ដោយ ខែ សុណង
2014-04-23
RFA
អាជ្ញាធរខណ្ឌសែនសុខ រាជធានីភ្នំពេញ បានកោះហៅអ្នកពាក់ព័ន្ធមកជួបជុំគ្នា ក្នុងសំណុំរឿងចោទគ្នាទៅវិញទៅមកពីករណីរំលោភបំពានយកដីវត្តកោះពោធិ៍វង្ស លក់ឲ្យម្ចាស់បុរី ប៉េង ហួត សង់ផ្ទះល្វែងលក់។ ការជួបជុំគ្នានេះ លោកអភិបាលខណ្ឌនឹងយករបាយការណ៍នេះដាក់ជូនអភិបាលរាជធានីភ្នំពេញ។ កាលពីថ្ងៃទី២២ ខែមេសា ព្រះសង្ឃប្រមាណ ៧០អង្គ និងពុទ្ធបរិស័ទចំណុះជើងវត្តរាប់រយនាក់ បាននាំគ្នាលើកបដាតវ៉ាប្រឆាំងនឹងការសាងសង់រំលោភយកដីវត្តនេះ។
មន្ត្រីអាជ្ញាធរខណ្ឌសែនសុខ បានបដិសេធចំពោះការចោទប្រកាន់ពីថ្នាក់ដឹកនាំវត្តកោះពោធិ៍វង្ស ស្ថិតនៅភូមិបាយាប សង្កាត់ភ្នំពេញ ថាមិនបានឃុបឃិតគ្នាលក់ដីវត្តឲ្យបុរី ប៉េង ហួត សង់ផ្ទះល្វែងលក់ដូចការចោទប្រកាន់ឡើយ។
អភិបាលរងខណ្ឌសែនសុខ លោក ជា ខេមា ដែលរងការចោទ បានថ្លែងនៅថ្ងៃទី២៣ មេសា ថា កាលពីថ្ងៃទី១៨ ខែមករា ឆ្នាំ២០១៣ លោកគ្រាន់តែជាអាជ្ញាធរដែលចូលរួមចុះហត្ថលេខាដឹងឮ ចំពោះការបែងចែកដីដែលមានក្នុង ស.ជ.ណ ដែលចេញពីទីស្ដីការគណៈរដ្ឋមន្ត្រី ឲ្យភាគីទាំងពីរ គឺឧកញ៉ា ឃុន ជា និងភាគីថ្នាក់ដឹកនាំវត្តកោះពោធិ៍វង្ស និងមានព្រះតេជព្រះគុណ ឈួន សុវីន ជាគ្រូសូត្រស្ដាំមួយអង្គ ក៏បានព្រមព្រៀងវាស់វែងចែកគ្នាហើយតែប៉ុណ្ណោះ។
លោកបន្តថា ភាគីឧកញ៉ា ឃុន ជា ដែលមានឧកញ៉ា ឈាង ប៉ាក់សួរ ជាតំណាង បានទទួលដីជាង ៧ហិកតារ ហើយភាគីខាងវត្តបានទទួលដីជាង ១ហិកតារ។ រីឯការចោទប្រកាន់ថា លោកបានឃុបឃិតជាមួយឧកញ៉ា ឈាង ប៉ាក់សួរ យកដីវត្តទំហំ ៣០ម៉ែត្រ គុណនឹង ១៧០ម៉ែត្រ គឺមិនពិតឡើយ៖ «ការវាស់វែងហ្នឹង ដីហ្នឹងលោកទទួលយកប្លង់ហ្នឹង ផ្ដិតមេដៃមានគណៈកម្មការអស់ ខ្ញុំគ្រាន់តែទៅចូលរួមធ្វើជាដឹងឮប៉ុណ្ណឹងទេ។ ខ្ញុំអត់មានសិទ្ធិទៅឃុបឃិតលក់ទេ ព្រោះដីមានការវាស់វែង គេត្រូវគ្នាអស់ហើយ រួចចេះតែថាខ្ញុំឃុបឃិតជាមួយ ឈាង ប៉ាក់សួរ យកដីវត្តទៅលក់។ សម័យនេះហើយ នរណាយកដីវត្តទៅលក់ ខ្ញុំធ្វើការប៉ុណ្ណឹងដែរ មួយអាណត្តិនៅហ្នឹងហើយ ដែលទៅបានយកដីពីណាលក់បានម្ដុំលោកម្ចាស់»។
