ដោយ ជិន ជេដ្ឋា
2014-04-14
RFA
សមាជិកក្រុមប្រឹក្សាស្រុកសាមគ្គីមានជ័យ ខេត្តកំពង់ឆ្នាំង ចោទប្រកាន់អភិបាលស្រុក និងរដ្ឋបាលសាលាស្រុកនេះ ថាបានប្រព្រឹត្តអំពើពុករលួយ ក្នុងការចាយវាយថវិការបស់សាលាស្រុកសម្រាប់ឆ្នាំ២០១៣។
មន្ត្រីក្រុមប្រឹក្សានេះបញ្ជាក់ថា ទឹកប្រាក់ជាង ៣០លានរៀល សម្រាប់ទិញសម្ភារៈការិយាល័យ និងប្រេងឥន្ធនៈ ត្រូវបានគេចាយវាយមិនត្រឹមត្រូវ និងមានតម្លាភាពឡើយ។
ការចោទប្រកាន់នេះធ្វើឡើងបន្ទាប់ពីសមាជិកក្រុមប្រឹក្សាស្រុកនៃគណបក្ស សម រង្ស៊ី ម្នាក់ឈ្មោះ សៅ ហន ត្រូវបានប្រធានក្រុមប្រឹក្សាស្រុកសាមគ្គីមានជ័យ លោក កៅ ហុន មិនអនុញ្ញាតឲ្យបើកប្រាក់បៀវត្សរ៍សម្រាប់ខែមីនា ឆ្នាំ២០១៤ ចំនួន ៥០ម៉ឺនរៀល ដោយសំអាងថា បាត់បង់សមាជិកភាពពីគណបក្សដើម។ មន្ត្រីគណបក្សប្រឆាំងយល់ថា បញ្ហានេះ គឺបណ្ដាលមកពីខ្លួនបានគាស់កកាយរឿងចាយវាយប្រាក់មិនត្រឹមត្រូវក្នុងសាលាស្រុក កាលពីអំឡុងខែកុម្ភៈ ឆ្នាំ២០១៤ កន្លងទៅ។
អតីតក្រុមប្រឹក្សាស្រុក និងជាសកម្មជនគណបក្សសង្គ្រោះជាតិ លោក សៅ ហន មានប្រសាសន៍នៅថ្ងៃទី១៣ ខែមេសា ថា នៅក្នុងកិច្ចប្រជុំក្រុមប្រឹក្សាស្រុក នាពេលកន្លងមកលោកបានជជែកគ្នាយ៉ាងខ្លាំងទាក់ទងនឹងការចំណាយថវិកានៅក្នុងគណនេយ្យលេខ ៦០១ សម្រាប់ទិញសម្ភារៈផ្គត់ផ្គង់ក្នុងសាលាស្រុក និងអនុគណនេយ្យលេខ ៦០១៥ សម្រាប់ទិញប្រេងឥន្ធនៈ ដែលខ្ទង់ចំណាយ នៃគណនេយ្យទាំងពីរនេះមានតួលេខប៉ោងហួសហេតុ មិនសមាមាត្រទៅនឹងការប្រើប្រាស់ និងសម្ភារៈដែលមានក្នុងសាលាស្រុក។
លោក សៅ ហន៖ «យើងកាត់ឈ្មោះហ្នឹងប្រហែលជាមុន ប៉ុនមុនប្រហែលជាតិចតួចទេ ប៉ុន្តែសេចក្ដីប្រកាសនេះវាចេញមកថ្ងៃទី២០ ខែ៣ (ខែមីនា) ហើយដល់ពេលដែលយើងយកមកប្រកាសនៅស្រុកនៅថ្ងៃ២៧ ខែបី»។
លោកទាមទារឲ្យអង្គភាពប្រឆាំងអំពើពុករលួយចុះស៊ើបអង្កេតករណីចាយវាយមិនត្រឹមត្រូវនេះ។ ចំណែកក្រសួងមហាផ្ទៃ គប្បីចុះត្រួតពិនិត្យឡើងវិញនូវការអនុវត្តការងាររបស់អាជ្ញាធរស្រុកសាមគ្គីមានជ័យ និងជួយសម្រួលដល់ការបើកប្រាក់បៀវត្សរ៍សម្រាប់ខែមីនា ឲ្យបានដូចមន្ដ្រីក្រុមប្រឹក្សាផ្សេងទៀតដែរ។
ឆ្លើយតបបញ្ហានេះអភិបាលស្រុកសាមគ្គីមានជ័យ លោក ចាន់ វឿន មានប្រសាសន៍ថា ការចាយវាយថវិការបស់ស្រុកនេះ ពិតជាមានការល្អៀងបន្តិចបន្តួចមែន ប៉ុន្តែលោកមានឯកសារគ្រប់គ្រាន់ដើម្បីបញ្ជាក់ថា រាល់ការចំណាយទាំងនោះពិតជាមានភាពត្រឹមត្រូវ។ ចំណែករឿងប្រាក់ខែរបស់សមាជិកនៃក្រុមប្រឹក្សាគណបក្ស សម រង្ស៊ី វិញ គឺខាងលោករង់ចាំតែបើកជូនប៉ុណ្ណោះ ឲ្យតែមានការអនុញ្ញាតពីប្រធានក្រុមប្រឹក្សាស្រុក។
លោក ចាន់ វឿន៖ «តាមគំនិតខ្ញុំទេ ការចោទប្រកាន់នេះគឺចាប់ជំរុញឲ្យបើកប្រាក់ខែ បើកប្រាក់ខែខ្ញុំចាំតែបើកឲ្យតើ គ្រាន់តែថា កិច្ចការងារហ្នឹងមិនមែននៅលើខ្ញុំសម្រេចទេ គឺនៅលើក្រុមប្រឹក្សា»។
