត់ការរៀនសូត្រប្រចាំថ្ងៃ គុណភាពនៃការបង្រៀនប្រចាំថ្ងៃ ហើយគុណភាពនៃការបង្រៀនប្រចាំថ្ងៃនោះ វាអាស្រ័យទៅលើឆន្ទៈ និងសមត្ថភាពរបស់គ្រូបង្រៀន ។ តែបើពាក្យស្លោក – ក្រពះឃ្លាន បង្រៀនមិនកើត នៅតែលឺនោះ វាគ្រាន់តែជាការរឹតត្បិតចំនួនសិស្សដែលត្រូវប្រលងជាប់ ហើយអាចបន្តការសិក្សានៅមហាវិទ្យាល័យប៉ុណ្ណោះ ហើយក៍មិនអាចកំណត់ច្បាស់លាស់ថា សិស្សដែលប្រលងជាប់នោះ ពិតជាបានដោយសារសមត្ថភាពខ្លួនឯងដែរ [ឧ. ប្តូរក្បាលឯកសារប្រលង….]
តឹងតែងពេលសិស្សប្រឡងគឺគ្រាន់តែចង់ឲ្យសិស្សប្រឡងធ្លាក់កាន់តែច្រើនតែប៉ុណ្ណោះ។ប្រសិនបើសិស្សរៀនបានតិចតួចពេលប្រឡងក៏ប្រឈមនឹងការធ្លាក់កាន់តែខ្ពស់អីច្ចឹងសិស្សម្នាក់ៗត្រូវប្រឹងរៀន
គួរក្រៅម៉ោងឲ្យបានច្រើនពីព្រោះនៅក្នុងសាលាគ្រូបង្រៀនបានតិចហើយបញ្ចេញមិនអស់ចំណេះ
ដឹងរបស់គាត់ឲ្យសិស្សទេ។កូនអ្នកក្រប្រហែលជាប្រឈមនឹងការប្រឡងធ្លាក់ច្រើនជាងកូនអ្នកទី
ក្រុងតាមស្មានមើលទៅ។ប៉ុន្តែមិនអីទេពីព្រោះរោងចក្រកំពុងត្រូវការកម្មករច្រើនថែមទៀតហើយ
បើមិនចង់ធ្វើកម្មករទេនាំគ្នាចូលបក្សប្រឆាំងដើម្បីធ្វើបាតុកម្មដូរប្រពន្ធ័អប់រំថ្មី។