បើទោះជាមានការបដិសេធយ៉ាងនេះក្ដី ភាគីខាងវត្តនៅតែរង់ចាំចំណាត់ការរបស់លោកនាយករដ្ឋមន្ត្រី ហ៊ុន សែន ឲ្យដោះស្រាយចំពោះបញ្ហានេះដដែល។
គ្រូសូត្រស្ដាំវត្តកោះពោធិ៍វង្ស ហៅវត្តកោះលោកជំទាវតី ព្រះតេជព្រះគុណ ឈួន សុវីន មានថេរដីកាថា ករណីនេះខាងវត្តបានដាក់លិខិតសុំអន្តរាគមន៍ពីលោកនាយករដ្ឋមន្ត្រី ហ៊ុន សែន ទៅខុទ្ទកាល័យរួចហើយ។ ព្រះតេជព្រះគុណសង្ឃឹមថា នៅពេលលោកនាយករដ្ឋមន្ត្រីត្រឡប់ពីបរទេសវិញ នឹងអន្តរាគមន៍ករណីនេះ។ ព្រះតេជព្រះគុណបញ្ជាក់ថា ករណីនេះ គឺខាងវត្តដាក់ពាក្យប្ដឹងឧកញ៉ា ឈាង ប៉ាក់សួរ និងអភិបាលរងខណ្ឌសែនសុខ លោក ជា ខេមា ដែលបានរំលោភដីវត្ត ដោយវាស់ចូលទំហំ ៣០ម៉ែត្រ គុណនឹង ១៧០ម៉ែត្រ និងដីផ្លូវវត្ត ១២ម៉ែត្រ គុណនឹង ២៤៨ម៉ែត្រ។
ព្រះតេជព្រះគុណ ឈួន សុវីន បានបញ្ជាក់ជុំវិញការលើកឡើងថា កាលពីឆ្នាំ២០១៣ កិច្ចព្រមព្រៀងដែលបង្កើតឡើងដោយភាគីឧកញ៉ា ឈាង ប៉ាក់សួរ និងអាជ្ញាធរខណ្ឌ ថាមិនមែនជាកិច្ចព្រមព្រៀងស្របច្បាប់នោះទេ ពីព្រោះមានការគាបសង្កត់ និងជាការចាប់បង្ខំដោយយកឈ្មោះនាយករដ្ឋមន្ត្រីជាសំអាង៖ «ផ្ដិតមេដៃ និងមិនមែនគ្រាន់ផ្ដិតមេដៃយកដីប៉ុណ្ណឹងទេ គឺថាដីនៅសល់ទៀត តែមេគាត់ថាឲ្យទុកសិន ព្រោះដោយសារអីគាត់អាងថា សម្ដេចគាត់បញ្ជាមកដីនៅសល់ប៉ុណ្ណេះៗ តាមពិតមានសម្ដេចណាគាត់បញ្ជាមក គាត់ចេះតែក្រឡុកក្រលៀតគ្នាគាត់ហ្នឹង ស៊ុមគ្រលុំគ្នាគាត់ហ្នឹងណា ហើយគាត់ថាមិនយកដីវត្តម៉េច គាត់អ្នកយកគាត់អ្នកឃុបឃិត បើគ្មានអាជ្ញាធរឧកញ៉ាហ្នឹងម៉េចហ៊ាន។ គាត់ជាប់ពាក់ព័ន្ធរឿងហ្នឹង ក្នុងពាក្យបណ្ដឹងរបស់សម្ដេច គឺមានឈ្មោះគាត់ហ្នឹងធ្ងន់ធ្ងរជាងគេ។ ពីមុនខណ្ឌឫស្សីកែវ មិនមែនខណ្ឌសែនសុខ ទេ ដោយសារគាត់ឡើងសែនសុខ មកហ្នឹងគាត់ក្រឡុករឿងហ្នឹង។ រឿងរ៉ាវកើតឡើងដោយសារអី គាត់មិនទទួលស្គាល់អាដីវត្ត ១០០ គុណ ១៥០ ដីអាស្រមលោកតាលោកយាយ ២០ គុណនឹង ១០០ ក្បាលដីខាងកើតគាត់មិនទទួលស្គាល់ អាហ្នឹងហើយបានវាខុសហ្នឹង បានយើងទាមទារហ្នឹង»។