វិទ្យុអាស៊ីសេរីបានព្យាយាមទាក់ទងប្រធានក្រុមប្រឹក្សាស្រុកសាមគ្គីមានជ័យ លោក កៅ ហុន ដើម្បីសុំការអត្ថាធិប្បាយជុំវិញបញ្ហានេះ ប៉ុន្តែមិនអាចទាក់ទងបានឡើយ រហូតមកដល់ព្រលប់ថ្ងៃទី១៣ ខែមេសា។ យ៉ាងណាលោក សៅ ហន បង្ហើបថា កន្លងមកលោកបានទូរស័ព្ទទៅប្រធានក្រុមប្រឹក្សារូបនេះដែរ ដើម្បីសួរនាំពីបញ្ហាប្រាក់ខែរបស់ខ្លួន ប៉ុន្តែត្រូវលោក កៅ ហុន ឆ្លើយតបយ៉ាងខ្លីថា ក្រុមប្រឹក្សាអនុវត្តទៅតាមសេចក្ដីជូនដំណឹងរបស់ក្រសួងមហាផ្ទៃ ហើយជំរុញឲ្យលោកអានសេចក្ដីជូនដំណឹងនោះ។
ក្រសួងមហាផ្ទៃ កាលពីថ្ងៃទី២០ ខែមីនា ឆ្នាំ២០១៤ បានចេញសេចក្ដីជូនដំណឹងមួយដល់ប្រធានក្រុមប្រឹក្សាខេត្ត និងស្រុកនៅទូទាំងប្រទេស ដើម្បីអនុវត្តគោលការណ៍ និងនីតិវិធីចំពោះសមាជិកក្រុមប្រឹក្សារាជធានី ក្រុង ស្រុក ខណ្ឌដែលបានទៅឈរឈ្មោះជាបេក្ខជនពេញសិទ្ធិ ឬបម្រុង ក្រៅពីគណបក្សដើមរបស់ខ្លួនសម្រាប់ការបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុង និងស្រុកលើកទី២។
នាយកប្រតិបត្តិនៃអង្គការខុមហ្វ្រែល (Comfrel) លោក គល់ បញ្ញា យល់ថា ការចេញសេចក្ដីជូនដំណឹងរបស់ក្រសួងមហាផ្ទៃ នៅពេលនេះ គឺធ្វើឡើងក្នុងចេតនានយោបាយច្រើនជាង ដោយមិនបានគិតពីគោលការណ៍សិទ្ធិរបស់ក្រុមប្រឹក្សាថ្នាក់ក្រោមជាតិជាប់ឆ្នោត។ លោកបន្តថា ការបាត់បង់ ឬមិនបាត់បង់សមាជិកភាពពីគណបក្សដើម គឺអាស្រ័យលើគណបក្សនយោបាយសាមីជាអ្នកកំណត់ ហើយក្រសួងមហាផ្ទៃ អាចអនុវត្តកិច្ចការនេះបាន លើកលែងតែមានបណ្ដឹងពីគណបក្សនយោបាយទាំងនោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទដែលទាក់ទង
- យុវជនប្រគំតន្ត្រីផ្សព្វផ្សាយពីការប្រឆាំងអំពើពុករលួយនៅបន្ទាយមានជ័យ
- ទាហានរំសាយនៅឧត្តរមានជ័យចោទមន្ទីរសង្គមកិច្ចថាលុបឈ្មោះពីបញ្ជីសោធននិវត្តន៍
- អង្គការតម្លាភាពកម្ពុជានឹងរៀបចំតាំងពិព័រណ៍រូបថតប្រឆាំងអំពើពុករលួយនៅថ្ងៃ៤ មេសា
- អង្គភាពប្រឆាំងអំពើពុករលួយប្រកាសហាមករណីបក្សពួកនិយមក្នុងស្ថាប័នរដ្ឋ
- នាយកសាលានៅស្វាយរៀងរងការចោទថាពុករលួយក្នុងការផ្ដល់អាហារូបករណ៍
- អង្គការ៣ត្រៀមអង្កេតករណីពុករលួយពេលប្រឡងបាក់ឌុបឆ្នាំនេះ
- មន្ត្រីសុខាភិបាលបន្លំប្រាក់មូលនិធិសកលមិនត្រូវបានផ្ដន្ទាទោស
- ប្រធានអង្គភាពប្រឆាំងអំពើពុករលួយប្រតិកម្មនឹងមតិរិះគន់
- គ្រូវិទ្យាល័យនៅសង្កាត់ឃ្មួញចោទនាយកសាលាពីបទលួចបន្លំក្លែងឯកសារ
សង្គមបែបនេះរស់នៅពិបាកជាងស្លាប់ទៅទៀត បើអាចធ្វើបានគួរតែធ្វើ
“យើងសូមផ្ដាំទៅគណបក្សប្រជាជន បើគណបក្សប្រជាជនមិនព្រមរកយុត្តិធម៌ជុំវិញការបោះឆ្នោតគឺចោរ ទី២បើគណបក្សប្រជាជនមិនព្រមបោះឆ្នោតឡើងវិញគឺចាញ់ ទី៣ បើគណបក្សប្រជាជននៅតែមិនព្រមបោះឆ្នោតឡើងវិញទៀត គឺចុះចេញ។ឥឡូវនេះគណបក្សប្រជាជនស្អីក៏មិនព្រមៗ គឺហៅថា រដ្ឋាភិបាល ចោរ ចាញ់ ចុះចេញ” ។