ដោយ៖ ពេជ្រ សុធារី
ថ្ងៃចន្ទ ទី5 ខែឧសភា ឆ្នាំ2014
http://vodhotnews.com
ក្រុមអនាមិកកម្ពុជា ប្រកាសនៅថ្ងៃចន្ទនេះថា ខ្លួនបានវាយប្រហារតាមរយៈការលួចទិន្នន័យ និងបិទគេហទំព័រ របស់រដ្ឋមួយចំនួនមិនឲ្យដំណើរការមួយរយៈពេល ដូចជា គេហទំព័រ អគ្គស្នងការដ្ឋាននគរបាលជាតិ គណបក្សប្រជាជនកម្ពុជា និងអង្គភាពប្រឆាំងអំពើពុករលួយ ជាដើម ដែលជាយុទ្ធនាការទាមទារឲ្យដោះលែងក្រុម Hackers ដែលអាជ្ញាធរកម្ពុជាបានចាប់ខ្លួន។
ក្រុមអនាមិកកម្ពុជា (Anonymous Cambodia) បានបង្ហោះសារខ្លីៗនៅក្នុងទំព័រហ្វេសប៊ុករបស់ខ្លួននៅថ្ងៃទី០៥ ខែឧសភានេះថា ពួកគេបានវាយប្រហារទៅលើគេហទំព័រអគ្គស្នងការដ្ឋាននគរបាលជាតិ ឲ្យលែងដំណើរការរយៈពេលពីរម៉ោង ចាប់ពីម៉ោង១១ព្រឹកនេះ ដែលការវាយប្រហារនោះ ហៅថា Ddos។ ទំព័រហ្វេសប៊ុកដដែល បន្តថា ក្រៅពីគេហទំព័រអគ្គស្នងការដ្ឋាននគរបាលជាតិ ពួកគេបានវាយប្រហារ និងនិងបានលួចយកទិន្នន័យសំខាន់មួយចំនួន ពីគេហទំព័ររដ្ឋមួយចំនួន ដូចជា គេហទំព័ររបស់អង្គភាពប្រឆាំងអំពើពុករលួយ គេហទំព័រគណបក្សប្រជាជនកម្ពុជា គេហទំព័រ nida.gov.kh គេហទំព័រ Pas.gov.kh គេហទំព័រ Pressocm.gov.kh គេហទំព័រ rac.cambodia.gov.kh គេហទំព័រ moe.gov.kh និងគេហទំព័រ mwa.gov.kh។
ក្រៅពីនោះ ក្រុមអនាមិកកម្ពុជា ក៏បានលើកឡើងនៅក្នុងទំព័រហ្វេសប៊ុក របស់ខ្លួនដែរថា ការប្រកាសថាចាប់ខ្លួនក្រុម Hackers ដែលវាយប្រហារគេហទំព័ររបស់អង្គភាពអំពើពុករលួយ បានពីរនាក់ កាលពីដើមខែឧសភានេះ គឺជារឿងប្រឌិតរបស់អង្គភាពនេះតែប៉ុណ្ណោះ។ ក្រុមអនាមិក បន្តថា បើសិនជាអង្គភាពអំពើពុករលួយចាប់បានសមាជិករបស់ពួកគេមែននោះ អង្គភាពនេះនឹងប្រកាសប្រាប់ពីអត្តសញ្ញាណរបស់ជនទាំងពីរនាក់នោះហើយ។
កាលពីដើមខែឧសភានេះ អង្គភាពប្រឆាំងអំពើពុករលួយ បានប្រកាសនៅលើគេហទំព័រថា ខ្លួនចាប់បាន ក្រុម Hackers ពីរនាក់ ដែលបានចូលលុកលុយគេហទំព័ររបស់អង្គភាព។ សេចក្តីប្រកាសដដែល បន្តថា បន្ទាប់ពីគេហទំព័រលែងដំណើរការរយៈពេលមួយម៉ោងកន្លះ ខ្លួនបានទប់ស្កាត់ទាន់ពេលវេលា ហើយរយៈពេលពីរថ្ងៃក្រោយមក អង្គភាពនេះ ក៏ចាប់បានក្រុមវាយលុកចូលគេហទំព័រនោះ។
ក្រុម Hackers បានចាប់ផ្តើមវាយលុកទៅលើគេហទំព័ររដ្ឋ និងឯកជនមួយចំនួន កាលពីចុងខែមេសា បន្ទាប់ពីអាជ្ញាធរកម្ពុជា បានចាប់ខ្លួនក្រុម Hackers កម្ពុជា២នាក់ កាលពីថ្ងៃទី០៧ ខែមេសា ដែលជាការឆ្លើយតបទៅនឹងការព្រមានរបស់ពួកគេទៅកាន់រដ្ឋាភិបាលកម្ពុជា ក្នុងការទាមទារឲ្យដោះលែងសមាជិកក្រុមរបស់ពួកគេទាំងពីរនាក់នោះ៕
សូមសរសេរមកកញ្ញា ពេជ្រ សុធារី តាមរយៈ sotheary@vodhotnews.com