ចំណែកបុគ្គលិកការិយាល័យកណ្ដាលបុរី ប៉េង ហួត កញ្ញា សោភណ្ឌ នារី បានឲ្យដឹងដោយខ្លីថា សំណង់ដែលសង់លើដីនេះ គឺបានសាងសង់ជិតរួចរាល់ហើយ ហើយក៏មានអតិថិជនមកទិញជិតអស់ហើយដែរ៖ «ជាទូទៅដីក្រុមហ៊ុន គឺដីស្របច្បាប់ ហើយមានប្លង់កម្មសិទ្ធិត្រឹមត្រូវចុះជាមួយសុរិយោណា»។
ព្រះតេជព្រះគុណ ឈួន សុវីន បានឲ្យដឹងទៀតថា ទីតាំងវត្តនេះទទួលបានសេចក្ដីសម្រេចពីក្រសួងធម្មការ និងសាសនា ឲ្យបើកវត្តនៅឆ្នាំ២០០៦ និងមានចំណារសម្រេចពីសម្ដេចសង្ឃរាជ ទេព វង្ស អតីតអភិបាលរាជធានីភ្នំពេញ លោក កែប ជុតិមា និងអាជ្ញាធរមូលដ្ឋាន ឯកភាពឲ្យបង្កើតវត្តនេះ ដោយមានការគាំទ្រពីប្រជាពលរដ្ឋជិត ៥០០គ្រួសារ។ កាលពីឆ្នាំ២០០៩ លោក កែប ជុតិមា ឧកញ៉ា ឈាង ប៉ាក់សួរ និងលោក ជា ខេមា បាននាំគ្នាមកបិទវត្តនេះម្ដងរួចមកហើយ ដោយសំអាងថា យកធ្វើជាកន្លែងស្ដុកទឹករាជធានីភ្នំពេញ ប៉ុន្តែមានការតវ៉ារវាងព្រះសង្ឃ និងពលរដ្ឋ ហើយវត្តនេះមានឯកសារច្បាប់ត្រឹមត្រូវនោះ ក៏គ្មានការរុះរើវិញទៅ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទដែលទាក់ទង
- តំណាងអ្នកភូមិនៅកំពង់ឆ្នាំងនឹងចូលបំភ្លឺរឿងជម្លោះដីធ្លីជាមួយក្រុមហ៊ុននៅថ្ងៃ២៤មេសា
- ជនជាតិដើមភាគតិចនៅរតនគិរីបារម្ភពីសុវត្ថិភាពបន្ទាប់ពីដុតរោងស្នាក់ក្រុមហ៊ុនឥណ្ឌា
- ពលរដ្ឋនៅព្រៃវែងចោទអាជ្ញាធររំលោភយកដីអ្នកភូមិធ្វើផ្លូវដោយគ្មានសំណង
- មេបញ្ជាការរងស្រុកនៅកំពង់ធំបដិសេធការចោទរឿងកាន់កាប់ដីព្រៃសហគមន៍
- ពលរដ្ឋដែលត្រូវអាជ្ញាធរបណ្ដេញចេញនៅខេត្តក្រចេះរង់ចាំដំណោះស្រាយ
- ជនជាតិដើមភាគតិចដុតរោងស្នាក់នៅរបស់ក្រុមហ៊ុនសម្បទាននៅរតនគិរី
- ពលរដ្ឋមានទំនាស់ដីលើកគ្នាតវ៉ាមុខសាលាស្រុកបុទុមសាគរខេត្តកោះកុង
- អ្នកភូមិនៅកំពង់ឆ្នាំងបន់ស្រន់កុំឲ្យឈ្មួញរំលោភយកដីព្រៃសហគមន៍
- ពលរដ្ឋនៅព្រះវិហារថាអាជ្ញាធរមិនផ្ដល់ប្លង់កម្មសិទ្ធិដីក្រុមនិស្សិតវាស់រួច